Malika 12 - Maiadomu

Vonawakedubala oine kanatanoqa kanatovekisabodaboda paipaidi

¹ Matautauda Ieisu vonawakedubalaeqa ivesipupu waidie ivo, “Tamo tomoqo oine ibaguli tanoqa waineye. Giavemaqeta paipaina: Oine mekanatanoqa ivavalabubuni waineye ibagubaguli. Dimudimu bonadi vuana ivo “grapes.” Tomo'otoqa igadigadia matautauda kaqedieqa ietubibibia. Oine kababibi vona dimudimu ivo “wine press.” We wetona inayatoi botoli naqeneye beqa inayemuyemu. We me Diu no oinenina dikabayemu kaiata puena waidie. Tutuyanina Ieisu dede vonawakedubala beqa iesipupu oine kanatanoqe paipaina, Diu Kaniselevo iyagovi me Isileli paipaidi iesipupu. Tutuya puena Buki Tutuaina naqeneye oine kanatanoqa tamo vonawakedubala me Isileli paipaidi iesipupu mesaida Aisea 5:1-2 waineye kwaiwawai. Kala ivalabubuni ivelauvivila. We oine kababibi wete kabavekisabodaboda iyoqonidi. Matautauda tupwaidiavo tovekisabodaboda ikewadi dimadie natanoqa iyatoi inavekisabodebodeni we inaqo kanikie.

² We oine gumaqa kanatutuya ilekwa, tonitanoqanina tamo tolituqa ivetuneni inanaqo tovekisabodaboda waidie kanakalaqei inakewai tavinina waineye.

³ We tovekisabodaboda ikavikavini, inigei, ivetuneni dimakavakavana ivila.

⁴ Matautauda tonibagula wete tamo tolituqa ivetuneni. We tovekisabodaboda kunukununeye ikainige, we ivalabubuna-kapo waineye.

⁵ Wete tonibagula tamo tolituqa ivetuneni, wete iluvewapai. We tupwaidiavo tolituqa wete ivetunedi waidie, mesaida ivalabubunedi, tupwaidiavo iluvewapadi tupwaidiavo ituveyawayawaidi.

⁶ “We tamoqaotoqina itupwa, gumanina tonitanoqanina natuna nuapouna gumanina ivenapwayeweni. Matautauda kabavekakava natuna ivetuneni tovekisabodaboda waidie ivo, ‘Anuani natugu inavekimataneni.’

⁷ “We oine tovekisabodaboda ivo, ‘Dede gumanina tonitanoqa natuna, gumanina kawaie tonitanoqa inawapa we tanoqa dede inakewai, beqa tainigei tailuvewapai. We oine kanatanoqa dede kida waideye inamiamia.’

⁸ “Beqa tomoqonina ikavikavini iluvewapai itaweni iobu oine kanatanoqa mulineye.

⁹ “Beqa banikodiqa tonitanoqa inavalabubunedi? Inamai tanoqa kanatovekisabodabodavo inaluvewapadi, we oine kanatanoqa inakalaqeieni malitomo'otoqa waidie.

¹⁰ Komi Buki Maqemaqetana naqeneye kwawawai o gebuka? “Ivo ‘We gileu toyoqona ivedumwekaikaieni, Yaubada gunabeida gileunina iyatoi ivekunututu navanuqa waineye.

¹¹ Dede Iave waineye'eqa imai we paipaina nuada ivilele.”

¹² Beqa me Diu togumetavo kedakeda ilalauala Ieisu inakavikavini, paina iyagovi dede vonawakedubalanina beqa paipaidi iesipupu. We yoko igololoyedi beqa ikiaweni iyavula.

Velautoli takisi paipaina

¹³ Tamo tutuya togumetavo Palisivo wete Elodi kanatokaivaisavo tupwaidiavo ivetunedi inaqo Ieisu waineye, velautolieqa inakatupwaieni.

¹⁴ We imai nuatabwadieqa ivesipupu waineye ivo, “Tovekaivevena, kima kayagovimu komu tovona mwaqitana wete ge kudanuanuana tamo aitoi kanawavaqa bwaigina paipaina, tomo'otoqa bwaigidi o tomo'otoqamaimaiqa ge kudaketovegeidi, we kaia Yaubada nakeda mwaqitana kuekaiveveneni.” Matautauda ivelautolieni, “Mosese ivona kida mane Yaubada waineye taikalaqei. Beqa kaivelautoliemu, kago giamaina takisi taiyato Sisa waineye o gebuka?”

¹⁵ We dinuanuana gunabeida iyagovidi iekautovona inakaibedebedeni ivo, “Uvale kwaekautovona kwaikaibedebedegu? Dinali kwamaieni kwavelegu aikiseni.”

¹⁶ Dinali tamo imaieni Ieisu waineye ivonedi, “Aitoi kanununa wete kanawavaqa?” We ivo, “Sisa.”

¹⁷ Beqa Ieisu ivonedi ivo, “Sisa paipaina Sisa waineye kwaikalaqei, we Yaubada paipaina Yaubada waineye kwaikalaqei.” Ieisu navonaeqa nuadi ivilele.

Sadusivo wayaqidi Ieisu inakatupoieni tovoi vaituqana paipaina

¹⁸ Sadusivo dinuanuana nigodibei tovoi vaituqana gebuka. We tupwaidiavo imai Ieisu waineye ivelamu ielautolieni ivo,

¹⁹ “Tovekaivevena, Mosese loina igililia paipaida kago tomoqo tatana inawapa kwabulina inakiawedi we ge menatuna taina inanaqidi we tutuyanina inavenatuna gwagwamanidiavo mesaida tatana natunavo.

²⁰ Tamo tomoqo tainavo kadikuma 6 taiauda imiamia, kanagumeta inaqidi iwapa we ge menatuna.

²¹ Wete taina kanaveluqa vavinenidi inaqidi, tomoqo iwapa we ge tamo menatuna, kadivetonu wete mesaida.

²² Kadikuma 7-nidiavo vavinenidi inaqidi iwapa we ge tamo aitoi menatuna. Kabavekakava vavine iwapa.

²³ Beqa wayaqima kivonema kaiyagovi kawaie tovoi vaituqana waineye vavinenidi aitoi mwanedi, paina kadikuma 7 inaqidi?”

²⁴ Ieisu waidie ivesipupu ivo, “Kaia kwaqau-otoqa, paina komi Buki Maqemaqetana kananuakawananaqai wete Yaubada naveluluna ge kwadayagovidi.

²⁵ Paina tutuyanina towapa inatovoi-vaituqana gumanidiavo mesaida anelosevo abame we ge inanaqi.

²⁶ We towapa ditovoi vaituqana paipaina, banikodiqa, ge kwadawawai Mosese nabuki naqeneye kaiyabeyabela welavi siaina gamwaneye ikalakalata vesipusipupuna? No waineye igililia Iave welavi siaina ikalakalata waineye ivesipupu-luguaqeta ivo, ‘Yau Ebelamo na Yaubada, Aisake na Yaubada, wete Iakobo na Yaubada.’

²⁷ Gumanina ge tomo'otoqa wapadi di Yaubada, we tomo'otoqa meyawaidi di Yaubada, beqa iveveda tutuyanina Ebelamo, Aisake wete Iakobo iwapa pwayepwayeye gunabeida itovoi-vaituqana, we Yaubada mataneye meyawaidi. Beqa tutuyanina komi kwavo towapa ge inatovoi-vaituqana, komi kaia kwakatupoe-otoqa.”

Loina bwaigiotoqina

²⁸ We loina kanatovekaivevena tamo imai inoqai iekawaviviqa. We iyagovi Ieisu divelautoli puedi ibaivila giagiamaidi. We loina kanatovekaivevena Ieisu ivelautolieni ivo, “Vakai loina bwaigiotoqina?”

²⁹ Ieisu ibaivila ivo, “Loina bwaigiotoqina dede mesaida, ‘Me Isileli, kwavevaneneqa! Tomwaya da Yaubada kaia gumanina kaisena Tomwaya.

³⁰ Iave mi Yaubada kwaivenapwayeweni nuapoumi matatabunaeqa, vaitabumi matatabunaeqa, nuami matatabunaeqa, wete miveluluna matatabunaeqa.’

³¹ We kanaveluqa ivo, ‘Iamu kivenapwayeweni mesaida taunimu kamuvenapwayewa.’ Dede loinanidiavo kailuqa bwaigiotoqidi ge wete tamo.”

³² We loina kanatovekaivevena Ieisu ivoneni ivo, “Tovekaivevena, mubaivila giamaikavana. Mwaqitana da Yaubada kaia tamoqana, Yaubada kaisena ge tamo aitoi manawaneye.

³³ Taivenapwayeweni nuapouda matatabunaeqa danuanua matatabunaeqa daveluluna matatabunaeqa wete edavo taivenapwayewedi mesaida taunida. Dede loinanidiavo bwaigiotoqidi, matautauda velomu gabugabunidi wete tupwaidiavo kabavelomu.”

³⁴ Ieisu inoqai tomoqo nabaivila waineye giamaikavadi. Beqa ivoneni ivo, “Komu kaia Yaubada Nakabaloina vivineye.” We mulineye tomo'otoqa igololo beqa ge tamo aitoi inaveluluna inavelautoli-katupoe Ieisu waineye.

Aitoi natuna gumanina Mesaia

³⁵ We Ieisu iekaivevena Temupolo malewina waineye ivelautoli ivo, “Banikodiqa, loina kanatovekaivevenavo ivo Mesaia Deibida tubuleleleqina?

³⁶ Yaubada Vaitabuna nuanuana giamaina iveleni Deibida waineye, beqa Deibida ivesipupu ivo, “ ‘Iave ivona gu Tomwaya waineye, “Kumiabui kataqigue vikai vekivekimatanina waineye, kanaketoava kamutalavualavo aivelulunapeledi we aiyatodi muloina matakwanineye.”

³⁷ “Gilili waineye Deibida kaisena Mesaia iqoleni Tomwaya beqa banikodiqa, nigo Mesaia Kini Deibida tubuleleleqina?” We yoko bwaigina medimwasana Ieisu ievaneneqeni.

Ieisu loina kanatovekaivevenavo paipaidi ivesipupu

³⁸ We Ieisu navekaivevena waineye ivonedi ivo, “Kwavekisabodebodemi loina kanatovekaivevenavo waidie, gumanidiavo wayaqidi kaleko kaniakwanidi inakwesenidi, wayaqidi tomo'otoqa inavekimatanedi kabavegimwane waidie.

³⁹ Wete wayaqidi kabamia giamaidi tomo'otoqa matadie inamialagalaga sinagogi naqedie, wete wayaqidi kani bwaigidi waidie matadie inamiabui tomwatomwayavo taiauda.

⁴⁰ Gumanidiavo kwabukwabulavo inakatupwaiedi divanuqa inakwayedi, wete divelaukui ilaukaniakwanidi tomo'otoqa inakisedi inavo tomo'otoqa giamaidi. We kamukabeida tomo'otoqanidiavo kadikaimatavuloqa bwaigiotoqina Yaubada inaveledi!”

Kwabula dikalaqeimaimaiqa

⁴¹ Temupolo malewina waineye, Ieisu mane kabayato tamo vivineye imiabui tomo'otoqa ietonovidi, we dimane iyatoyato. Tomo'otoqa guyoguyodi puedi dimane bwaigidi iyatoyatodi.

⁴² Matautauda kwabula yomuyomudi imai, dimane mesaida toea bweubweudi kailuqa idodoqidi kabayato waineye.

⁴³ Ieisu kanatovemulivo iqolekauqidi waidie ivesipupu ivo, “Avonemi mwaqitana, dede kwabulanidi yomuyomudi dikalaqeimaimaiqa isaki, matautauda tupwaidiavo.

⁴⁴ Paina tupwaidiavo iyato we diyatobala bwaigidi imiamia, we gumanidi yomuyomudi vakai dimia paipaina gunabeida iyatosaweni.”