Malika 11 - Maiadomu

Ieisu ilugu Ielusalema mesaida Kini

¹ Tutuyanina itauya inaqonaqo Ielusalema vivineye, saiqanaqa inalekwa Bedipegi wete Bedani waidie Koya Olibe waineye Ieisu kanatovemulivo kadikailuqa ivetunedi inagumeta

² we ivonedi ivo, “Kwanaqo taoni matadeye. Tutuyanina kwailekwa kwailugu, doniki natuvauna kwaikiseni no waineye italaipweni, ge tamo aitoi idadodoqatovoni, kwayavuya kwamaieni waigue.

³ Kago aitoi inavelautoliemi inavo, ‘Uvale, kwayavuyavuya?’ Komi kwanavo, ‘Tomwaya wayaqina inavelituqeni tutuya kalakusana wete inavevilai.”

⁴ Itauya inaqo ilekwa ikiseni doniki tamo tomoqo navanuqa kawana kanakoqala waineye masikeda waineye ilaipweni. We tutuyanina ivelamu iqeuqeuya

⁵ tomo'otoqa tupwaidiavo itovotovoi ivelautoliedi, “Uvale doniki kwayavuyavuya?”

⁶ Ibaivila waidie mesaida Ieisu ivona waidie beqa tomo'otoqa itagwanedi doniki ikewai inaweni.

⁷ Tutuyanina doniki imaieni Ieisu waineye, kadikalekoeqa doniki dumwena iesoi, we Ieisu imialaga doniki dumweneye.

⁸ Tomo'otoqa puedi kadikalekoeqa keda iesoi, we tupwaidiavo welavi ibaidi melugulugudi beqa keda iesoi.

⁹ Medimwasana igumegumeta wete iemuli we iekalabwau, “Osana! Yaubada ivonavenapwayewemu! Iave kanawavaqaeqa kumai.

¹⁰ Kadidigemu tubuma Deibida tubuleleleqina waineye kumaimai kima kiloinema! Kadidigemu Yaubada abama tabwaotoqineye!”

¹¹ Ieisu ilugu Ielusalema inaqo Temupolo waineye. We ikisalelele saku puedi ikisedi. Matautauda gunabeida ilavia, itauya inaqo Bedani taoni waineye we kanatovemulivo kadikuma 12 taiauda.

Ieisu modaba iyaqaia

¹² Ikawananaqai kawakawaie Bedani ikiaweni ivila inaqonaqo Ielusalema waineye Ieisu ilase.

¹³ Kanikie'eqa ikisanaqo modaba ikiseni meluguna, beqa inaqo ikisavetovetonovi, nigo mevuana. We inaqo waineye ikiseni lugukavana, paina modaba ge ditutuya vuaqa.

¹⁴ Beqa Ieisu modaba ivoneni ivo, “Ge tamo aitoi wete vuamueqa inakani.” We kanatovemulivo ievaneneqeni.

Ieisu ilugu Temupolo naqeneye togimwane wete tovegimwane ikwavinedi

¹⁵ We ilekwa Ielusalema Ieisu ilugu Temupolo malewina waineye ivelamu togimwane wete tovegimwane ikwavinedi. Mane kaditosivedavedamana disomala, wete bunetutu kaditovegimwane dikabamiabui itutuyuaidi.

¹⁶ We ge idatagwanedi tamo aitoi nasaku inakavaladi inayoqodaba inalugu Temupolo malewina waineye inasauyedi vikaineye.

¹⁷ Matautauda ivekaivevena waidie ivo, “Mwaqitana kwayagovi? Buki Maqemaqetana naqeneye igililia Yaubada ivo, “ ‘Gu Temupolo inaqoleni vanuqa kabavelaukui tomo'otoqa paipaidi kabaloina matatabuna waidie.’ We komi gunabeida kwasivilai deqoina mesaida tovainaqo dikabavaigavu.”

¹⁸ Beqa tovelomuvo bwaigidi wete loina kanatovekaivevenavo inoqai ivelamu kedakeda ilalauala wayaqidi Ieisu inaluvewapai. We igololoyeni paina tomo'otoqa puedi nuadi ivilele navekaivevenaeqa.

¹⁹ We gunabeida vanuqa ilavia Ieisu mekanatovemulivo Ielusalema ikiaweni.

Modaba ibwavu

²⁰ We ikawananaqai kawakawaie ivila inaqonaqo Ielusalema. Tutuyanina kedeye inaqonaqo, modaba ikiseni base Ieisu iyaqaia ibwavu tabwaneye'eqa iobu lamuneye.

²¹ We Pita inuani vakai isauyeni beqa ivesipupu Ieisu waineye ivo, “Tovekaivevena kukiseni! Modabanina base kuyaqaia gunabeida ibwavu.”

²² We Ieisu ivesipupu waidie ivo, “Kwavetumaqana Yaubada waineye.

²³ Avona-mwaqitana waimie, aitoi koya dede inavoneni inavo, ‘Kutovoi kuobu ligwagweye,’ we ge menavenuanaluqa nuapouneye, menavetumaqana vakai inavesipupuyeni kaia inasauyeni waineye.

²⁴ Beqa dede paipaina avonemi: Kago vakai paipaina kwaivelaukui, kwaivetumaqana gunabeida kwababaneni, matautauda waimie Yaubada inakalaqeieni vakai kwaivelaukuieni paipaina.

^25-26 We kago kwaitovoi kwaivelaukui, vakai kapoidi emiavo ivalabubunidi waimie we kamikapoka inaoqala, kwainuataqonidi, matautauda Tamami abame mikapoina inanuataqonidi.”

Velautoli Ieisu naveluluna paipaina

²⁷ Ieisu mekanatovemulivo ivila-vaituqana Ielusalema. Tutuyanina Ieisu inaqo ilugu Temupolo malewina waineye isasasala tovelomuvo bwaigidi, loina kanatovekaivevenavo wete tomoqovo bwaigidi imai Ieisu waineye.

²⁸ Ivelautolieni ivo, “Vakai loina naveluluna beqa togimwane wete tovegimwane kukwavinedi iluguaqeta Temupolo navikaie? Aitoi veluluna ivelemu mesaida kuvavalabubunedi?”

²⁹ We Ieisu ibaivila ivo, “Velautoli tamo aivelautoliemi kwaibaivila waigue, matautauda aivonemi aitoi loina wete veluluna ivelegu dede mesaida avavalabubunedi.

³⁰ Kwavonegu, Ioni naveluluna aitoi iveleni tomo'otoqa ibabitaisodi. Banikodiqa, Yaubada waineye'eqa o tomo'otoqa waidie'eqa?”

³¹ Beqa ivelamu kaisekavadi ielautoliedi ivo, “Kago tanavo, ‘Yaubada veluluna iveleni,’ we inavo, ‘Uvale Ioni ge kwadavetumaqaneni?’

³² We kago tanavo, ‘Tomo'otoqa waidie,’ we tomo'otoqa inanigeda.” Paina tomo'otoqa puedi iyagovi Ioni gumanina palopita, beqa igololo tomo'otoqa waidie.

³³ Beqa Ieisu waineye ibaivila ivo, “Kima ge kadayagovi.” Ieisu ivonedi ivo, “Yau mesaida, ge aivonemi aitoi veluluna wete loina ivelegu mesaida avavalabubunedi.”