Malika 10 - Maiadomu

Ieisu iekaivevena ve'iobu paipaina

¹ Ieisu Kapeneumi taoni ikiaweni inaqo Iudia Polovinisi waineye Bwasi Iolidani idamani bolimana (isiti) waineye. We yoko puedi imai waineye iekaivevena waidie mesaida tutuya puena ivavalabubunedi.

² We Palisivo wayaqidi inavekautovoni beqa imai waineye ivelautolieni ivo, “Daloina ikenokeno banikodiqa kanasala tomoqo mwanena inave'iobudi o gebuka?”

³ We ibaivila ivo, “Mosese loina ivelemi, banikodiqa ivesipupuyedi?”

⁴ We ivo, “Mosese naloina tomoqo itagwaneni lubulubu inagililia inavo, ‘Ave'iobumi. Kwatauya.’ We mwanena inaveledi. Mulineye inaveuqeuqedi inanaqo.”

⁵ We Ieisu ibaivila waidie ivo, “Komi debami pakalidi, beqa Mosese loina igililia paipaimi.

⁶ We kwanuani naqaida, tutuyanina Yaubada tomo'otoqa ivalabubunidi, ‘lamoqina wete vavinena ivalabubunidi.’

⁷ ‘Beqa tomoqovo tamadiavo inadiavo inabailedi memwanediavo inavemialuqedi,

⁸ we inavebunu tamoqana.’ Beqa no gumanidiavo ge kadikailuqa we kaia tamoqana.

⁹ We Yaubada ivemialuqedi, beqa ge tamo aitoi inavemiakedi.”

¹⁰ Mulineye ivila vanuqe, Ieisu kanatovemulivo ivelautolieni dede vonanina paipaina.

¹¹ We ibaivila waidie ivo, “Kago tomoqo mwanena inasailedi tamo vavine sulidi inanaqidi, we gunabeida gimala inavalabubuni.

¹² No mesaida, kago vavine mwanedi inabaileni tamo tomoqo sulina inanaqia, no vavinenidi wete gimala inavalabubuni.”

Ieisu wete gwagwama gibwaigidi

¹³ We tupwaidiavo tomo'otoqa gwagwama imaiedi Ieisu waineye wayaqidi dimana inayatoi waidie wete inavonavenapwayewedi, we kanatovemulivo iyaqaidi.

¹⁴ Ieisu ikisedi kanakapoka ioqala kanatovemulivo ivonedi ivo, “Yaubada Nakabaloina gumanidiavo mesaida dede gwagwamanidiavo paipaidi, beqa gwagwama ge kwaiketobodedi, kwatagwanedi inamai waigue.

¹⁵ Yau avona-mwaqitana, kago tomo'otoqa tamoqana ge inamwasana wete ge inatagwana Yaubada Nakabaloina mesaida gwagwamanidiavo itagwatagwanedi, beqa ge kanasala Yaubada Nakabaloina waineye inalugu.”

¹⁶ Matautauda gwagwama ikewadi kabikabineye ivemiabuidi, dimana waidie iyatodi ivelaukui Yaubada waineye gwagwamanidiavo ivonavenapwayewedi.

Tomoqo guyoguyona Ieisu ivelautolieni yawaina vaqata paipaina

¹⁷ We tutuyanina Ieisu itauya inaqonaqo kedeye, tamo tomoqo ilaukwavina waineye tutuqana iveketonokuyedi ivelautolieni ivo, “Tovekaivevena Giamaimu, vakai aivalabubuni yawaina vaqata aibabaneni?”

¹⁸ We Ieisu ivo, “Uvale kuqolegu giamaina? Ge tamo aitoi giamaiotoqina, kaia Yaubada kaisena giamaiotoqina.

¹⁹ Muvelautoli kanabaivila paipaina dede mesaida, gunabeida Yaubada naloinavo kuyagovidi: ‘Ge kiluvewapa, ge kigimala, ge kivainaqo, ge tomo'otoqa vonakatupoe'eqa kivemwauya, ge tomo'otoqa kikatupwaiedi disaku kikwayedi, wete tamamu inamu kivekimatanedi.”

²⁰ We ivesipupu waineye ivo, “Tovekaivevena, gututuya gwamana waineye'eqa kanaketoava deqoina dede loinanidiavo avemuliedi.”

²¹ We Ieisu ietonovi ivenapwayeweni waineye ivesipupu ivo, “Valabubuna tamoqana ge kudavalabubuni. Kunaqo muvanuqe, musaku puepuena kivegimwaneyedi, manena kikalaqeiedi yomuyomudi waidie, matautauda kawaie abame Yaubada kamubaivila inavelemu. Mulineye, kimai kivemuliegu.”

²² Tomoqonina guyoguyo'otoqina ge wayaqina nasakuvo puedi inavegimwaneyedi wete inakalaqeiedi, beqa tutuyanina vona inoqai menanuakapo ivila inaqo.

²³ Matautauda Ieisu ikisalelele ivesipupu kanatovemulivo waidie ivo, “Mwaqitana, gumanidiavo disakuvo boudi mwau'otoqina waidie Yaubada Nakabaloina kanalugu paipaina.”

²⁴ We kanatovemulivo nuadi ivilele navona beqa. Wete Ieisu ivesipupu-vaituqana waidie ivo, “Natugwavo, dede mwau'otoqina Yaubada Nakabaloina kanalugu paipaina.

²⁵ Banikodiqa, kaisaya bwaigina kanawavaqa kameli kanasala yaima matana siaina waineye inalugu o gebuka? Wete mwaqitana, mesaida tomoqo guyoguyona Yaubada Nakabaloina waineye ge kanasala inalugu.”

²⁶ We nuadi ivilele-otoqa kaisekavadi ivesipupu ivo, “Aiaa! Kago dede mesaida, ge tamo aitoi ketoyavu inababaneni!”

²⁷ Ieisu ietonovidi ivesipupu ivo, “Tomo'otoqa ge kanasala taunidi inaketoyavudi, we Yaubada kanasala vakai puepuena inavalabubuni, wete Yaubada kanasala inaketoyavudi.”

²⁸ Beqa Pita ivesipupu waineye ivo, “Kima banikodiqa? Gunabeida vakai puena kabailedi, we kavemuliemu.”

²⁹ We ivonedi ivo, “Avona-mwaqitana waimie, kago aitoi navanuqa, tainavo, novunavo, inana, tamana, natunavo o napwayapwaya inabailedi matautauda inamai inavemuliegu, we Valea Giamaina inavesipupuyeni tupwaidiavo tomo'otoqa waidie,

³⁰ we yawaina waineye Yaubada inabaivilai, wete kanabaivilanina tabwaneye inayatoi inakavesulaia, beqa navanuqavo, tainavo, novunavo, inanavo, natunavo we napwayapwayavo inababanedi. We tomoqonina veviqa inababaneni wete inabaileni, we kamukabei yawaina vaqata inababaneni ge menakakava.

³¹ We tomo'otoqa puedi gumanidiavo deqoina igumegumeta tutuya imaimai inavemuli-otoqa, wete tomo'otoqa puedi gumanidiavo deqoina iemuli-otoqa tutuya imaimai inagumeta.”

Ieisu ivesipupu kanavetonu nawapa paipaina

³² We gunabeida itauya kedeye inaqonaqo inalaga Ielusalema, we Ieisu igumegumeta. We kanatovemulivo nuadi ivilele, we wete tomo'otoqa mulineye inaqonaqo igololo. We Ieisu kanatovemulivo kadikuma 12 iqoledi imai waineye, waidie ivesipupu-vaituqana vakai puena paipaidi, kamukabeida inasauyedi waineye Ielusalema naqeneye.

³³ Ivesipupu ivo, “Kwavevaneneqa, kida gunabeida kedeye tanaqonaqo Ielusalema. Noko waineye, Yau Mwaqitana Kanatomoqo, kagutoketoqiluva inaketoqiluvegu tovelomuvo bwaigidi wete loina kanatovekaivevenavo waidie. Diloina inavalabubuni guwapa paipaina, we inakalaqeiegu Denitali waidie.

³⁴ Gumanidiavo inasaidibiegu wete inagiwaligu kabakaipitala beqa inanigegu inaluvewapagu. We kaiata kanavetonu waineye wapaeqa aitovoi-vaituqana.”

Iemesa wete Ioni divelaukui

³⁵ Matautauda Iemesa wete Ioni, Sebedi natunavo imai Ieisu waineye ivesipupu ivo, “Tovekaivevena, vakai kaivelaukuieni waimue wayaqima komu kivalabubuni paipaima.”

³⁶ We ivelautoliedi ivo, “Vakai wayaqimi aivalabubuni?”

³⁷ We ibaivila ivo, “Mututuya kimiabui mukabaloina mata'udu'udulina waineye tomo'otoqa waidie kiloina kanasala kitagwanema manawamue kaimiabui, tamo kamukataqie we tamo kamukelie, taiauda tailoina.”

³⁸ We Ieisu ivonedi ivo, “Komi vakai kwaelaukuieni ge kwadayagovi. Komi kamisala veviqa vedina beqa aiyemu wete beqa kwaiyemu? Wete babitaisonina waineye aibabitaiso beqa kwaibabitaiso?”

³⁹ We ivesipupu waineye ivo, “Kima kamasala.” We waidie ivesipupu ivo, “Komi kawaie vedinina aiyemu beqa komi kwaiyemu, wete kabababitaisonina beqa aibabitaiso beqa kwaibabitaiso.

⁴⁰ We Yau ge kagusala aivesinua aitoi taiauda kailoina, inamiabui kagukataqie wete kagukelie. Noko kabamiabuinidiavo Yaubada inakalaqeiedi gumanidiavo ivesinuedi waidie.”

⁴¹ Tutuyanina waineye tovemulivo kadikuma 10 inoqai Iemesa wete Ioni divelaukui paipaina kadikapoka ioqala waidie.

⁴² Beqa Ieisu kanatovemulivo iqoledi imai waineye ivesipupu waidie ivo, “Gunabeida kwayagovi toloinavo bwaigidi wete tokedagumetavo diloina veluvelulunidi beqa tomo'otoqa iloloinedi.

⁴³ Beqa komi ge kwaivetutuyamedi. Kago aitoi wayaqina kanawavaqa inavebwaiga, gumanina inavetolituqa enavo paipaidi.

⁴⁴ We kago wayaqimu kivetogumeta komu kivetolituqa tomo'otoqa matatabudi paipaidi.

⁴⁵ Paina Yau Mwaqitana Kanatomoqo amai ge wayaqigu tomo'otoqa paipaigu inalituqa. Amai tomo'otoqa paipaidi ailituqa, we wayaqigu aiwapa kaniqodadaqa aikewai tomo'otoqa puepuedi paipaidi, we aitakonadi aiviledi.”

Ieisu Batimio matana ikavegiagiamaia

⁴⁶ Gunabeida Ieisu mekanatovemulivo ilekwa Ieliko waineye. Mulineye Ieliko ikiaweni inaqonaqo, yoko bwaigina italakwavinidi. Tamo tomoqo matana pwalupwaluna kanawavaqa Batimio, Timio natuna, kedeye imiabui ielaukui mane paipaina.

⁴⁷ Tutuyanina inoqai tomo'otoqa iesipupu ivo, “Ieisu Nasaletaeqa imaimai.” We itoge iveqole ivo, “Ieisu Deibida tubuna, kudavenua'ina'inaqeyegu.”

⁴⁸ Tomo'otoqa puedi iyaqaia ivo, “Kuvekwada!” We kaia ieqolemo bonana bwaiginaeqa ivo, “Deibida tubuna, kudavenua'ina'inaqeyegu!”

⁴⁹ We Ieisu inaqonaqo ivekwada tomo'otoqa ivonedi ivo, “Kwaqoleni inamai dede waineye.” Beqa iqoleni tomoqonina matana pwalupwaluna ivo, “Kutovoi, kumwasana, Ieisu iveqole paipaimu.”

⁵⁰ We itovoi memasona kanatalauma isitakia iyatoi we imai Ieisu waineye.

⁵¹ Ieisu ivoneni ivo, “Vakai wayaqimu aivalabubuni waimue?” Ivo, “Tovekaivevena, wayaqigu matagu inavegiagiamai.”

⁵² Ieisu ivo, “Kunaqo, muvetumaqanaeqa kuvegiagiamai.” We vedimadimanaeqa matana ivegiagiamai kedeye Ieisu ivemulieni.