Malika 1 - Maiadomu

Ioni Tobabitaiso Ieisu nakeda isivetovetonovi

¹ Valea Giamaina dede Ieisu Mesaia Yaubada Natuna paipaina. Nakabavelamu topalimatamatana imai tomo'otoqa inavonedi inavalabubuna.

² Base Yaubada napalopita Aisea igililia Yaubada ivesipupu ivo, “Aivonemu, naqaida gutopalimatamatana aivetuneni inagumeta mukenao inavusia.

³ Pwayapwayamaiqe topalimatamatananina bonana bwaiginaeqa ieqoleqole ivo, ‘Iave nakeda kwavusia, nakabatauya kwaisivetonovidi.”

⁴ Beqa Ioni topalimatamatananina imai pwayapwayamaiqe tomo'otoqa ibabitaisodi wete Yaubada valeana tomo'otoqa waidie ilalauguguyeni ivo, “Mikapoinaeqa kwainuavila, we Yaubada mikapoina inanuataqonidi. We aibabitaisomi minuavila kanakiakiaya, paina gunabeida mikapoinaeqa kwainuavila.”

⁵ Beqa tomo'otoqa matatabudi imiamia Iudia Polovinisi naqeneye wete Ielusalema taoni naqeneye isauyedi inaqo Ioni inavevaneneqeni. Tutuyanina dikapoina ivesipupuyedi, Ioni ibabitaisodi Bwasi Iolidani waineye.

⁶ We Ioni kaleko mwesimwesiana ikweseni kaisaya kanawavaqa kameli vutuvutunaeqa iyoqonidi, we kanawakila talobwana waineye ivewakileni kaisaya bununaeqa ivalabubunidi. Tutuya puena limwana wete maikawa ikanikani.

⁷ We tutuya puena tomo'otoqa ivonevonedi ivo, “Muligue tamo tomoqo imaimai. Gumanina veluvelulunaotoqina matautauda Yau, beqa Yau ge kagusala kanakaqeyapayapa kanabulava aisobwanu aiqeuya.

⁸ Yau amaiqa bwasieqa aibabitaisomi, we gumanina muligue imaimaiqa Vaitabu Maqemaqetanaeqa inababitaisomi.”

Ioni Ieisu ibabitaisoi

⁹ No tutuyanina waineye, Ieisu itauya Nasaletaeqa Galili Polovinisi naqeneye inaqo Ioni waineye, we Bwasi Iolidani waineye, Ioni Ieisu ibabitaisoi.

¹⁰ We tutuyanina bwasieqa ipoia, ikisalaga abame. Abama ikawapiai, we Yaubada Vaitabuna ikiseni kanakisa mesaida malasi iobuma waineye ilugu.

¹¹ We abame'eqa Yaubada bonana isauyeni ivo, “Komu, Natugu nuapougu. Avenapwayewemu, wete amwasanemu bwaigina.”

Seitani Ieisu ivekautovoni

¹² Yaubada ivoneni ikakava, we no waineye vedimadimanaeqa Yaubada Vaitabuna Ieisu ivetuneni inaqo pwayapwayamaiqe.

¹³ Noko waineye kaiata 40 naqedie pwayapwayamaiqe imiamia, we Seitani iekautovoni wayaqina kapoina waineye inayatoi. Pwayapwayamaiqe imiamia kaisaya walawalakai gamwadie, we mulineye Yaubada na'anelose abame'eqa imai ikisavekavini.

Tovuata kadikumapuli Ieisu iqoledi

¹⁴ No tutuyanina waineye Kini Elodi gunabeida Ioni Tobabitaiso deli waineye iginoleni, matautauda Ieisu inaqo Galili waineye tomo'otoqa waidie Yaubada valeana ilalauguguyeni.

¹⁵ No waineye iesipupu ivo, “Tutuya gunabeida imai. Yaubada nakeda kaivauna natomo'otoqa kadiloina paipaidi saiqanaqa inasauyeni. Mikapoinaeqa kwainuavila, we Valea Giamaina kwavetumaqaneni.”

¹⁶ We tamo kaiata waineye Waya Galili kwadeweye ilalauvasana tovuata kadikailuqa ikisedi, Saimoni metaina Anidulu divuataeqa iyayaubani waya waineye.

¹⁷ Ikisedi iveqole waidie ivo, “Kwamai kwavemuliegu. Mesaida dede iqana kwakonakonadiqa, we Yau aivevemi banikodiqa tomo'otoqa kwaikonadi kwaimaiedi waigue inavetumaqanegu.”

¹⁸ No waineye vedimadimanaeqa divuata ibailedi ivemulieni.

¹⁹ We saiqanaqa iveqanaqo Ieisu Sebedi menatunavo Iemesa, Ioni ikisedi divuata kawalabukina iyaluyalumi diwaga waineye.

²⁰ We Ieisu iveqole waidie ivo, “Kwamai. Kwavemuliegu.” Beqa tamadi menatolituqavo wageye ikiawedi, we ivemulieni.

Ieisu vaitabu kapoina tomoqo waineye'eqa iveuqeuqeni

²¹ We tutuyanina ilekwa tamo taoni kanawavaqa Kapeneumi waineye, no Kaiata Kabaveyawai waineye Ieisu ilugu sinagogi naqeneye iekaivevena Yaubada valeana tomo'otoqa waidie.

²² 12 Taunina navelulunaeqa iekaivevena, we ge mesaida loina kaditovekaivevenavo iekaivevena beqa tomo'otoqa nuadi ivilele bwaigina.

²³ We tutuyanina sinagogi naqeneye iekaivevena, we tomoqo vaitabu kapoina iekuniqeni iveqole bonana bwaiginaeqa

²⁴ ivo, “Ieisu tomoqo Nasaleta, uvale kumai waimeye? Banikodiqa, kumai dede waineye kileoma? Ayagovimu komu Mesaia Yaubada waineye'eqa kumai.”

²⁵ We Ieisu iloineni ivo, “Kuvekwada! Tomoqo waineye'eqa kusauyemu.”

²⁶ Matautauda vaitabu kapoina ibwau bonana bwaiginaeqa tomoqonina ivelaudididiqa we vaitabu kapoina tomoqo waineye isauyeni.

²⁷ Tutuyanina isauyeni tomo'otoqa puedi nuadi ivilele kaisedi waidie iesipupu ivo, “Dede vakai? Dede vekaivevena kaivauna wete menaveluluna. We tomoqonina menaveluluna vaitabu kapoidi iloinedi naloina ivematamataneni.”

²⁸ We vedimadimanaeqa Ieisu valeana ivebwaiga isapayavula Galili Polovinisi matatabuna waineye.

Ieisu tomo'otoqa puedi ikavegiagiamaidi

²⁹ We vedimadimanaeqa Ieisu mekanatovemulivo sinagogi ikiaweni inaqo Saimoni metaina Anidulu divanuqe Iemesa, Ioni ikweyabudi.

³⁰ Tutuyanina waineye Saimoni lawana mokamokaidi vovodi iveyauyauta iviqa kadikivi waineye ikenokeno, no waineye Ieisu ivoneni paipaidi.

³¹ Beqa inaqo ilugu waidie dimadie ikavikavina isivetovoidi. Vedimadimanaeqa vovodi yauyauta ikakava matautauda kadi isiobu ikani.

³² We tutuyanina lavilavie, valavala iketoniveni tomo'otoqa ditoviqavo wete gumanidiavo vaitabu kapoidi iekuniqedi ikewadi imaiedi Ieisu waineye.

³³ We tomo'otoqa puedi taoni waineye isikauqidi vanuqa mataneye.

³⁴ Vanuqa mataneye Ieisu tomo'otoqa puedi kadiviqa sulidi, sulidi ikavegiagiamaidi wete mesaida gumanidiavo vaitabu kapoina waidie iveuqeuqedi isauyedi. We vaitabu kapoidi iyagovi Ieisu gumanina Mesaia beqa ge idatagwanedi tamo vakai inavesipupuyedi.

Vikai Galili waineye Ieisu ilauguguya

³⁵ We matalovalovanineye Ieisu itovoi vanuqa ikiaweni inaqo kawalawamaiqe no waineye ielaukui Yaubada waineye.

³⁶ Mulineye Saimoni mekanakweyabuvo inaqo ilalaualeni.

³⁷ We ibabaneni ivoneni ivo, “Tomo'otoqa puedi ilalaualemu.”

³⁸ Ibaivila ivonedi ivo, “Kwamai tainaqo taoni tupwaidiavo sulidi vivideye waidie. Yaubada valeana ailauguguyeni tomo'otoqa waidie. Dede lamunanina amai.”

³⁹ Beqa Galili kanamatatabu waineye inaqo Yaubada valeana ilauguguyeni sinagogi naqedie wete vaitabu kapoidi tomo'otoqa waidie'eqa iveuqeuqedi isauyedi.

Ieisu tomoqo mekanaviqa lepelo ikavegiagiamaia

⁴⁰ Tamo kaiata tamo tomoqo mekanaviqa bununeye kanawavaqa lepelo imai Ieisu waineye manawaneye isobwanu ielaukui-vaituqana ivo, “Kago wayaqimu kigiavemaqetagu.”

⁴¹ We Ieisu tomoqo bonana inoqai nuana inaqei dimana isiketoi ikavikavini ivo, “Ee, Yau tagwatagwanigu. Kuvegiagiamai!”

⁴² We vedimadimanaeqa tomoqo bununeye lepelo ikakava ivegiagiamai-vaituqana.

⁴³ Wete Ieisu bonana veluveluluninaeqa ivoneni

⁴⁴ ivo, “Ge tamo aitoi kivoneni paipaigu, we kunaqo kuvekaivevenemu tovelomu waineye. Kaisaya kiveleni inavelomuyeni Iave waineye paipaimu, mesaida Mosese naloina tolepelo kadigiavemaqeta paipaina kiakiaya tomo'otoqa waidie gunabeida kuvegiagiamai.”

⁴⁵ We tomoqonina Ieisu ge idavekimataneni inaqo vikai puena waidie tomo'otoqa ivonevonedi, we valea isapayavuleni vikai puena waidie. Beqa Ieisu ge kanasala inanaqo taoni waidie tutuyanina tomo'otoqa ietonovi paina kago mesaida yoko bwaigina inamai. Beqa vikai bwaigidi ikiawedi inaqo kawalawamaiqe, we no waineye tutuya puena imiamia. We vikai puedi waidie'eqa kaditomo'otoqavo inaqo Ieisu waineye.