Luke 9 - Maiadomu

Ieisu kanatovemulivo kadikuma 12 ivetunedi

¹ Tamo tutuya Ieisu kanatovemulivo kadikuma 12 iqolekauqidi inaqo waineye, veluluna wete loina iveledi vaitabu kapoidi inakwavinedi wete toviqa inakavegiagiamaidi.

² Mulineye ivetunedi inalauguguya Yaubada Nakabaloina paipaina tomo'otoqa waidie wete toviqa inakavegiagiamaidi.

³ Ivemataluanidi ivo, “Ge tamo saku kwaikewai mitauyanina waineye—utoqana, yawana, kanikani, mane o kaleko kanaveluqa gebuka.

⁴ Vakai taoni waineye kwainaqo kago inamwasanemi, tamo tomoqo navanuqe taiauda kwaimiamia kanaketoava taoninina kwaikiaweni.

⁵ We kago kwaimai taoni waidie kaditomo'otoqa ge inamwasanemi wete bonami ge inanoqai, kwaikiawedi, we kamikaqeyapayapa kaupualina kwaitutuvutuqidi inaobu. Beqa no dikabakisa waidie inanuavila!”

⁶ Beqa tovemulivo itauya inaqo taoni siaidi matatabuna waidie ilalauguguya Valea Giamaina paipaina wete tomo'otoqa ikakavegiagiamaidi.

Kini Elodi nuana ivilele Ieisu paipaina

⁷ Kini Elodi, Galili Polovinisi kanatoloina, Ieisu nalituqa valeana inoqai nuana ivilele paina tupwaidiavo tomo'otoqa ivo, “Oge gumanina Ioni Tobabitaiso wapaeqa itovoi-vaituqana.”

⁸ We tupwaidiavo ivo, “Gumanina Ilaitia abame'eqa ivila imai,” wete tupwaidiavo ivo, “Tamo palopita basenaqaidaotoqa iwapa wete itovoi-vaituqana.”

⁹ We Elodi ivesipupu ivo, “Base tamo tutuya gunabeida tolauqavia avetuneni inaqo Ioni kodona igusuya we no aitoi tomoqo valeana anoqanoqai?” Beqa iekautovona banikodiqa inavalabubunedi Ieisu inakiseni.

Ieisu tomo'otoqa 5,000 ivekanidi

¹⁰ Tutuyanina Ieisu na'apositolovo 12 ivila imai, saku matatabuna ivalabubunidi paipaidi ivesipupu Ieisu waineye. Ivesipupu ikakava, mulineye kaisekavadi ikewadi inaqo Betisaida taoni waineye.

¹¹ We yoko bwaigina valeana inoqai vakaiebei inaqonaqo, beqa Ieisu italakwavini. Ieisu ivelavulavudi we ivesipupu waidie Yaubada Nakabaloina paipaina wete gumanidiavo iviqa ikavegiagiamaidi.

¹² Gunabeida lavilavie kanatovemulivo 12 imai Ieisu waineye ivoneni ivo, “Tomo'otoqa kuvetunedi inanaqo taunidi kadi inalauala gweda we taoni vivideye waidie wete no waineye inakeno, paina dede vikainina waineye ge tamo aitoi idamiamia.”

¹³ We Ieisu ivesipupu ivo, “Komi kaisemi kanikani kwaiveledi inakani.” We navona ibaivilai ivo, “Kima waimeye beledi dimanina wete iqana kailuqa. Banikodiqa wayaqimu kainaqo yoko paipaidi kanikani kaigimwane?”

¹⁴ No waineye tomoqovo kava kadiyoko 5,000, we vevine gwagwama taiauda ge idawawadi. Ieisu kanatovemulivo ivonedi ivo, “Tomo'otoqa kwaivonedi inamiabui, katuguguna tamoqana tamoqana tomo'otoqa 50 mesaida.”

¹⁵ Kanatovemulivo dede mesaida ivalabubunedi we inaqo tomo'otoqa ivemiabuidi.

¹⁶ We Ieisu beledi dimanina wete iqana kailuqa ikewadi ikisalaga abame paipaidi ivekaiwa Yaubada waineye matautauda igiatomwai kanatovemulivo iveledi tomo'otoqa isenedi.

¹⁷ Tomo'otoqa matatabudi ikani kadisala. Mulineye kanatovemulivo tomo'otoqa nigidi igwagwadi ginae kanayoko 12 iveadaqidi.

Pita ivesipupuyeni Ieisu gumanina Mesaia

¹⁸ Tamo tutuya Ieisu kaisena ielaukui Yaubada waineye, we no waineye kanatovemulivo taiauda ivelautoliedi ivo, “Banikodiqa, tomo'otoqa iesipupuyedi nigodibei Yau aitoi?”

¹⁹ We ibaivila ivo, “Tupwaidiavo tomo'otoqa iesipupu ivo, ‘Oge Ioni Tobabitaiso,’ tupwaidiavo iesipupu ivo, ‘Oge Yaubada napalopita Ilaitia gumanina basenaqaida imiamia,’ we tupwaidiavo iesipupu ivo, ‘Oge Yaubada napalopita basenaqaida imiamia iyawasa-vaituqana.”

²⁰ Matautauda ivelautoliedi ivo, “We komi, banikodiqa kwaesipupu nigodibei Yau aitoi?” Pita ibaivila ivo, “Komu Mesaia, Yaubada Kanavesivesinua.”

²¹ Beqa Ieisu kanatovemulivo iloina-pakaledi ivo, “Ge tamo aitoi kwaivoneni Yau Mesaia.

²² Yau Mwaqitana Kanatomoqo, aiveviqa bwaigina, matautauda Diu tomoqovo bwaigidi, tovelomuvo bwaigidi, wete Mosese naloina kanatovekaivevenavo inavedumwekaikaiegu. We kaguqaviavo inaluvewapagu, we kaiata kaitonu inakakava wapaeqa aitovoi-vaituqana.”

²³ Matautauda matatabudi ivonedi ivo, “Kago komi wayaqimi kwaivemuliegu, kaiata tamoqana tamoqana taunimi migiamaina kwaibailedi, we kamilaukenobalabala kwaikewai kwaikavalai matautauda kwaivemuliegu.

²⁴ Kago aitoi yawaina inavekokoleni ge wayaqina yawaina inatagwaneni paipaigu, yawaina vaqata inakaivuyovuyoi. We kago aitoi inavemuliegu wete yawaina inatagwaneni paipaigu, yawaina vaqata inababaneni.

²⁵ Kago aitoi saku puepuena giamaidi inakewadi pwayapwaya waineye, no sakunidiavo ge inakaivaiseni yawaina vaqata inakewai.

²⁶ Kago aitoi inavovomayamayaqegu wete guvekaivevena inavovomayamayaqedi, kawaie Yau Mwaqitana Kanatomoqo gumanina aivovomayamayaqeni tutuyanina megumaqeta mata'udu'udulinaeqa aivila aimai pwayapwaya dede waineye Tamagu mata'udu'udulinaeqa wete na'anelosevo maqemaqetadi taiauda.

²⁷ Yau avona-mwaqitana, tupwaimiavo dede waineye naqaida kwaikiseni Yaubada Nakabaloina, mulineye kwaiwapa.”

Yaubada Ieisu kanakisa isivilavilai

²⁸ Ieisu ivesipupu ikakava, kaiata kanave-8 waineye Pita, Ioni wete Iemesa ivonedi taiauda ilaga koya waineye kaisekavadi inavelaukui.

²⁹ Tutuyanina Ieisu ielaukui ivemaiqisivilavila kanakisa ivesuli wete kanakaleko itatala-otoqa we inamanamalidi.

³⁰ Vedimadimanaeqa tomoqovo kadikailuqa ilausimatala matadie Ieisu taiauda iesipupu. Tomoqovonidiavo Mosese wete Ilaitia, basenaqaidaotoqa Yaubada napalopitavo, kadikisa mata'udu'udulidi.

³¹ Divesipupunina waineye ivonavona Ieisu nawapa paipaina, kawaie Ielusalema waineye Yaubada nanuanuana kanamwaqitana inasauyeni.

³² Pita me'enavo ikenomataiva. Tutuyanina ikisa, Ieisu namaqeta mata'udu'udulina wete tomoqovo kadikailuqa taiauda itovotovoi ikisedi.

³³ Tomoqovonidiavo saiqanaqa inatauya, Pita ivesipupu ivo, “Tomwaya, kida dede waineye tamiamia giamaina. Kima ukweta kaitonu kaiyoqonidi, tamo komu, tamo Mosese wete tamo Ilaitia paipaimi.” Pita nuana ivilele ge idayagovi vakai ivesipupuyeni, beqa ivona-maimaiqa.

³⁴ Giladi iesipupu, waumana imai ivekaikwakudi, we tutuyanina iobuma itumudi, tovemulivo kadikaitonu igololo-otoqa paina waumana waineye ilugu.

³⁵ Yaubada bonana isauyeni waumana naqeneye'eqa ivo, “Dede Natugu gumanina avesinueni, beqa kwavevaneneqeni!”

³⁶ Tutuyanina Yaubada bonana ikakava, Ieisu ikiseni kaisena itovotovoi. No tutuyanina waineye tovemulivo ivekwada ge tamo aitoi waineye idavesipupu vakai ikiseni paipaina.

Ieisu vaitabu kapoina ikwavineni gwamana waineye'eqa

³⁷ Ikawananaqai tutuyanina Ieisu mekanatovemulivo kadikaitonu koyeye'eqa ivila iobuma, yoko bwaigina ibabanedi.

³⁸ Yoko waidie'eqa tamo tomoqo iveqole ivo, “Tovekaivevena, avelaukuiemu, natugu lamoqina kudavenua'ina'inaqeyeni wete kudakaivaiseni paina natugu kaiseotoqina.

³⁹ Basenaqaida vaitabu kapoina iluguya, tutuyanina iegadia ibwaubwau ietukoqa wete buebue kawaneye isasauyeni. Ge wayaqina natugu inabaileni iegadi-veboqieni ieviqa.

⁴⁰ Kamutovemulivo avelaukuiedi wayaqigu vaitabu kapoina inakwavineni inasauyeni, we ge kadisala.”

⁴¹ Ieisu tomo'otoqa ivonedi ivo, “Komi uvale ge kwadavetumaqanegu? Gunabeida tutuya kaniakwanina taiauda tamiamia! Tutuya kaivia akalamaqiqita paipaimi?” Ieisu gwamana tamana ivoneni ivo, “Natumu kumaieni waigue!”

⁴² Gwamananina inaqonaqo Ieisu waineye, vaitabu kapoina itutupoia ibeku iobu pwayepwayeye ietukoqa. Ieisu vaitabu kapoina iloineni isauyeni, we gwamana ivegiagiamai mulineye tamana iveleni.

^43a Tomo'otoqa matatabudi ikiseni, nuadi ivilele Yaubada naveluluna paipaina.

Ieisu ivesipupu-vaituqana nawapa paipaina

^43b Tomo'otoqa giladi nuadi ivilevilele saku matatabudi Ieisu ivalabubunidi paipaidi, we Ieisu kanatovemulivo ivonedi ivo,

⁴⁴ “Vakai aivonemi ge nuami inavulu. Kawaie Mwaqitana Kanatomoqo kaguqaviavo inaketoqiluvegu, inakalaqeiegu tomo'otoqa dimadie.”

⁴⁵ We tovemulivo navona ge idanuakawananaqaia. Kananuakawananaqai Yaubada ivaigavuyeni beqa ge kadisala inayagovi, we igololo ge idavelautolieni paipaina.

Apositolovo ediavo taiauda iekawadibidibi aitoi gumanina kanawavaqa bwaigina

⁴⁶ Tamo tutuya Ieisu kanatovemulivo kaisedi iekawadibidibi kadiyoko naqeneye aitoi gumanina kanawavaqa bwaigiotoqina.

⁴⁷ Ieisu gunabeida dinuanuana iyagovidi beqa tamo gwamana iqoleni inaqo vilaneye itovoi.

⁴⁸ Mulineye ivonedi ivo, “We aitoi gwamana dede mesaida inavonamwasamwasaneni kaguwavaqaeqa, wete Yau inavonamwasamwasanegu, we ge Yau kaisegu, wete gumanina ivetunegu inavonamwasamwasaneni. Aitoi kanawavaqa siaina wete ge vesivesinuana matamie, gumanina bwaigiotoqina Yaubada mataneye.”

⁴⁹ We Ioni ivesipupu Ieisu waineye ivo, “Tomwaya, kima tamo tomoqo kakiseni kamuwavaqaeqa vaitabu kapoidi ieuqeuqedi, we paina gumanina ge kadayoko, beqa kaketobodeni kavoneni kavo, ‘Ge mesaida kivalabubunedi.”

⁵⁰ Ieisu ivo, “Tomoqo ge kwaiketobodeni. Aitoi gumanina ge kadatalavuala, gumanina kadayoko.”

Tamo Samelia kanataoni Ieisu ge idavonamwasamwasaneni

⁵¹ Gunabeida Ieisu natutuya ivekalakusa Yaubada inamaseagai inanaweni abame, nanuanuana iyatoi inanaqo Ielusalema, beqa itovoi mekanatovemulivo itauya.

⁵² Inaqonaqo kedeye, Ieisu tomo'otoqa tupwaidiavo ivonedi igumeta dikabaveyawai inavavalabubuni me Samelia ditaoni waineye.

⁵³ We tutuyanina tomo'otoqanidiavo ilekwa taoninina kanatomianavo iketobodedi ge wayaqidi Ieisu mekanatovemulivo inavonamwasamwasanedi inamiamia ditaoni waineye paina me Diu wete me Samelia ge taiauda idaeiaiana wete paina Ieisu inaqonaqo Ielusalema, me Diu ditaoni bwaigina waineye.

⁵⁴ Tutuyanina Iemesa wete Ioni tomo'otoqa diketoboda inoqai Ieisu ivoneni ivo, “Tomwaya, banikodiqa? Wayaqimu kaivona kaikalakalata abame'eqa inaobuma tomo'otoqa dede inakalakakavadi?”

⁵⁵ We Ieisu isivilai iyaqaidi.

⁵⁶ Mulineye itovoi inaqo tamo taoni waineye.

Tomo'otoqa kadikaitonu wayaqidi Ieisu inavemulieni

⁵⁷ Tutuyanina Ieisu mekanatovemulivo inaqonaqo kedeye tamo tomoqo ivesipupu Ieisu waineye ivo, “Yau gunabeida atagwanegu waimue, vakaiebei kinaqonaqo yau taiauda.”

⁵⁸ Ieisu tomoqonina navona ibaivilai ivo, “Kudanuani koukou walawalakai mekadiovu wete manuqa mekadiqiuva, we Mwaqitana Kanatomoqo ge tamo meguvanuqa waineye aikeno wete aiveyawai.”

⁵⁹ Wete Ieisu tamo tomoqo ivoneni ivo, “Kumai kuvemuliegu.” We tomoqonina ibaivila ivo, “Tomwaya, giamaina we naqaida kutagwanegu tamagu aitavuni mulineye aimai aivemuliemu.”

⁶⁰ Ieisu tomoqonina navona ibaivilai ivo, “Gumanidiavo vaitabudi wapadi, taunidi ditowapavo inatavutavunidi! We komu kinaqo kilauguguya Yaubada Nakabaloina paipaina tomo'otoqa waidie.”

⁶¹ Wete tamo tomoqo imai ivesipupu ivo, “Tomwaya wayaqigu aivemuliemu, we naqaida ainaqo gususuvo aikalanoaidi mulineye aimai aivemuliemu.”

⁶² We Ieisu tomoqonina ivoneni ivo, “Kago aitoi kuniqa inakavikavini we tutuya puena inakikisavilai, ge idalaubwaineni inalituqa Yaubada Nakabaloina paipaina.”