Luke 8 - Maiadomu

Vevine Ieisu ivemulieni

¹ Kaiata tupwaidiavo ikakava, mulineye Ieisu mekanatovemulivo 12 taiauda inaqo ivelauvivila taoni siaidi wete bwaigidi waidie Valea Giamaina Yaubada Nakabaloina paipaina tomo'otoqa waidie ilauguguyeni.

^2-3 Wete tupwaidiavo vevine taiauda inaqo base Ieisu vaitabu kapoidi iveuqeuqedi waidie'eqa, we tupwaidiavo kadiviqa ikavegiagiamaidi. Kadiwavaqavo dede mesaida: Meli vavine Magidala base Ieisu vaitabu kapoidi 7 iveuqeuqedi waidie'eqa, Ioana mwanedi Kusa gumanina Kini Elodi navanuqa kanatovekisabodaboda, Susana wete vevinenidiavo puedi. Vevinenidiavo dimane wete disaku beqa Ieisu mekanatovemulivo ikaivaisedi.

Vonawakedubala waipei tosapayavula paipaina

⁴ Tamo kaiata taoni puedi waidie'eqa tomo'otoqa yoko puedi iyoko imai Ieisu waineye. We vonawakedubalaeqa ivonedi ivo,

⁵ “Tamo tomoqo inaqo natanoqe nawiti waipei inabagulidi, we divalabubuna mesaida waipei isapayavuledi. Tutuyanina waipei isasapayavuledi, waipei tupwaidiavo ibeku iobu kedeye, we tomo'otoqa ibaqadi mulineye manuqa imai ikanidi.

⁶ Waipei tupwaidiavo ibeku iobu lasalasa waidie, we tutuyanina itabwa ilaga tabwadinidiavo siaidi imwatu paina pwayapwaya ge bwaigina wete bwasi ge idakenokeno.

⁷ We waipei tupwaidiavo ibeku iobu mosomoso mwalamwalaqidi waidie itabwa ilaga mosomoso mwalamwalaqidi itaula-vuyovuyoidi ge vuadi idayatodi.

⁸ We waipei tupwaidiavo ibeku iobu pwayapwaya giamaina waineye itabwa-giagiamai, beqa ivuaqa giamaiotoqidi mesaida 100.” We Ieisu ivonedi ivo, “Kago komi metaniqami, guvona kwainoqai vakai aesipupuyeni waimie.”

Vonawakedubala Ieisu igiavemaqetai

⁹ Mulineye Ieisu kanatovemulivo ivelautolieni ivo, “Vonawakedubala dede banikodiqa kananuakawananaqai?”

¹⁰ Ieisu ivonedi ivo, “Gunabeida Yaubada itagwanemi valea vavaigavudi kwayagovidi nakeda kaivauna natomo'otoqa kadiloina paipaidi, we tomo'otoqa tupwaidiavo vonawakedubalaeqa aesipupuyedi kavagi, “ ‘Inakisa-wayoqeni vakai Yau avalabubunidi, we ge inakisakinanadi. Guvalea inanoqaya-wayoqeni, we ge inanuakawananaqaia.”

¹¹ We Ieisu ivonedi ivo, “Guvonawakedubala kanayagova dede mesaida: Waipei mesaida Yaubada navona.

¹² Waipei ibeku iobu kedeye kananuanuana mesaida tomo'otoqa Yaubada navona inoqai, we Seitani imai vonanidiavo ikewayavuledi nuapoudieqa, beqa ge kadisala inavetumaqana we ketoyavu inababaneni.

¹³ We waipei ibeku iobu pwayapwaya lasalasana tabwaneye kananuanuana, mesaida tomo'otoqa Yaubada navona inanoqai medimwasana, we kwalamidi ge idaobu-otoqa wete ge inakalamaqiqita tutuya kaniakwanina. Tutuyanina waineye veviqa wete ketotovona inalekwa waidie paina Yaubada navona ietumaqaneni, vedimadimanaeqa divetumaqana inamwea we inabaileni.

¹⁴ Waipei ibeku iobu mosomoso mwalamwalaqidi waidie kananuanuana, mesaida tomo'otoqa Yaubada navona inoqai, we dimiana paipaina ienuapouviqa, wayaqiotoqidi mane wete tupwaidiavo saku. Sakunidiavo vonanidiavo ikaivuyovuyoidi, we ge idavuaqa.

¹⁵ Waipei tupwaidiavo ibeku iobu pwayapwaya giamaina waineye kananuanuana, mesaida tomo'otoqa Yaubada navona inoqai inuapwateni. Nuapoudi iveadaqidi nuanuana tonotonovidi wete giamaidi beqa. Ikalamaqiqita kanaketoava ivuaqa, we vuaqa giamaina.”

Vonawakedubala maqeta paipaina

¹⁶ Wete Ieisu ivesipupu ivo, “Ge tamo aitoi maqeta idagabugabuni nau beqa idatalapwateni o somala dibuneye idayatoi. We maqeta kabayato waineye iyatoyatoi kavagi tomo'otoqa inalugulugu vanuqanina waineye inamaqemaqetadi.

¹⁷ Vakai tomo'otoqa inavaigavuyedi nuapoudie, Yaubada inagiaveluguaqetedi kavagi tomo'otoqa matatabudi inayagovidi.

¹⁸ Beqa guvekaivevena kwaivevaneneqa-vekavekaieni. Eqavoi Yaubada navona inanuakawananaqaia, Yaubada diyagova inakavesulaia. We meqavoi ge idavevaneneqa-vekavekaieni, taunidi ivo, ‘Kima mayagova bwaigidi,’ yagovanina Yaubada inaelodi.”

Ieisu nasusuvo'otoqa

¹⁹ Ieisu inana wete tainavo imai wayaqidi inakiseni, we paina yoko bwaigina beqa ge kadisala inalugu.

²⁰ We tamo tomoqo Ieisu ivoneni ivo, “Inamu wete taimwavo maleweye itovotovoi wayaqidi inakisemu.”

²¹ Ieisu yoko ivonedi ivo, “Meqavoi Yaubada navona inoqai iematamatanidi, gumanidiavo inagwavo wete taigwavo.”

Ieisu yaqina wete kaiayava igiaveniwalovi

²² Tamo kaiata Ieisu kanatovemulivo ivonedi ivo, “Taidodoqa taibala Waya Galili vikaineye.” Beqa idodoqa wageye itupa ibala.

²³ Tutuyanina itupa idamadamana, Ieisu ikenomataiva. Vedimadimanaeqa yaqina bwaigina koyeye'eqa iobuma ivelamu inunuqa waya waineye wete kaiayava waga itutuvedovedodoqi saiqanaqa idaveadaqi idasalili wete idawapa.

²⁴ Beqa kanatovemulivo inaqo Ieisu ilauvaqoni ivo, “Tomwaya, Tomwaya, kida saiqanaqa taiwapa!” We Ieisu itovoi yaqina wete kaiayava bwaigidi iloinedi bonana veluveluluninaeqa. Beqa yaqina ivekwada, we kaiayava ikawataqoni iniwalova.

²⁵ Mulineye Ieisu kanatovemulivo ivelautoliedi ivo, “Uvale ge kwadavetumaqanegu?” We nuadi ivilele wete igololo-otoqa kaisekavadiqa iesipupu ivo, “Aitoi tomoqo dede? Menaveluluna yaqina wete kaiayava iloinedi ivekwada, we navona ivematamataneni.”

Ieisu vaitabu kapoidi iveuqeuqedi tomoqo waineye'eqa

²⁶ Ieisu mekanatovemulivo Galili Polovinisi waineye'eqa itupa ibala ilekwa Waya Galili vikaineye. No vikainina waineye me Gelasa divikai.

²⁷ Tutuyanina ilekwa Ieisu wageye'eqa iobu, vedimadimanaeqa tamo tomoqo vaitabu kapoidi iluguya ibabaneni, imai taoni waineye'eqa. Tutuya kaniakwanina tomoqonina kaleko ge idasisilagaidi o vanuqe idamiamia, we kayagwenegwenena ovu gamwadie imiamia.

^28-29 Tutuya puena vaitabu kapoina tomoqonina iekuniqeni. Beqa tomo'otoqa ikavikavini, bulava kainumu beqa dimana wete kaqena iyoqoyoqonidi imimiagamatai, we vaitabu kapoina navelulunaeqa seni isidabadi ideqeni inaweni imiamia kawalawamaiqe. Tutuyanina tomoqonina Ieisu ikiseni, ibwau manawaneye isobwanu. We Ieisu iloineni ivo, “Vaitabu kapoina tomoqo waineye'eqa kusauyemu!” We tomoqo iveqole bonana bwaiginaeqa ivo, “Ieisu, Yaubada Tabwaotoqineye Natuna! Vakai wayaqimu waigue? Avelaukuiemu ge kikaniqodadaqegu!”

³⁰ Ieisu ivelautolieni ivo, “Banikodiqa kamuavaqa?” Tomoqo ibaivila ivo, “Kaguwavaqa Ligioni.” Dede mesaida ivoneni paina vaitabu kapoidi pueotoqidi tomoqonina iluguya.

³¹ We vaitabu kapoidi ielaukui-vaituqana mediveluluna Ieisu waineye ivo, “Ge wayaqima kiloinema kaiobu-otoqa Ovu Vavaitomana vaitabu makabamia waineye.”

³² We koyeye bawe yoko bwaigina iduaduala, beqa vaitabu kapoidi Ieisu ivelaukuieni ivo, “Kutagwanema kainaqo bawe waidie kailugu,” we Ieisu itagwanedi.

³³ We vaitabu kapoidi tomoqo waineye'eqa isauyedi inaqo bawe waidie ilugu, we koya waineye'eqa bawenidiavo matatabudi ivelalaukwavina iobu bwaqale ivekalamonumonu waya naqeneye.

³⁴ Tutuyanina bawe kaditovekisabodabodanidiavo ikiseni dibawevo ivekalawapawapa, ideqa inaqo taoni bwaigidi wete taoni siaidi waidie vakai isauyeni ivesipupuyedi.

³⁵ No waineye tomo'otoqa puedi inaqo wayaqidi vakai isauyeni inakiseni. Tutuyanina imai Ieisu waineye, ikiseni tomoqonina base vaitabu kapoidi iluguyaqa gunabeida ivegiagiamai. Kanakaleko ikweseni imiamia, imiabui Ieisu kaqena vivineye, we nuana ikawananaqai, beqa tomo'otoqa matatabudi igololo.

³⁶ We bawe kaditovekisabodabodanidiavo Ieisu nalituqa ikiseniqa ivesipupuyeni tomo'otoqa waidie banikodiqa tomoqonina vaitabu kapoidi iluguya ikavegiagiamaia.

³⁷ Matautauda tomo'otoqa matatabudi Gelasa taoni navikai waineye ivekalagologololo-otoqa Ieisu ivelaukuieni divikai inakiaweni. Beqa Ieisu ivila wageye, idodoqa inadamana waya vikaineye.

³⁸ Tutuyanina Ieisu wageye idododoqa, tomoqonina vaitabu kapoidi waineye'eqa isauyeni Ieisu waineye ielaukui-veluveluluna ivo, “Kanasala taiauda tainaqo?” We Ieisu iketobodeni ivetuneni navanuqe ivo,

³⁹ “Gebuka, kuvila muvanuqe mususuvo kuvonedi vakai Yaubada ivalabubuni waimue paipaina.” Beqa tomoqonina inaqo taoni kanatomia matatabudi waidie ivesipupu Ieisu ikavegiagiamaia paipaina.

Iailo natuna wete tamo vavina Ieisu ikavegiagiamaidi

⁴⁰ Ieisu mekanatovemulivo ivila-vaituqana ibala waya vikaineye. Tutuyanina ilekwa, yoko ivonamwasamwasaneni paina ilalaugamaseni.

^41-42 We tamo tomoqo kanawavaqa Iailo, gumanina sinagogi kanatogumeta, imai menavekimatana isobwanu Ieisu kaqeneye ivelaukui-veluveluluna ivo, “Wayaqigu tainaqo guvanuqe natugu vavinena saiqanaqa inawapa kikavegiagiamaia. Natugunina kaiseotoqina kanadiqaba 12.” Beqa Ieisu taiauda inaqonaqo wete yoko bwaigina iemulieni iekaibibibineni, we Ieisu gamwaneye itautauya.

⁴³ Tamo vavina yokonina naqeneye vevine kadiviqa ikewadi, dayaqa iulaula diqaba 12 naqedie, we viqanina ge idakakava. Disaku wete digileu matatabuna ikalaqeiedi doketa waidie, we ge tamo aitoi kanasala idakavegiagiamaidi.

⁴⁴ Vavinenidi imai Ieisu mulineye kanakaleko gudina ikavikavini. Vedimadimanaeqa dayaqa iulaula isaya.

⁴⁵ Ieisu yoko ivelautoliedi ivo, “Aitoi ikavikavinigu?” Yoko matatabudi ivekewa, we Pita ivo, “Tomwaya, kukiseni tomo'otoqa puedi igamwemu iekaibibibinemu.”

⁴⁶ We Ieisu ivesipupu ivo, “Ayagovi tamo tomo'otoqa ikavikavinigu, paina kagulautovona alautovoni guveluluna tupwaidiavo isauyedi waigue'eqa.”

⁴⁷ Tutuyanina vavinenidi iyagovi ge kanasala divalabubuna inavaigavuyeni, beqa medigololo ielaudididiqa, we imai medivekimatana isobwanu Ieisu mataneye. We tomo'otoqa matatabudi matadie ivesipupu Ieisu waineye, vakai paipaina kanakaleko ikavikavini wete banikodiqa vedimadimanaeqa ivegiagiamai.

⁴⁸ Ieisu ivonedi ivo, “Natugu, kwavetumaqanegu beqa kwavegiagiamai. Beqa niwalovaeqa kwainaqo.”

⁴⁹ Tutuyanina Ieisu giladi iesipupu vavina waidie, tamo tomoqo imai Iailo navanuqe'eqa we ivoneni ivo, “Natumu vavinena gunabeida yawaina ikakava, beqa tovekaivevena ge kigiaveqauya.”

⁵⁰ We tutuyanina Ieisu inoqai vakai isauyeni, ivesipupu Iailo waineye ivo, “Ge kigololo kaia kivetumaqanegumo we natumu inavegiagiamai.”

⁵¹ Tutuyanina ilekwa vanuqe, Ieisu ge tamo aitoi idatagwaneni taiauda inalugu vanuqe, kaia Pita, Ioni, Iemesa wete gwamana tamana inana taiauda ilugu.

⁵² Vanuqanina naqeneye tomo'otoqa puedi iemoqai gwamananina paipaina, we Ieisu ivonedi ivo, “Ge kwaivemoqai! Gwamana ge idawapa ikenokeno.”

⁵³ We matatabudi Ieisu inamaqaoqeni paina iyagovi gwamana mwaqitana iwapa.

⁵⁴ Matautauda Ieisu gwamana dimaneye ikavekavina bonana bwaiginaeqa ivo, “Gwamana kutovoi!”

⁵⁵ We gwamana iyawasa-vaituqana vedimadimanaeqa itovoi! Ieisu ivonedi ivo, “Kanikani kwaiveleni inakani.”

⁵⁶ Gwamananina tamana wete inana nuadi ivilele, we Ieisu iloinedi ivo, “Vakai isauyeni ge tamo aitoi kwaivoneni.”