Luke 7 - Maiadomu

Tolauqaviavo kaditogumeta tamo natolituqa Ieisu ikavegiagiamaia

¹ Tutuyanina Ieisu sakunidiavo matatabuna ivesipupu-kakavedi yoko waidie, itovoi inaqo Kapeneumi taoni.

^2-3 Taoninina waineye tamo me Loma ditolauqaviavo kaditogumeta imiamia natolituqamaimaiqa taiauda. Tolituqanina viqa bwaigina ikewai saiqanaqa idawapa. We paina togumetanina natolituqa ivenapwayeweni bwaigina, beqa tutuyanina Ieisu valeana inoqai tupwaidiavo me Diu tomoqovo bwaigidi ivetunedi Ieisu inavelaukuieni inamai natolituqa inakavegiagiamaia.

⁴ Tutuyanina tomoqovonidiavo bwaigidi ilekwa Ieisu waineye ivelaukui-veluveluluna ivo, “Togumetanina tomoqo giamaina, we ilaubwainemu kudakaivaiseni.

⁵ Paina togumetanina kida me Diu ivenapwayeweda, beqa dasinagogi iyoqoni.”

⁶ Ieisu divona inoqai taiauda inaqo. Saiqanaqa inalekwa vanuqa vivineye, togumetanina enavo tupwaidiavo ivetunedi navona ivesipupuyeni Ieisu waineye ivo, “Tomwaya, ge taunimu kigiaveqaumu. Yau tomoqomaimaiqa beqa ge idalaubwainemu kilugu guvanuqe.

⁷ Wete paina yau ge tomoqo giamaigu no lamunanina ge wayaqigu aiwai waimue. Kaia kivonamo we gutolituqa inavegiagiamai.

⁸ Ayagovi komu memuloina beqa kanasala kikavegiagiamaia. Yau wete meguloina gutolauqaviavo waidie kanasala anavo, ‘Kunaqo,’ we inanaqo wete anavo, ‘Kumai,’ we inamai, wete gutolituqa waineye anavo, ‘Side gumanina kuvalabubuni,’ we inavalabubuni. Yau mesaida gutogumetavo diloina aematamatanidi. Beqa komu memuloina kaia kivonamo, we inavegiagiamai.”

⁹ Tutuyanina Ieisu togumetanina navona inoqai nuana ivilele, beqa itunuvilai yoko iemulieni waidie ivo, “Avonemi, yau ge tamo vetumaqana dede mesaida adakiseni Isileli kanamatatabu naqeneye.”

¹⁰ We tutuyanina enavo ivetunedi ivila inaqo togumetanina navanuqe, natolituqa ikiseni gunabeida ivegiagiamai.

Ieisu kwabula natudi wapaeqa isivetovoia

¹¹ Tutuya ge kaniakwanina, Ieisu mekanatovemulivo inaqo Neini taoni waineye, we yoko bwaigina ivemulieni taiauda inaqo.

¹² Tutuyanina Ieisu ilekwa taoninina kawana kabalugu waineye, ikisedi tomo'otoqa tupwaidiavo iadi iwapa ikavalai isasauyedi. Towapanina tamo kwabula natudi tubuauna kaiseotoqina, we yoko bwaigina taoninina waineye'eqa taiauda inaqonaqo.

¹³ Tutuyanina Tomwaya Ieisu kwabulanidi ikisedi nuana ikapo-otoqa ivenua'ina'inaqeyedi ivonedi ivo, “Ge kwaitaiqa.”

¹⁴ Matautauda Ieisu inaqo sevusevu ialatovoni, we tokavala itovoi. Ieisu ivona towapanina waineye ivo, “Tubuau! Avonemu kutovoi!”

¹⁵ Towapanina iyawasa-vaituqana imiabui ivelamu inavesipupu. Matautauda Ieisu tubuaunina ikewai wete ikalaqei-vaituqaneni inana waidie.

¹⁶ We matatabudi ivekalagologololo Yaubada ididigeni ivo, “Palopita bwaigiotoqina gunabeida isauyeni waideye.” We tupwaidiavo ivo, “Yaubada imai natomo'otoqa inakaivaiseda.”

¹⁷ We Ieisu naloina wete naveluluna valeana isapayavula inaqo Iudia napolovinisivo matatabudi waidie wete ivelauvivila vikai matatabuna waidie.

Ioni kanatovemulivo kadikailuqa ivetunedi Ieisu waineye

¹⁸ Ioni Tobabitaiso kanatovemulivo ivesipupu waineye vakai matatabudi Ieisu ivalabubunidi paipaidi. Beqa Ioni tovemuli kadikailuqa iqoledi.

¹⁹ We inaqo waineye ivo, “Kwanaqo da Tomwaya Ieisu waineye kwaivelautolieni kwanavo, ‘Banikodiqa, komu Mesaia gumanimu paipaimu kalalaugamasa o tomoqo sulina paipaina kalalaugamasa?”

²⁰ Tutuyanina Ioni kanatovemulivo kadikailuqa imai Ieisu waineye ivo, “Ioni Tobabitaiso ivetunema kamai kaivelautoliemu, ‘Banikodiqa, komu Mesaia gumanimu paipaimu kalalaugamasa o tamo tomoqo sulina paipaina kalalaugamasa?”

²¹ Tutuyanina waineye Ieisu toviqa puedi ikavegiagiamaidi kadiviqa sulidi sulidi waidie'eqa, gumanidiavo vaitabu kapoidi ilugudi iveuqeuqedi wete matadi pwalupwaludi puedi ivegiagiamai.

²² Beqa Ieisu Ioni kanatovemulivo ivonedi ivo, “Kwaivila kwainaqo Ioni waineye, vakai avalabubunidi kwakisedi wete kwanoqaidi paipaidi kwaivoneni, kwanavo, ‘Matapwalu ikisa, togemwaya itauya, tolepelo ivegiagiamai, taniqadi kuludi ikawabwegadi, towapa itovoi-vaituqana wapaeqa, wete alauguguya Valea Giamaina toveyomuyomu waidie.”

²³ Kwainaqo kwaivoneni kwanavo, “Yaubada ivonavenapwayewedi gumanidiavo ge idavenuanaluqa ivetumaqana waigue.”

²⁴ Tutuyanina Ioni kanatovemulivo itauya inaqo, Ieisu ivelamu iesipupu yoko waidie Ioni paipaina ivo, “Basenaqaida kwanaqo pwayapwayamaiqe Ioni waineye, vakai wayaqimi kwadakiseni? Banikodiqa, wayaqimi kwadakiseni tamo tomoqo mweamweana navalabubuna nuvana mesaida ivu'ivu yaqina siaina inanunuqa iepetoi? Gebuka.

²⁵ Kago gebuka, beqa kwanaqo vakai nigo kwadakiseni? Tamo tomoqo ivaiqavu kaleko giamaidi beqa? Gebuka. Tomo'otoqanidiavo no mesaida ivavaiqavuyedi dimia giamaiotoqina kaia divanuqa guyoguyodi waidie imiamia.

²⁶ Wayaqigu aiyagovi kwanaqo vakai kwakiseni? Tamo Yaubada napalopita? Ee mesaida, we tupwaidiavo palopita saiqadi, we dede palopitanina kwakiseni bwaigiotoqina.

²⁷ Paina basenaqaidaotoqa Yaubada napalopita igililia Ioni paipaina Yaubada ivesipupu ivo, “Aivonemu, naqaida gutopalimatamatana aivetuneni inagumeta mukenao inavusia.”

²⁸ “Wete aivonemi, tomiapwayapwaya gumegumetadi waidie'eqa kanaketoava deqoina ge tamo aitoi kanasala Ioni inayoqopeleni, gumanina bwaigiotoqina. We gumanidiavo kadiwavaqa siaidi Yaubada Nakabaloina naqeneye Ioni iyoqopeleni!”

²⁹ Tutuyanina tomo'otoqa matatabudi wete takisi kanatokewavo taiauda Ieisu navona inoqai, ikawamwaqitana Yaubada nanuanuana tonotonovidi paina base Ioni ibabitaisodi.

³⁰ We Palisivo wete loina kanatovekaivevenavo Yaubada nanuanuana paipaidi ivedumwekaikaieni paina base ge idatagwana Ioni inababitaisodi.

³¹ Beqa Ieisu ivonedi ivo, “Dede lagatanina waimie vakai waineye ailaukaipwata? Mivalabubuna banikodiqa mesaida? Beqa tamo kabakisa aivonemi nuami inakawananaqai.

³² Tomo'otoqanimiavo mesaida gwagwama kabamaketi waineye imiabui igogova ediavo waidie ibwadu ivo, “Emavo, lololi kayuveyuvei, we ge kwadasuya. We katataiqavonavona, we ge kwadavemoqai. Ge wayaqimi manuanuana kwaikawagiagiamaiedi.”

³³ Komi mesaida gwagwamanidiavo, ge wayaqimi Ioni Tobabitaiso wete yau mavalabubuna kwaikawagiagiamaiedi. Ioni ivekudiqana kanikani wete oine kanayemu waidie, beqa navelaukui inaveluluna Yaubada waineye. Gumanina tomoqo maqemaqetana, we komi kwavo, “Tomoqo noko vaitabu kapoina iluguya.”

³⁴ We Yau Mwaqitana Kanatomoqo amai ge adavekudiqana, akanikani wete ayemuyemu, we kwavo, “Kwakiseni tomoqo noko kawana tabewana nakani wete oine nayemu kapoina, takisi kanatokewavo wete tupwaidiavo tokapoina iveianedi.

³⁵ We meqavoi Yaubada nanuauya iematamataneni, navalabubuna waineye'eqa inaveveda nuauyanina tonotonovina wete giamaina.”

Tamo vavina Ieisu kaqena bunamaeqa i'iwaqi

³⁶ Tamo Palisi kanawavaqa Saimoni, Ieisu ivelaukuieni wayaqina taiauda inakani, beqa Ieisu inaqo navanuqe imiabui taiauda ikani.

³⁷ Taoninina waineye tamo vavina tokapoina imiamia. Valea inoqai Ieisu imai Saimoni navanuqe ikanikani, beqa bunama maqaina giamaina wete kanatutula bwaigina ikewai inaqo ilugu vanuqanina waineye. We bunamanina botolina gileu giamaina kanawavaqa alabasita beqa ivalabubuni.

³⁸ Ieisu vilanaeqa ikenokeno ikanikani, we vavinenina inaqo itovoi isobwanu kaqeneye itaitaiqa, we mataqeuna iyavuta kaqena ibutadi matautauda navakaunaeqa kaqena italakikilidi. Wete menavekimatana kaqena iyaoqidi bunama giamaina beqa kaqena i'iwaqidi.

³⁹ Tutuyanina Saimoni ikiseni nuanaeqa ivo, “Kago mwaqitana Yaubada napalopita kanasala idayagovi vakai vavina ialatovoni wete idayagovi gumanina tokapoina idakwavineni idanaqo.”

⁴⁰ Ieisu Saimoni ivoneni ivo, “Wayaqigu tamo saku aivonemu.” Saimoni ivo, “Tovekaivevena, kuvesipupu ainoqai.”

⁴¹ Ieisu ivo, “Tamo tomoqo guyoguyona tomo'otoqa kadikailuqa mane iveledi, we kawaie wete inatutulidi. Tamo tomoqo iveleni seluba 500 wete tamo iveleni seluba 50.

⁴² We kadikailuqa ge idatutulidi, beqa kadiloaga inuataqonidi ivo, ‘Kaiana ge kwaitutulidi.’ We kuvonegu kadikailuqa waidie'eqa aitoi tomoqo navenapwayewa bwaigiotoqina tomoqo guyoguyona waineye?”

⁴³ Saimoni Ieisu navona ibaivilai ivo, “Aiqodi, oge gumanina kanaloaga bwaigina kananuataqona ibabaneni.” Ieisu ivo, “Kaia kuvona-mwaqitana.”

⁴⁴ Matautauda Ieisu ikisavilai ikisanaqo vavine waineye, we Saimoni ivoneni ivo, “Vavina dede gunabeida kukiseni? We komu muvanuqe amai, ge bwasi kudavelegu kaqegue kaupuala adalegwadi davalabubuna mesaida, we vavina dede mataqeunaeqa kaqegu ibutadi wete navakaunaeqa italakikilidi.

⁴⁵ Tutuyanina alekwa komu ge mwasanaeqa kudayaoqigu, we tutuyanina alekwa kanaketoava deqoina vavina dede kaqegu kanayaoqa ge idavekwada.

⁴⁶ Ge kudavekimatanegu beqa olibe bunamana kuda'iwaqi kunukunugue, we vavina dede bunama maqaina giamaiotoqina i'iwaqa-kakaveni kaqegue.

⁴⁷ Aivonemu, gunabeida Yaubada vavina dede nakapoina puedi inuataqonidi, beqa no lamunina paipaina navenapwayewa bwaigiotoqina ivekaiveveneni waigue. We aitoi nakapoina siaidi Yaubada inuataqonidi tomoqonina navenapwayewa siaina Yaubada waineye.”

⁴⁸ Matautauda Ieisu vavina ivoneni ivo, “Mukapoina anuataqonidi.”

⁴⁹ Tomo'otoqa tupwaidiavo kabakani waineye imiamia kaisekavadi ivesipupu ivo, “Dede aitoi tomoqo kapoina inuataqonidi?”

⁵⁰ We Ieisu ivesipupu vavina waineye ivo, “Paina kuvetumaqanegu Yaubada iketoyavumu, beqa memumwasana kinaqo.”