Luke 6 - Maiadomu

Ieisu ivesipupu Kaiata Kabaveyawai paipaina

¹ Tamo Kaiata Kabaveyawai waineye Ieisu mekanatovemulivo inaqonaqo witi kanatanoqa naqeneye. Kanatovemulivo witi vuadi igadidi iqoqodi bunudi ibeku ikanikani.

² We tupwaidiavo Palisivo ikisedi ivelautoliedi ivo, “Uvale daketoboda kwabaibaia? Witi vuadi kwagadidi we kaia gunabeida kwalitulituqa Kaiata Kabaveyawai waineye.”

³ Ieisu ibaivila Palisivo waidie ivo, “Aa, dede giligililina Buki waineye, Deibida wete enavo taiauda ivalabubuni tutuyanina ilase wayaqidi inakani beqa gunabeida kwawawai kwanoqai, we uvale ge kwadanuakawananaqaia?

⁴ Deibida Yaubada navanuqa naqeneye ilugu ivelaukui tupwaidiavo beledi paipaidi. No beledinina maqemaqetana, we gunabeida ikalaqeieni Yaubada mataneye. Kaia tovelomu kaditagwana beledinidiavo inakanidi, we Deibida tupwaidiavo ikanidi. Wete ikewadi tupwaidiavo iveledi enavo taiauda imiamia ikani, we Yaubada ge idakawakapoyeni.”

⁵ Ieisu ivo, “Yau Mwaqitana Kanatomoqo beqa Kaiata Kabaveyawai Yau Kana Tomwaya, kagulaubwaina kaiatanina waineye tomo'otoqa divalabubuna paipaidi ailoiloinedi.”

Ieisu tomoqo dimana gemwayana ikavegiagiamaia Kaiata Kabaveyawai waineye

⁶ Tamo Kaiata Kabaveyawai waineye Ieisu inaqo ilugu sinagogi waineye iekaivevena tomo'otoqa waidie, we no waineye tamo tomoqo dimana kanakataqina gemwayana imiamia.

⁷ We tupwaidiavo Palisivo wete loina kanatovekaivevenavo wayaqidi Ieisu inavemwauya, beqa iematakaikaieni kago togemwaya inakavegiagiamaia Kaiata Kabaveyawai waineye.

⁸ We Ieisu dinuanuana gunabeida iyagovidi, beqa tomoqo dimana gemwayana ivoneni ivo, “Kumai kutovoi tomo'otoqa matadie.” We tomoqonina itovoi inaqo.

⁹ Matautauda Ieisu Palisivo wete loina kanatovekaivevenavo ivelautoliedi ivo, “Vakai loina gumanina giamaina Kaiata Kabaveyawai paipaina: Giamaina taivalabubuni o kapoina taivalabubuni? Oge tomoqo yawaina taiketoyavuya o yawaina taikavekapoi?”

¹⁰ Matautauda Ieisu ikisalelele matatabudi waidie ikakava tomoqo dimana gemwayana ivoneni ivo, “Dimamu kusiketoi,” we dimana isiketoi ivegiagiamai-vaituqana.

¹¹ We Palisivo wete loina kanatovekaivevenavo kadikapoka ioqala-otoqa kaisedi waidie iesipupu ivo, “Vakai taivalabubuni Ieisu waineye?”

Ieisu apositolovo 12 ivesinuedi

¹² Kaiata tupwaidiavo ikakava, Ieisu ilaga koyeye inavelaukui, we lovane Yaubada waineye ielaukui kanaketoava ikawananaqeni.

¹³ Kawakawaie Ieisu kanatovemulivo matatabudi iqolekauqidi imai waineye, waidie'eqa 12 ivesinuedi we kadiwavaqa iqoledi apositolovo.

¹⁴ Kadiwavaqavo deqoidi, Saimoni iqoleni Pita, Anidulu, Saimoni taina, Iemesa metaina Ioni, Pilipi, Batolomiu,

¹⁵ Libai iqoleni Madiu, Tomasi, Iemesa, Alipio natuna, Saimoni gumanina Seloti,

¹⁶ Iudasa, Iemesa natuna tamo kanawavaqa Tadiasi, we wete Iudasa Isakaliota gumanina Ieisu kanatoketoqiluva.

Ieisu iekaivevena wete toviqa ikavegiagiamaidi

¹⁷ Tutuyanina Ieisu wete kanatovemulivo taiauda koya waineye'eqa iobu itovoi dumia bwaigina waineye. No waineye kanatovemulivo puedi imiamia. Wete yoko bwaigina imiamia, tomo'otoqanidiavo imai Iudia napolovinisivo matatabuna waidie'eqa, Ielusalemaeqa, we Taia wete Saidoni kadikailuqa taoni bwaigidi ligwagwa vivineye waidie'eqa.

¹⁸ Matatabudi imai Ieisu navona inanoqai we meqavoi mekadiviqa inakavegiagiamaidi. Wete tomo'otoqanidiavo vaitabu kapoidi iekuniqedi ikavegiagiamaidi.

¹⁹ We tomo'otoqa matatabudi Ieisu naveluluna ikiseni beqa wayaqidi ina'alatovoni kavagi naveluluna inasauyeni inabala waidie kadiviqa waidie'eqa inakavegiagiamaidi.

Mwasana wete nuakapo lamudi

²⁰ Ieisu ikisanaqo kanatovemulivo waidie ivonedi ivo, “Komi kwaveyomuyomu kabamwasana waimie, paina gunabeida Yaubada mi Kini we komi natomo'otoqa iloloinemi.

²¹ Komi meqavoi kwalaselase kabamwasana waimie, paina kawaie inaveadaqimi. Wete komi meqavoi kwataitaiqa kabamwasana waimie, paina kawaie memimwasana kwainamaqa.

²² “Kago tomo'otoqa inakisemi Mwaqitana Kanatomoqo kwaemuliegu we inavedumwekaikaiemi, disinagogi waineye'eqa inakewaluguaqetemi, inasasaidibiemi wete inakawakapoyemi, kago demesaida inavalabubunedi, kabamwasana waimie.

²³ Tutuyanina no mwaunidiavo inasauyedi waimie, memimwasana kwaisuya, paina kamitakona bwaigina Yaubada iyatoi ilalaugamasa abame. Kwanuani basenaqaidaotoqa tovedumwekaikainidiavo tubudiavo Yaubada napalopitavo mesaida ivalabubunedi waidie.

²⁴ “Komi toveguyoguyo kabanuakapo waimie kawaie mwau bwaigina kwaibababaneni, paina migiamaina gunabeida kwababaneni miguyoguyo waineye.

²⁵ Komi meqavoi tutuya dede gamomi iadaqa kabanuakapo waimie kawaie mwau bwaigidi kwaibababanedi, paina kwailase bwaigiotoqina. Komi meqavoi tutuya dede kwanamanamaqa kabanuakapo waimie kawaie mwau bwaigidi kwaibababanedi, paina nuami inakapo kwaitaiqavolovoloqa.

²⁶ Komi meqavoi tutuya puena tomo'otoqa ididigemi kabanuakapo waimie kawaie mwau bwaigidi kwaibababanedi, paina basenaqaidaotoqa me Diu tubudiavo dede mesaida ivalabubunedi palopita katupoe waidie.”

Kamitalavualavo kwaivenapwayewedi

²⁷ We Ieisu ivo, “Komi gumanimiavo guvona kwanoqanoqai aivonemi. Kamitalavualavo kwaivenapwayewedi wete meqavoi inavedumwekaikaiemi kwaivalabubuna-giagiamai waidie.

²⁸ Eqavoi inakawakapoyemi kwaivonavenapwayewedi wete meqavoi inavalabubuna-kapo waimie kwaivelaukui paipaidi Yaubada inavalabubuna giagiamai waidie.

²⁹ Kago aitoi kaekaemue inakainige wete tamo kaekaemu kikaiyoyoweni waineye inakainige. We kago aitoi kamukaleko inakewai wete kamutalauma kukalaqeieni waineye, ge kivekokoleni.

³⁰ Kago aitoi tamo vakai inavelaukuieni waimue kiveleni. Wete kago aitoi tamo musaku inakewai, ge kiweweseni kikewavileni.

³¹ Vakai wayaqimi tomo'otoqa inavalabubuni waimie, komi wete mesaida kwaivalabubuni waidie.

³² “Kago emiavo kaisedi kwaienapwayewedi paina ienapwayewemi we kamitalavualavo ge kwaienapwayewedi, Yaubada ge inatakonami abame paina tomo'otoqa puedi wete tokapoina ediavo kaisedi ienapwayewedi.

³³ Wete mesaida kago meqavoi inavalabubuna-giagiamai waimie wete komi kwaivalabubuna-giagiamai waidie, we kago kamitalavualavo waidie ge kwaivalabubuna-giagiamai, Yaubada ge inatakonami abame paina tokapoina divalabubuna mesaida.

³⁴ Wete kago saku tupwaidiavo tomo'otoqa kwaiveledi wayaqimi inatutulidi, Yaubada ge inatakonami abame paina tokapoina saku tupwaidiavo ediavo iveleveledi beqa kawaie inatutuli kaia mesaida kanabwaiga.

³⁵ “Kamitalavualavo kwaivenapwayewedi wete kwaivalabubuna-giagiamai waidie. Kwaikalaqei-maimaiqa we ge baivila paipaina kwainuanuana. Kago mesaida kwaivalabubunedi kawaie kamitakona bwaigiotoqina kwaibabaneni Yaubada Tabwaotoqineye waineye'eqa wete inakawanatunemi paina tutuya puedi tokapoina wete gumanidiavo ge idaekaiwa Yaubada waineye we ivalabubuna-giagiamai waidie.

³⁶ Beqa komi tomo'otoqa kwaivenua'ina'inaqeyedi mesaida Tamami ienua'ina'inaqeyemi.”

Tupwaidiavo tomo'otoqa dikapoina ge kwailaualedi

³⁷ Ieisu yoko waidie ivesipupu ivo, “Tomo'otoqa dikapoina ge kwailaualedi kago mesaida Yaubada mikapoina inalaualedi. Ge kwanavo, ‘Tomo'otoqanidiavo kapoidi,’ kavagi Yaubada ge inavonemi inavo, ‘Komi mesaida.’ Tomo'otoqa divalabubuna kapo waimie kwainuataqonidi kavagi Yaubada mikapoina inanuataqonidi.

³⁸ Tutuya puedi kwaikakalaqei-maimaiqa emiavo waidie, wete Yaubada inakakalaqei waimie. Nakalaqeinina bwaigiotoqina meqalaqalana wete mekudilina ge kamisala kwaililidi paina pueotoqidi. Kago kwaikalaqei-maimaiqa bwaigina wete kalaqei-maimaiqa bwaigina kwaibabaneni, wete kago kwaikalaqei siaina wete siaina kwaibabaneni.”

³⁹ Matautauda Ieisu tamo vonawakedubala ivonedi ivo, “Tamo tomoqo matana pwalupwaluna iana matana pwalupwaluna ge kanasala inakedagumeteni, kago mesaida kadikailuqa inabeku mwaleduba waineye.

⁴⁰ Tosikulu diyagova ge ditovekaivevena nayagova idayoqopeleni, we tosikulu matatabudi disikulu inavekakava gumanidiavo mesaida tovekaivevena.

⁴¹ “Uvale iamu mataneye kainapia siaina kukiseni we paipaina kuesipupu, we ge kudakiseni komu kaibuta bwaigina matamue ikenokeno.

⁴² Ge kunavo, ‘Iagu, wayaqigu matamue kainapia siaina aikewai,’ we ge kudakiseni taunimi matamue kaibuta bwaigina. Komu tokatupoe. Naqaida taunimu matamue kaibuta bwaigina kikewai kavagi kikisa-vekavekaia, matautauda iamu mataneye kainapia siaina kikewai.”

Bubuna mesaida welavi vuana giamaina wete kapoina

⁴³ We Ieisu ivonedi ivo, “Welavi giamaina tutuya puena vuana giamaina wete welavi kapoina tutuya puena vuana kapoina.

⁴⁴ Welavi tamoqana tamoqana vuadi waidie'eqa taiyagovidi vaka welavi. Modaba vuana ge kanasala taigadia kuwe waineye. Wete gulepa vuana ge kanasala taigadia kailulu waineye.

⁴⁵ Mesaida tomo'otoqa divalabubuna waidie taikisakinanadi tomo'otoqa giamaidi o kapoidi. Kago tomoqo navalabubuna giamaidi, taiyagovi nuapouna matatabuna tonotonovidi. We kago navalabubuna kapoidi, taiyagovi nuapouna matatabuna kapoidi. Vakai nuapouneye ikenokeno kawaneye'eqa inasauyeni.”

Vanuqa tokaiyoqona kadikailuqa

⁴⁶ Ieisu ivesipupu ivo, “Uvale kwaqoleqolegu kwavo, ‘Tomwaya, Tomwaya,’ we guvona ge kwadaematamatanidi?

^47-48 Tamo kabakisa aivevemi. Kago aitoi inamai waigue guvona inanoqaidi inavemuliedi, gumanina navalabubuna mesaida tokaiyoqona giamaina. Naqaida nakautu giamaina ivesinueni, nakoqala pakalidi ikewadi itaviedi iobu gileu waineye isivetovoidi, matautauda navanuqa iyoqoni. Tutuyanina kwei iobu wayaqata namalewa itetei, vanuqanina ge idaketopoia paina pakalina.

⁴⁹ We kago aitoi guvona inoqanoqaidi we ge inavalabubunidi, gumanina mesaida tamo tokaiyoqona nakautu kapoina ivesinueni magama waineye iyoqona. Tutuyanina wayaqata iobu, vanuqa iketopoia matatabuna iketoqeuqeuya.”