Luke 5 - Maiadomu

Ieisu kanatovemulivo iqoledi

¹ Tamo kaiata Ieisu itovotovoi Waya Galili kwadeweye, we yoko imai iekaibibibineni wayaqidi Yaubada navona inavevaneneqeni Ieisu waineye'eqa.

² We Ieisu tovuata diwaga kailuqa ikisedi kwadeweye gunabeida ibiulagaidi ikiawedi, taunidi iobu divuata ilegwalegwadi.

³ Tamo waga waineye Ieisu idodoqa, waganina Saimoni nawaga, we ivoneni saiqanaqa italatete wawane. Mulineye Ieisu imiabui waganina waineye ivekaivevena yoko waidie.

⁴ Tutuyanina navekaivevena ikakava Saimoni ivoneni ivo, “Saiqanaqa kuveqatete malaveteye vuata kuleleqedi iqana kikonadi.”

⁵ We Saimoni ivo, “Tomwaya, lovane kavuavuata ikawananaqema, we ge tamo iqana kadakonai. We paina komu kuvona beqa tailaga vuata aileleqedi.”

⁶ We vuata ileleqedi iqana pueotoqidi ikonadi vuata saiqanaqa idalabuki.

⁷ Beqa ediavo tamo waga waineye ilaukwaiedi kaivaisa paipaina, we tutuyanina imai waga kailuqa iveadaqidi saiqanaqa idasalili.

^8-10 Saimoni Pita wete enavo wageye nuadi ivilele paina iqana bouotoqidi ikonadi. Wete mesaida Saimoni enavo tamo waga waineye taiauda ilitulituqa kadiwavaqa Iemesa wete Ioni, Sebedi natunavo, nuadi ivilele. Saimoni iyagovi kabanuavilele isauyeni beqa kaqena iveketonokuyedi isobwanu Ieisu waineye ivo, “Tomwaya, kukiawegu paina yau tokapoina.” We Ieisu Saimoni ivoneni ivo, “Ge kigololo! Mesaida dede iqana kwakonakonadiqa, Yau aivevemi banikodiqa tomo'otoqa kwaikonadi kwaimaiedi waigue inavetumaqanegu.”

¹¹ Beqa diwaga iluguvedi kavale ibiudi ilaga mulineye saku matatabuna ikiawedi we Ieisu ivemulieni.

Ieisu tomoqo lepelo ikavegiagiamaia

¹² Ieisu tamo taoni waineye imiamia, we no waineye tamo tomoqo imiamia mekanaviqa bununeye kanawavaqa lepelo vovona matatabuna ikavekapoi. Tomoqonina Ieisu ikiseni imai menavekimatana isobwanu maiqinaeqa pwayepwayeye ivelaukui ivo, “Tomwaya, kago wayaqimu kanasala kikavegiagiamaigu wete kigiavemaqetagu.”

¹³ Ieisu dimana isiketoi ikavikavini ivo, “Ee, Yau tagwatagwanigu. Kuvegiagiamai!” We vedimadimanaeqa kanaviqa lepelo ikakava ivegiagiamai.

¹⁴ Matautauda Ieisu iloineni ivo, “Ge tamo aitoi kivoneni paipaigu, we kunaqo kuvekaivevenemu tovelomu waineye. Kaisaya kiveleni inavelomuyeni Iave waineye paipaimu, mesaida Mosese naloina tolepelo kadigiavemaqeta paipaina, kiakiaya tomo'otoqa waidie gunabeida kuvegiagiamai.”

¹⁵ Ieisu tomoqonina iketobodeni we valeana ivebwaiga-otoqa, beqa yoko bwaigina imai navona inanoqai wete kadiviqa waidie'eqa inakavegiagiamaidi.

¹⁶ We Ieisu navalabubuna tutuya puena yoko waidie'eqa inaqonaqo kawalawamaiqe ielaukui Iave waineye.

Ieisu tamo tomoqo bwalobwalogona ikavegiagiamaia

¹⁷ Tamo kaiata waineye Ieisu iekaivevena tomo'otoqa waidie, we yokonina waineye tupwaidiavo Palisivo wete loina kanatovekaivevenavo imiabui imiamia. Gumanidiavo imai taoni tamoqana tamoqana Galili wete Iudia Polovinisi waidie'eqa wete Ielusalema taoni navikaie'eqa, matatabudi Ieisu ievaneneqeni. We Iave naveluluna ikenokeno Ieisu waineye kanasala toviqa inakavegiagiamaidi.

¹⁸ Beqa tupwaidiavo tomoqovo iadi bwalobwalogona mesevusevuna ikavalai imaieni wayaqidi inaluguveni inayatoi Ieisu mataneye.

¹⁹ We ge kadisala inaluguveni paina yoko bwaigiotoqina, beqa luvewana waineye ilagaveni vanuqa kanakubu beabeana tabwaneye itaviponuya ikakava. Mulineye tomoqonina bwalobwalogona mesevusevuna iveonoqi mekanabulava ivekilaloi iobu yokonina gamwaneye Ieisu manawaneye.

²⁰ We tutuyanina Ieisu tomoqovonidiavo divetumaqana ikiseni, beqa tomoqo bwalobwalogona ivoneni ivo, “Iagu, mukapoina gunabeida anuataqonidi.”

²¹ We loina kanatovekaivevenavo wete Palisivo kaisedi nuapoudie ivo, “Dede aitoi tomoqo? Ivovona-maimaiqa Yaubada isiwataoi iesipupu mesaida nigo Yaubada kadikailuqa idavesala! Ge tamo aitoi kanasala kapoina inanuataqonidi, kaia Yaubada kaiseotoqina kanasala.”

²² We Ieisu gunabeida dinuanuana iyagovidi beqa ivelautoliedi ivo, “Komi uvale dede mesaida kwaenuanedi nuapoumie?

²³ Dede memeqanina kago tamo tobwalogo waineye anavo, ‘Mukapoina gunabeida anuataqonidi’ paina ge tamo aitoi kanasala inakiseni vakai isauyeni. We dede mwau'otoqina kago tamo tobwalogo aivoneni, ‘Kutovoi kamusevusevu kukewai kutauya kunaqo,’ paina tomo'otoqa kadisala inakiseni vakai inasauyeni we inayagovi mwaqitana o gebuka.

²⁴ Beqa Yau aivona vakai mwauna aivalabubuni kavagi kwaiyagovi loina wete veluluna Yaubada ivelegu. Yau Mwaqitana Kanatomoqo meguveluluna kapoina kanasala ainuataqonidi pwayepwayeye.” Matautauda tobwalogonina ivoneni ivo, “Avonemu kutovoi kamusevusevu kukavalai kunaqo muvanuqe.”

²⁵ We vedimadimanaeqa tomoqo bwalobwalogona itovoi tomo'otoqa matadie kanasevusevu ikavalai menamwasana itauya inaqo navanuqe Yaubada idididigeni.

²⁶ Tomo'otoqa matatabudi ikiseni nuadi ivilele-otoqa we medigololo Yaubada ididigeni ivesipupu ivo, “Kasiotoqa bakamidiqa kabanuavilele wete veluluna takiseni.”

Ieisu Libai iqoleni

²⁷ Tutuyanina Ieisu taoninina ikiaweni inaqonaqo, takisi kanatokewa ikiseni kanawavaqa Libai, tamo kanawavaqa Madiu, imiamia nakabalituqa naqeneye takisi ikewakewa Loma gabemani paipaina. Ieisu ivoneni ivo, “Kuvemuliegu.”

²⁸ Libai itovoi vakai matatabuna ikiawedi we Ieisu ivemulieni.

²⁹ Mulineye Libai kani bwaigina ivalabubuni navanuqe Ieisu paipaina. Takisi kanatokewavo puedi wete tupwaidiavo tomo'otoqa ikanikani taiauda.

³⁰ We Palisivo wete diloina kanatovekaivevenavo Ieisu kanatovemulivo ibwaduyedi ivo, “Uvale takisi kanatokewavo, gumanidiavo toketoqiluva ilitulituqa me Loma paipaidi, wete tokapoina taiauda kwakanikani wete kwayemuyemu?”

³¹ Ieisu divona ibaivilai vonawakedubalaeqa ivonedi ivo, “Tomo'otoqanidiavo veluvelulunidi doketa ge paipaina idanuanuana. Gebuka! Gumanidiavo toviqa kadisala doketa inalaualeni.

³² Wete mesaida Yau ge tomo'otoqa tonotonovidi paipaidi adamai. Yau tokapoina paipaidi amai aiveqole beqa inanuavila dikapoina waidie'eqa.”

Ieisu navekaivevena wete me Diu divalabubuna tutuaidi ge taiauda idavesala

³³ Tamo kaiata waineye tomo'otoqa tupwaidiavo Ieisu ivoneni ivo, “Tutuya puena Ioni Tobabitaiso kanatovemulivo wete Palisivo kaditovemulivo iekudiqana wete ielaukui Yaubada waineye. Uvale komu kamutovemulivo giladi ikanikani wete iyemuyemu ge idaekudiqana?”

³⁴ We Ieisu ibaivila ivo, “Tutuyanina tomoqo vavine inanaqia tomoqonina enavo, banikodiqa iekudiqana? Ge idalaubwaineni! Tutuyanina enavo taiauda ge idavekudiqana, we inakani-velautaubama medimwasana.

³⁵ Tamo kaiata tomoqonina kanatalavualavo inakewai gamwadie'eqa. Kaiatanidiavo waidie inaekudiqana paina nuadi inakapo.”

³⁶ We Ieisu tamo vonawakedubala ivesipupuyeni ivo, “Yau dede nuanuana kaivauna amaieni aivekaiveveneni waimie ge mibubuna tutuaina taiauda idavesala. Ge idalaubwaineni tamo aitoi kaleko kaivauna inalabuki beqa kaleko tutuaina inabwadai. Kago mesaida kanakisa inakapo paina ge idavesala, we kaleko kaivauna gunabeida ilabuki ikapo.

³⁷ Wete mesaida ge idalaubwaineni oine kaivauna ina'iwaqi inaobu oine kaba'iwaqa kaisaya bununa tutuaina waineye. Kago no mesaida aitoi inavalabubunediqa kaisaya bununa inakawapiai paina oine inapatai inavetageyoi kaisaya bununa ge kanasala kaisena inapatai. Beqa oine wete kaisaya bununa inakapo.

³⁸ Gebuka! Dede mesaida ge inavalabubunediqa we tomo'otoqa oine kaivauna ina'iwaqi inaobu kaisaya bununa kaivauna waineye.”

³⁹ Wete Ieisu ivo, “Kago aitoi oine tutuaina inayemu ge wayaqina kaivauna inayemu paina inavo, ‘Oine tutuaina kanalautovona giamaiotoqina.”