Luke 4 - Maiadomu

Seitani Ieisu ivekautovoni

¹ Ieisu Bwasi Iolidani ikiaweni, Vaitabu Maqemaqetana gunabeida iveadaqa-vaqateni beqa Vaitabunina ikewai inaweni pwayapwayamaiqe.

² We Seitani wayaqina Ieisu inakapoina beqa iekautovoni kaiata 40 naqedie. Kaiatanidiavo waidie Ieisu ge tamo kanikani idakani. Mulineye kaiatanidiavo ikakava ilase.

³ Beqa Seitani ivekautovoni ivo, “Kago komu mwaqitana Yaubada Natuna, kivona dede gileunidiavo inavekanikani.”

⁴ Ieisu Seitani navona ibaivilai ivo, “Gebuka. Basenaqaida Yaubada Nabuki naqeneye igililia ivo, ‘Tomo'otoqa dimiagiagiamai wete yawaidi ge kanikani kaisena waineye idabababaneni.”

⁵ Wete Seitani Ieisu ikewai ilagaveni koya kaniakwanina tabwaotoqineye pwayapwaya nakabaloina matatabuna iveveni tutuya kalakusana naqeneye.

⁶ We ivesipupu ivo, “Veluluna wete loina aivelemu kavagi dede kabaloinanidiavo wete diguyoguyovo kiloloinedi. Paina matatabuna Yaubada ikalaqeiedi waigue, kago wayaqigu kanasala aikalaqeiedi tamo tomoqo waineye.

⁷ Beqa kago memuvekimatana kisobwanu waigue, sakunidiavo matatabudi aivelemu mukabaloina.”

⁸ We Ieisu ivesipupu ivo, “Yaubada Nabuki naqeneye ivo, “Iave mi Yaubada kaiseotoqina waineye kwaisobwasobwanu, wete kwailitulituqa paipaina.”

⁹ Matautauda Seitani Ieisu ikewai inaweni Ielusalema, ilagaveni Temupolo tabwaotoqineye wete ivoneni ivo, “Kago komu mwaqitana Yaubada Natuna dede waineye kisou, we veviqa ge kibabaneni.

¹⁰ Paina Yaubada Nabuki naqeneye ivo, “Yaubada na'anelose inavonedi inavekisabodebodemu.

¹¹ Dimadie'eqa inasilagaimu, kavagi kaqemu ge tamo saiqana gileu waineye kinigeyeni.”

¹² Ieisu ibaivilai ivo, “Yaubada Nabuki naqeneye ivesipupu ivo, ‘Iave mi Yaubada ge kivekautovoni.”

¹³ Tutuyanina Seitani navekautovona matatabuna ivekakavedi, Ieisu ikiaweni, we ilalaugamaseni tupwaidiavo tutuya wete inavila.

Me Nasaleta Ieisu ivedumwekaikaieni

¹⁴ Vaitabu Maqemaqetana naveluluna ikenokeno Ieisu waineye, beqa ivila inaqo Galili Polovinisi waineye, we vedimadimanaeqa valeana isapayavula vikainina kanamatatabu waineye.

¹⁵ Me Diu disinagogi waidie Ieisu Yaubada valeana iekaivevena we tomo'otoqa matatabudi ididigeni.

¹⁶ Mulineye Ieisu inaqo Nasaleta nakabataulai waineye, we Kaiata Kabaveyawai waineye ilugu sinagogi naqeneye, navalabubuna mesaida. Disobwanu waineye tomo'otoqa matadie itovoi Yaubada Nabuki waineye inawawa.

¹⁷ Beqa buki kanatovekisabodaboda ikewai Ieisu iveleni, bukinina Yaubada napalopita Aisea kanagiligilili. We bukinina nununumina iyawaqi vonanina ibabaneni dede mesaida:

¹⁸ “Iave Vaitabuna waigue imiamia paina ivesinuegu wete i'iwaqigu bunamaeqa Valea Giamaina ailauguguyeni yomuyomudi waidie. Ivetunegu aivesipupu-luguaqeta tomo'otoqa yoqoyoqonidi waidie kadiketoyavu paipaina, wete ivetunegu aivesipupu-luguaqeta tovematapwalu waidie matadi kadikavegiagiamai paipaina. We ivetunegu tomo'otoqanidiavo veviqa ibababanedi kadiqaviavo dimadie aiketoyavudi.

¹⁹ We aivesipupu tomo'otoqa waidie anavo, ‘Tutuya gunabeida imai Iave natomo'otoqa inaketoyavudi.”

²⁰ Ieisu vonanina iwawai ikakakava bukinina inunumi kanatovekisabodaboda iveleni we imiabui. We tomo'otoqanidiavo sinagogi naqeneye imiamia ikisavalavalalai Ieisu waineye.

²¹ Ieisu ivesipupu waidie ivo, “Vonanina Iave Nabuki waineye awawai wete kwanoqai, kasiotoqa kanamwaqitana isauyeni.”

²² Tomo'otoqanidiavo ievaneneqa Ieisu ididigeni paina nuadi ivilele navona giamaidi paipaidi we ivo, “Tomoqo dede kaia Iosepa natuna, ee?”

²³ We Ieisu ivonedi ivo, “Ayagovi oge tamo vonawakedubala beqa kwaivonegu kwanavo, ‘Komu doketa taunimu kukavegiagiamaimu.’ Kananuakawananaqai, ‘Kabanuavilelenidiavo kanoqaidi kuvalabubunidi Kapeneumi taoni waineye wete mesaida kivalabubunedi mukabataulai Nasaleta waineye.’

²⁴ We aivonemi Yaubada napalopitavo taunidi dikabataulai waidie ditomo'otoqavo ge idaekimatanedi we ivedumwekaikaiedi.

²⁵ “Avona-mwaqitana waimie. Kwainuani basenaqaida Iave napalopita Ilaitia natutuye kwabula puedi imiamia Isileli naqeneye, we diqaba kaitonu wete wetaki 6 naqedie ge idakwei beqa lase bwaigina isauyeni vikainina matatabuna waineye.

²⁶ We Iave Ilaitia ge idavetuneni tamo kwabula Isileli waineye inakaivaisedi, katumapu ivetuneni tamo kwabula waidie gumanidi Denitali, we imiamia Salepati vanuqa Saidoni taoni navikai naqeneye.

²⁷ Wete mesaida Iave napalopita Ilaisa natutuye tolepelo puedi imiamia Isileli naqeneye, we Ilaisa ge idakavegiagiamaidi, katumapu tamo Denitali tolepelo Silia waineye'eqa kanawavaqa Namani ikavegiagiamaia.”

²⁸ Tutuyanina tomo'otoqa matatabudi sinagogi waineye Ieisu navona inoqaidi iyagovi vonanina kadivona, gumanidiavo mesaida tovedumwekaikai we kadikapoka ioqala-otoqa.

²⁹ Beqa Ieisu itovoi-kwaikwaipipineni ikavikavini ibiuya inaweni taoni kanakabavekakava waineye nigodibei idabibipeleni bwaqale paina taoninina iyoqoni koya tabwaneye.

³⁰ We Ieisu yoko gamwadie ituana'anaqa isauyeni inaqo.

Ieisu vaitabu kapoina tomoqo waineye'eqa iveuqeuqeni

³¹ Matautauda Ieisu Nasaletaeqa inaqo Kapeneumi taoni Galili Polovinisi naqeneye, we no Kaiata Kabaveyawai tomo'otoqa ivevevedi sinagogi waineye.

³² Tomo'otoqa puedi nuadi ivilele navekaivevena paipaina, paina menaveluluna wete menaloina iekaivevena waidie.

^33-34 We tutuyanina sinagogi naqeneye iekaivevena, tamo tomoqo vaitabu kapoina iekuniqeni iveqole bonana bwaiginaeqa ivo, “Ieisu tomoqo Nasaleta, uvale kumai waimeye? Banikodiqa, kumai dede waineye kilaumutulima? Ayagovimu komu Mesaia Yaubada waineye'eqa kumai.”

³⁵ Ieisu vaitabu kapoina iloineni ivo, “Kuvekwada! Tomoqo waineye'eqa kusauyemu.” Vaitabu kapoina tomoqo itaweni iobu pwayepwayeye yoko matadie mulineye isauyeni, we tomoqo ge idaveilaqieni.

³⁶ Tomo'otoqa nuadi ivilele kaisedi ivelautoliedi ivo, “Aiaa! Dede vakai vekaivevena? Ieisu menaloina wete menaveluluna vaitabu kapoidi iloinedi kaia isasauyedi.”

³⁷ Ieisu valeana ivebwaiga isapayavula taoni matatabuna waidie Kapeneumi navikaie.

Ieisu toviqa puedi ikavegiagiamaidi

³⁸ Tutuyanina Ieisu sinagogi ikiaweni inaqo Saimoni Pita navanuqe. We Saimoni mwanena inadi iviqa vovodi iveyauyauta bwaigina beqa vanuqa kanatomia Ieisu ivelaukuieni ivo, “Kanasala kudakavegiagiamaidi?”

³⁹ Ilugu kadikivi vivineye itovoi isobwanu kadiviqanina iloineni ivo, “Yauyauta kuvekwada kusauyemu waidie!” Vavinenidi yauyauta ikawataqoni we vedimadimanaeqa itovoi kanikani ivalabubuna Ieisu me'enavo paipaidi.

⁴⁰ Valavala gunabeida iketoniveni, tomo'otoqa ditoviqavo kadiviqa sulidi sulidi imaiedi Ieisu waineye. We kaitamoqana kaitamoqana ialatovonidi kadiviqa ikakava ivegiagiamai.

⁴¹ Wete tomo'otoqa puedi waidie'eqa vaitabu kapoidi isauyedi ibwaubwau ivo, “Mwaqitanaotoqa, komu Yaubada Natuna!” We Ieisu vaitabu kapoidi iketobodedi ge idatagwanedi tamo vakai inavesipupuyedi paina iyagovi gumanina Mesaia.

Ieisu isauyeni ilauguguya taoni tupwaidiavo waidie

⁴² Matalovalovanineye Ieisu itovoi taoni ikiaweni inaqo kawalawamaiqe no waineye ielaukui Yaubada waineye. We tomo'otoqa Ieisu ilaualeni, we tutuyanina ibabaneni ivekautovona inaweweseni ge wayaqidi idakiawedi.

⁴³ We ibaivila ivonedi ivo, “Ilaubwaineni taoni tupwaidiavo wete waidie ainaqo Valea Giamaina ailauguguyeni Yaubada Nakabaloina paipaina, lituqanina paipaina Yaubada ivetunegu.”

⁴⁴ Beqa inaqo ielauvivila me Diu divikai matatabuna waidie ilalauguguya disinagogi waidie.