Luke 3 - Maiadomu

Ioni Tobabitaiso nalauguguya tomo'otoqa waidie

¹ Me Loma ditoloina bwaigiotoqina kanawavaqa Sisa Taibiliasi, navetoloina kanadiqaba 15 gunabeida ibabaneni. Tutuyanina waineye Ponitio Pailato Iudia Polovinisi Kanagabemani we Elodi iloloineni Galili Polovinisi, taina Pilipi iloloinedi Itulia wete Tilakoniti Polovinisi, we Lisaniasi iloloineni Abilini Polovinisi.

² Me Diu tovelomuvo kaditogumeta Anasi wete Kaiapasi. Tutuyanina waineye Yaubada navona imai Ioni Tobabitaiso Sakalaia natuna waineye imiamia pwayapwayamaiqe.

³ Beqa itovoi inaqo taoni matatabudi Bwasi Iolidani navikaie ilauguguya tomo'otoqa waidie ivesipupu ivo, “Mikapoinaeqa kwainuavila, we Yaubada mikapoina inanuataqonidi. We aibabitaisomi minuavila kanakiakiaya, paina gunabeida mikapoinaeqa kwanuavila.”

⁴ Basenaqaida Yaubada napalopita Aisea igililia nabuki waineye Ioni paipaina Yaubada ivo, “Pwayapwayamaiqe tamo topalimatamatana bonana bwaiginaeqa ieqoleqole ivo, ‘Iave nakeda kwavusia wete nakabatauya kwasivetonovidi.

⁵ Kawagova kwaiveivudi, wete koya kwaitavibaidi inavetonokatuqa. Keda kobwakobwadi kwaisivetonovidi, wete bwagabwagadi kwaivalabubunidi inavegiagiamai.

⁶ Beqa tomo'otoqa matatabudi, Yaubada naketoyavu inakiseni.”

⁷ We yoko puedi Ioni valeana inoqai inaqo waineye inababitaisodi we ivonedi ivo, “Komi tokapoina baisoa mesaida! Aitoi ivonemi nigo kwaideqa Yaubada kanakapoka wete nakaimatavuloqa imaimai waineye'eqa?

⁸ Naqaida mivalabubuna inatonova minuavila kanakabakisa tadavona welavi vuana giamaina, mulineye aibabitaisomi. Wete ge kwaivenuana kwanavo, ‘Kima Ebelamo tubuleleleqinavo Yaubada natomo'otoqavo vesivesinuama beqa ge kanasala inakaimatavuloqima.’ We avonemi dede ge mwaqitana. Paina Yaubada kanasala gileu dede waidie'eqa Ebelamo tubuleleleqinavo inavalabubunidi kamiketopesala.

⁹ Saiqanaqa Yaubada inakaimatavuloqimi mivalabubuna kapoidi paipaidi tadavona gunabeida nalegisa idalauqadali beqa welavi kaitamoqana kaitamoqana vuadi ge giamaidi kaikwalakwalamidi waidie inatalaqidi inatawedi inaobu kaiyabeyabela waineye.”

¹⁰ Yokonidiavo Ioni navona inoqai ivelautolieni ivo, “Beqa vakai kaivalabubuni?”

¹¹ Ioni ibaivila ivo, “Kago meqavoi komi kamitalauma kailuqa we emiavo gebuka, tamo kwaiveleni. Wete mesaida kago mekami we emiavo gebuka, tupwaidiavo kanikani kwaiveledi.”

¹² Wete tupwaidiavo takisi kanatokewavo imai babitaiso paipaina Ioni ivelautolieni ivo, “Tovekaivevena, kima vakai kaivalabubuni?”

¹³ Ibaivila ivo, “Me Loma diloina kanatonotonova waineye takisi kwaikewa, we ge katupoe'eqa kavesulai kwaikewakewadi taunimi paipaimi.”

¹⁴ Wete mesaida tolauqaviavo ivelautoli ivo, “Kima vakai kaivalabubuni?” Ioni ivonedi ivo, “Tomo'otoqa ge kwaikavegololodi dimane inavelemi wete ge kwaivemwaudi katupoe'eqa kwaiwewesedi inatutulimi, we komi milituqa kanatutula kanabwaiga kaia mesaida ilaubwainemi.”

¹⁵ Tomo'otoqa matatabudi inuanuana bwaigina Mesaia namai paipaina, beqa ienuana nuapoudie Ioni paipaina ivelautoli ivo, “Oge gumanina Mesaia o gebuka?”

¹⁶ Beqa Ioni matatabudi ivonedi ivo, “Muligue tamo tomoqo imaimai. Gumanina veluvelulunaotoqina matautauda Yau, beqa Yau ge kagusala kanakaqeyapayapa kanabulava aisobwanu aiqeuya. Yau amaiqa bwasieqa aibabitaisomi, we gumanina muligue imaimaiqa inababitaisomi Vaitabu Maqemaqetana wete kaiyabeyabela waidie'eqa.

¹⁷ Tutuyanina inamai tomiapwayapwaya matatabudi inavonayavu mataneye, we inaloinedi mesaida witi kanatogadi inayatokedi witi waipeina wete namidana mulineye witi kanikaninidi inavedodoqidi naleye, we namidana matatabuna inatunudi kainina ge menakabakakava waineye.”

¹⁸ Dede mesaida Ioni vona puedi beqa tomo'otoqa igiavepakalidi wete Valea Giamaina ilauguguyeni waidie.

¹⁹ We no tutuyanina Kini Elodi Galili Polovinisi iloloineni, we taina mwanena kadiwavaqa Elodiasa ivainaqodi inaqidi wete tupwaidiavo valabubuna kapoidi ivalabubunidi beqa Ioni ikawakapoyeni.

²⁰ Mulineye Elodi kanakapoka ioqala beqa navalabubuna kapoidi ikavesulaidi, we Ioni iyatoi deli waineye.

Ioni Ieisu ibabitaisoi

^21-22 Tutuyanina Ioni giladi ge idalugu delie, tomo'otoqa matatabudi ibabitaisodi wete Ieisu ibabitaisoi. Tutuyanina Ieisu ielaukui, abama ikawapiai Yaubada Vaitabuna iobu waineye, kanakisa mesaida malasi, we abame'eqa bonana isauyeni ivo, “Komu, Natugu nuapougu. Avenapwayewemu, wete amwasanemu bwaigina!”

Ieisu tubunavo

²³ Tutuyanina Ieisu kanadiqaba 30 ibabaneni nalituqa ivelamu tomo'otoqa waidie. We tomo'otoqa inuani Ieisu tamana Iosepa. Iosepa tamana Eli,

²⁴ Eli tamana Madati, Madati tamana Libai, Libai tamana Meliki, Meliki tamana Ianai, Ianai tamana Iosepa,

²⁵ Iosepa tamana Matatiasi, Matatiasi tamana Emosi, Emosi tamana Naumi, Naumi tamana Esili, Esili tamana Nagai,

²⁶ Nagai tamana Ma'ati, Ma'ati tamana Matatiasi, Matatiasi tamana Semeini, Semeini tamana Ioseki, Ioseki tamana Ioda,

²⁷ Ioda tamana Ioanani, Ioanani tamana Lesa, Lesa tamana Selubabela, Selubabela tamana Salatiela, Salatiela tamana Neli,

²⁸ Neli tamana Meliki, Meliki tamana Adi, Adi tamana Kosami, Kosami tamana Elimadami, Elimadami tamana Ela,

²⁹ Ela tamana Iosua, Iosua tamana Eliesa, Eliesa tamana Iolima, Iolima tamana Madati, Madati tamana Libai,

³⁰ Libai tamana Simioni, Simioni tamana Iuda, Iuda tamana Iosepa, Iosepa tamana Ionami, Ionami tamana Eliakimu,

³¹ Eliakimu tamana Melea, Melea tamana Mena, Mena tamana Mataya, Mataya tamana Naitani, Naitani tamana Deibida,

³² Deibida tamana Dese, Dese tamana Obedi, Obedi tamana Boasa, Boasa tamana Salimoni, Salimoni tamana Nasoni,

³³ Nasoni tamana Aminadabi, Aminadabi tamana Adamini, Adamini tamana Alini, Alini tamana Esiloni, Esiloni tamana Pelesi, Pelesi tamana Iuda,

³⁴ Iuda tamana Iakobo, Iakobo tamana Aisake, Aisake tamana Ebelamo, Ebelamo tamana Tila, Tila tamana Naoli,

³⁵ Naoli tamana Seluga, Seluga tamana Leu, Leu tamana Pelegi, Pelegi tamana Ebeli, Ebeli tamana Sala,

³⁶ Sala tamana Kainani, Kainani tamana Alepakadi, Alepakadi tamana Semi, Semi tamana Noa, Noa tamana Lemeki,

³⁷ Lemeki tamana Metusela, Metusela tamana Inoki, Inoki tamana Ialedi, Ialedi tamana Malaleli, Malaleli tamana Kainani,

³⁸ Kainani tamana Inosi, Inosi tamana Sete, Sete tamana Adama, Adama tamana Yaubada.