Luke 24 - Maiadomu

Ieisu natovoi vaituqana

¹ Wiki kanakaiata gumegumetana waineye kawakawaiotoqe, vevinenidiavo bunama maqaidi giamaidi gunabeida ivalabubunidi ikewadi inaqo ovu waineye.

² Tutuyanina ilekwa ikisanaqo gileunina bwaigina ovu kawana itutubodai gunabeida ivelikolikokoi isibaleni.

³ Tutuyanina ilugu ovunina naqeneye Tomwaya Ieisu vovona ge idakiseni.

⁴ Itovotovoi ienuana Ieisu vovona paipaina, we vesalawapaeqa tomoqovo kadikailuqa isauyedi waidie kaditalauma mata'udu'udulidi.

⁵ Vevinenidiavo igololo maiqidieqa isobwanu pwayepwayeye. We tomoqovonidiavo vevine ivelautoliedi ivo, “Uvale towapa divikaie kwamai tomoqo meyawaina kwalalaualeni?

⁶ Gumanina ge idamiamia dede waineye! Gunabeida wapaeqa itovoi-vaituqana! We kwanuani navona base Galili waineye ivonemi ivo,

⁷ ‘Yau Mwaqitana Kanatomoqo inakalaqeiegu tokapoina waidie inatutupwategu laukenobalabala waineye, we kaiata kanavetonu waineye aitovoi-vaituqana wapaeqa.”

⁸ Matautauda vevinenidiavo Ieisu navona inuani.

⁹ Beqa ovu ikiaweni ivila inaqo taoni waineye vakai matatabuna isauyeni ivesipupuyedi apositolovo 11 waidie wete tovemulivo matatatabudi waidie.

¹⁰ Vevinenidiavo dede valeanina ivesipupuyedi apositolovo waidie dede gumanidiavo: Meli taoni Magidala waineye'eqa, Ioana, Meli Iemesa inana wete tupwaidiavo vevine taiauda.

¹¹ We apositolovo vevinenidiavo divalea ge idavetumaqaneni, kananoqaya waidie tadavona qauqauna idaesipupu.

¹² Matautauda Pita itovoi ilaukwavina inaqo ovu ilaugebeni ikisalugu ikisavetovetonovi kaia Ieisu kana'uma'umaqa ikenokeno, beqa ivila inaqonaqo we ienuana vakai isauyeni paipaina.

Ieisu isauyeni Emeusa kanakedeye

¹³ Kaiatanina waineye Ieisu kanatovemulivo kadikailuqa Ielusalemaeqa inaqonaqo Emeusa taoni waineye, kanakaniakwana mesaida 11 kilomita.

^14-15 Inaqonaqo kedeye iesipupu-kedakeda vakai matatabuna isauyedi paipaidi, we Ieisu taunina imai kedeye taiauda inaqonaqo.

¹⁶ We Yaubada nuadi igiaveqauya, beqa Ieisu ikiseni we ge idakinanai.

¹⁷ Ieisu ivelautoliedi ivo, “Vakai paipaina kwaesipupu-kedakeda?” We ilautovoiedi maiqidi kadikisa mesaida nuakapo.

¹⁸ Tamo iana kanawavaqa Kaliopasa ibaivila ivo, “Ielusalema waineye toyavusa puedi, oge komu kaiseotoqimu ge kudayagovidi vakai isauyedi no waineye kaiatanidiavo waidie.”

¹⁹ Ieisu ivo, “Vakai saku isauyedi?” Gumanidiavo ivo, “Ieisu tomoqo Nasaleta paipaina. Gumanina tamo palopita, navona wete navalabubuna veluvelulunidi Yaubada wete tomo'otoqa matadie.

²⁰ We tovelomuvo bwaigidi wete datoloinavo ikalaqeieni Loma gabemani waidie iloina inawapa, mulineye itutupwateni laukenobalabala waineye.

²¹ Kima kanuani gumanina Mesaia imai me Isileli inaketoyavuda. Dede sakunidiavo isauyedi kaiata kaitonu ikakava waidie.

^22-23 We kasiotoqa kawakawaie tupwaidiavo vevine kamayoko waineye'eqa inaqo ovuye Ieisu vovona ikisakavai. Tutuyanina ivila imai waimeye nuama ivevileledi divonaeqa paina ivesipupu ivo, ‘Mwaqitana anelose isauyedi ivonema Ieisu gunabeida itovoi-vaituqana.’

²⁴ Beqa tupwaidiavo emavo inaqo ovu waineye, we vakai vevinenidiavo ivesipupuyedi ibabaneni kaia mesaida. Ieisu vovona ikisakavai.”

²⁵ We Ieisu ivesipupu waidie ivo, “Komi qauqaumi wete nuapoumi pakalidi paina vakai matatabuna Yaubada napalopitavo igilili-vaqatedi Mesaia paipaina ge kwadavetumaqanedi.

²⁶ Base palopitavo ivonavaqata ilaubwaineni Mesaia veviqa inababanedi, mulineye inalugu abame, nakabamia mata'udu'udulina waineye.”

²⁷ Beqa Ieisu taunina paipaina igiavemaqeta Yaubada Nabuki waineye'eqa ivelamu Mosese waineye inaqo palopitavo matatabudi kadigiligilili waidie.

²⁸ Tutuyanina inaqonaqo saiqanaqa inalekwa Emeusa waineye, we Ieisu nigodibei inanaqo tamo taoni waineye.

²⁹ We kadikailuqa iwewesa-kapokapo ivo, “Side waineye taikeno paina gunabeida ilovane.” Beqa taiauda ilugu vanuqe imiana.

³⁰ Imiabui ditutuya kani waineye Ieisu beledi ikewai ivekaiwa Yaubada waineye igiatomwai iveledi.

³¹ Vedimadimanaeqa matadi ikawananaqai ikisakinanai, we kawasasanina waineye ivuyo.

³² Kadikailuqa taunidi waidie ivesipupu ivo, “Mwaqitanaotoqa, tutuyanina Yaubada Nabuki igigiavemaqetai kedeye mekanavebae waideye tadavona nuapouda idakalakalata, kuvebaeni?”

³³ Me'iana ivesipupu ikakava itovoi ivila inaqo Ielusalema. Apositolovo 11 ibabanedi wete tupwaidiavo ediavo taiauda imiakauqa.

³⁴ Tutuyanina ilekwa inoqai ediavo iesipupu ivo, “Mwaqitanaotoqa, Tomwaya itovoi-vaituqana isauyeni Pita waineye.”

³⁵ Matautauda kadikailuqa vakai matatabuna isauyedi kedeye ivesipupuyedi. Wete ivo, “Tutuyanina beledi ikewai igiatomwai, no waineye kakisakinanai Ieisu.”

Ieisu isauyeni kanatovemulivo waidie

³⁶ Kaliopasa me'iana giladi iesipupu ediavo waidie, we Ieisu taunina isauyeni gamwadie itovoi ivesipupu ivo, “Meminiwalova kwaimiamia.”

³⁷ We ivesalawapadi igololo-otoqa dinuanuana nigo yalua.

³⁸ Ieisu ivonedi ivo, “Uvale kwagologololo wete kwaenuanaluqa?

³⁹ Dimagu wete kaqegu kwakisedi. Kwakisavetovetonovigu. Mwaqitanaotoqa yau. Kwaialatovonigu kavagi kwaikawamwaqitanegu yau ge yalua, paina yalua ge mevovona wete ge meluluna mesaida yau.”

⁴⁰ Ivesipupu ikakava matautauda dimana wete kaqena ivevedi.

⁴¹ Medimwasanaotoqa wete medinuavilele giladi ge idavetumaqana. Beqa Ieisu ivonedi ivo, “Kanikani kwamaieni aikani.”

^42-43 We iqana kwavuqina iveleni ietonova ikania matadie.

⁴⁴ Matautauda ivonedi ivo, “Kwanuani base tutuyanina taiauda tamiamia avonemi avo, ‘Ilaubwaineni vakai matatabuna gunabeida giligililidi paipaigu Mosese naloina kanabuki waineye, Palopitavo dibuki waidie wete Same waineye kanamwaqitana inasauyedi.”

⁴⁵ We Ieisu nuadi igiavekawananaqaidi beqa vakai matatabuna Yaubada Nabuki naqeneye iyagovidi.

⁴⁶ Ivonedi ivo, “Gililinidiavo tamo dede mesaida: Mesaia veviqa bwaigina inababaneni inawapa kaiata kanavetonu mulineye inatovoi-vaituqana.

⁴⁷ We Mesaia kanawavaqaeqa valeana inalauguguyeni inavelamu Ielusalema waineye'eqa inanaqo vikai matatabuna waidie. Valeanina dede mesaida: meqavoi inanuavila dikapoina waineye Yaubada inanuataqonidi.

⁴⁸ Dede sakunidiavo taunimi matamieqa kwakisedi, beqa sakunidiavo komi kaditovesipupu.”

⁴⁹ “Deqoina Vaitabu Maqemaqetana aivetuneni inamai waimie mesaida base Tamagu ivonadabadaba. Ielusalema ge kwaikiaweni we kwailalaugamasa kanaketoava veluluna inaobuma Yaubada waineye'eqa inaveadaqimi.”

Ieisu ilaga abame

⁵⁰ Ieisu navona ivekakavai kanatovemulivo ikedagumetedi Ielusalemaeqa inawedi Bedani. No waineye dimana isilagai ivonavenapwayewedi.

⁵¹ Tutuyanina ivovonavenapwayewedi Yaubada imaseagai ilagaveni abame.

⁵² Kanatovemulivo isobwanu wete ididigeni ikakava. Mulineye medimwasanaotoqa ivila inaqo Ielusalema.

⁵³ We tutuya matatabuna Temupolo naqeneye imiamia Yaubada idididigeni.