Luke 23 - Maiadomu

Ieisu ivonayavu Pailato mataneye

¹ Diu Kaniselevo ivesipupu ikakava, matatabudi itovoi Ieisu ikewai inaweni Loma digabemani kanawavaqa Pailato waineye.

² No waineye Ieisu ivemwauya ivo, “Dede tomoqonina kababaneni tomo'otoqa matatabudi ikakatupwaiedi ivonevonedi ivo, ‘Ge kwaitakisi me Loma gabemani waidie,’ wete ivo, ‘Yau Mesaia mi Kini.”

³ Pailato divona inoqai beqa Ieisu ivelautolieni ivo, “Komu me Diu dikini?” We ibaivila ivo, “Vakai kuvesipupuyeni mesaida.”

⁴ Mulineye Pailato ivesipupu tovelomuvo bwaigidi wete yoko waidie ivo, “Tomoqo dede ge tamo nakapoina adababaneni beqa ailoina inawapa.”

⁵ We iwewesa-kapokapo ivo, “Navekaivevena waineye'eqa tomo'otoqa puedi idaba Iudia navikai matatabuna waidie, ivelamu Galilieqa wete deqoina imai Ielusalema waineye.”

Ieisu inaqo Kini Elodi waineye

⁶ Tutuyanina Pailato inoqai Ieisu nalituqa Galili waineye ivelamu beqa ivelautoliedi ivo, “Tomoqo dede Galilieqa imai?” Ibaivila ivo, “Ee, mesaida.”

⁷ Tutuyanina waineye Galili kanatoloina imiamia Ielusalema kanawavaqa Kini Elodi, beqa Pailato ivonedi Ieisu inakewai inanaweni waineye paina Galili Elodi nakabaloina.

⁸ Tutuyanina Ieisu ilekweni Elodi waineye imwasana bwaigina, paina tutuya kaniakwanina valeanaqa inoqanoqai inuanuana wayaqina Ieisu kabanuavilele idavalabubuni idakiseni.

⁹ Beqa Elodi velautoli puedi Ieisu iveleni, we ibaila velautolinidiavo ge tamo idabaivilai.

¹⁰ We tovelomuvo bwaigidi wete loina kanatovekaivevenavo taiauda itovotovoi Elodi mataneye bonadi bwaiginaeqa Ieisu ivemwau'otoqi.

¹¹ Matautauda Elodi menatolauqaviavo ivelamu Ieisu ietutuyameni wete isasaidibieni, mulineye toloinavo kadivaiqavueqa giamaiotoqina ivaiqavuya wete ivevilai inaqo Pailato waineye.

¹² Basenaqaida Elodi kanatalavuala Pailato, we dede kaiatanina waineye iveiana.

Pailato iloina Ieisu inawapa

¹³ Matautauda Pailato tovelomuvo bwaigidi, tomo'otoqa kaditogumetavo wete tomo'otoqa taiauda iqolekauqidi.

¹⁴ Ivonedi ivo, “Tomoqo dede kwavemwauya kwamaieni waigue kwavo, ‘Navekaivevena wete nakedagumeta waineye'eqa tomo'otoqa puedi ikakatupwaiedi beqa idaba.’ We nakapoina kwavesipupuyeni waigue paipaina avelautolieni matamie, we ge tamo nakapoina adababaneni.

¹⁵ Wete mesaida ge tamo nakapoina Elodi idababaneni beqa ivevilai imai waideye. Paina ge tamo kapoina idavalabubuni, beqa ge idalaubwaineni inawapa.

¹⁶ Beqa kaia gutolauqaviavo ailoinedi inanigeimo inakakava aiketoyavuya inanaqo.”

¹⁷ We diqaba tamoqana tamoqana Vesikaqalataqona kanakani kanakaiata waineye Pailato navalabubuna tamo tomoqo gumanina deli naqeneye, aitoi gumanina me Diu wayaqidi inavelaukuieni, Pailato inayavuya.

¹⁸ We yoko matatabuna bonadi bwaiginaeqa ikalakubali ivo, “Dede tomoqonina kiluvewapai! We Balabasi kiketoyavuya.”

¹⁹ Balabasinina toluvewapa wete basenaqaida Loma gabemani taiauda ivetalaqa Ielusalema waineye beqa iyatoi deli waineye.

²⁰ Pailato wayaqina Ieisu inaketoyavuya beqa yoko ivelautoli-vaituqanedi.

²¹ We tomo'otoqa iwewesa-kapokapo ikalakubali ivo, “Kututupwateni! Kututupwateni laukenobalabala waineye!”

²² Wete Pailato navona kanavetonu tomo'otoqa ivonedi ivo, “Vakai kapoina ivalabubuni? Yau ge tamo nakapoina adababaneni beqa ailoina inawapa. We kaia gutolauqaviavo ailoinedi inanigeimo mulineye aiketoyavuya.”

²³ We yoko kaia iwewesa-kapokapo bonadi ilaga-otoqa ikalakubali ivo, “Kututupwateni! Kututupwateni!” We yokonidiavo divona velulunaeqa Pailato ivekwada.

²⁴ Beqa Pailato itagwana Ieisu inawapa mesaida tomo'otoqa dinuanuana.

²⁵ Ieisu ikalaqeieni natolauqaviavo dimadie yoko dinuanuana inavalabubuni waineye. We iloina Balabasi inaketoyavuya deli waineye, gumanina tomo'otoqa wayaqidi. Gumanina toluvewapa base Loma gabemani taiauda ivetalaqa.

Ieisu kanatutupwata

²⁶ Tutuyanina tolauqaviavo Ieisu ikewai inawenaweni inatutupwateni, we inaqonaqo kedeye tomoqo Sailini kanawavaqa Saimoni ibabaneni, maleweye'eqa iluguluguma Ielusalema waineye. We tolauqavianidiavo ikavikavini iweweseni Ieisu kanalaukenobalabala ivekavalai ivemulieni.

²⁷ Wete yoko bwaigina Ieisu iemulieni. Tomo'otoqanidiavo waidie'eqa tupwaidiavo vevine iemoqai Ieisu paipaina.

^28-29 We Ieisu isivilai ivonedi ivo, “Me Ielusalema vevine, tutuya imaimai waineye veviqa bwaigina inasauyeni, wete tomo'otoqa inavesipupu inavo, ‘Meqavoi gagalidi memeaqanina waidie, paina ge idavenatuna wete idaesusu, kabamwasana waidie veviqanidiavo ge inababaneni.’ Beqa ge kwaivemoqai paipaigu, we ilaubwainemi kwaivemoqai taunimi wete natumiavo paipaidi.

³⁰ Tutuyanina waineye tomo'otoqa inatalasida koya waidie inavo, ‘Kwakawabaimi kwayamunima vedimadimanaeqa kaiwapa ge wayaqima kaiveviqa!’

³¹ Yau tadavona mesaida welavi maisina, we inige-maimaiqigu, we komi me Ielusalema tadavona mesaida welavi bwavuna, mwaqitana kawaie veviqa bwaigina kwaibabaneni.”

³² We tolauqaviavo toloinabai kadikailuqa ikewadi inawedi Ieisu taiauda inaluvewapadi.

³³ Tutuyanina ilekwa tamo vikai kanawavaqa Kunukunu, no waineye Ieisu itutupwateni laukenobalabala waineye, we toloinabai kadikailuqa wete itutupwatedi kadilaukenobalabala waidie, tamo Ieisu kanakataqie tamo kanakelie.

³⁴ Mulineye Ieisu ivelaukui ivo, “Tamagu, tomo'otoqanidiavo dede dikapoina kunuataqonidi, vakai ivavalabubuni ge idayagovi.” Tolauqavianidiavo Ieisu kanakalekovo ikewadi isenai bou tamoqana tamoqana waidie. We gileu ikewadi, gova tamo igoveni beqa kalekonidiavo bou tamoqana tamoqana ikalaqeiedi.

³⁵ We tomo'otoqa puedi itovoi Ieisu ikisekiseni, wete me Diu kaditogumetavo Ieisu isasaidibieni ivo, “Tomo'otoqa tupwaidiavo iketoyavudi, we kago gumanina mwaqitana Mesaia, Yaubada Kanavesivesinua ilaubwaineni taunina inaketoyavuya.”

³⁶ We wete tolauqaviavo isasaidibieni. Oine yuyuyuna imaieni ikaiyoyoweni Ieisu waineye.

³⁷ Ivesipupu ivo, “Kago komu me Diu dikini, taunimu kiketoyavumu, kiobuma laukenobalabala waineye'eqa.”

³⁸ Bodi igililia vonanina beqa iemwauya ivo, “Dede me Diu dikini.” We bodinina itutupwateni laukenobalabala waineye kunukununa tabwaneye.

Tamo toloinabai inuavila

³⁹ Tamo toloinabai laukenobalabala waineye Ieisu ikawakapoyeni ivo, “Ivesipupu komu Mesaia, beqa taunimu kudaketoyavumu wete kima taiauda!”

⁴⁰ We tamo toloinabai iyaqaia ivo, “Komu Yaubada ge kudagololoyeni? Kadakaitonu kadakaimatavuloqa mesaida wete saiqanaqa taiwapa.

⁴¹ Kadakailuqa ilaubwaineda tadawapa dakapoina kadibaiviala paipaina, we Ieisu ge tamo menakapoina.”

⁴² Matautauda ivesipupu Ieisu waineye ivo, “Ieisu, tutuyanina mukabaloina inamai wete kive Kini kudanuavekavinigu.”

⁴³ We Ieisu ivoneni ivo, “Avona-mwaqitana waimue, deqoina kadakailuqa tailugu Paladaisi.”

Ieisu nawapa

⁴⁴ Kaiatagamwana waineye valavala maqetana ivekwada we pwayapwaya matatabuna ivaitomai kanaketoava 3 koloki lavilavie.

⁴⁵ We Temupolo naqeneye kalekonina beqa tutuya matatabuna Tutudaba Maqemaqeta'otoqina ibububuliqa ikawalabukaluqedi tabwaneye iobu dibuneye.

⁴⁶ Ieisu bonana bwaiginaeqa iveqole ivo, “Tamagu, vaitabugu akalaqeieni waimue.” Navona dede ivekakavai matautauda yawaina ikakava.

⁴⁷ We tolauqaviavo kaditogumeta vakai isauyeni ikiseni beqa Yaubada ididigeni ivo, “Vona mwaqitana tomoqonina tonotonovina.”

⁴⁸ Tutuyanina tomo'otoqanidiavo imai Ieisu kanatutupwata waineye vakai matatabuna isauyeni ikiseni, medinuakapo nuapoudi itutudi we ivila inaqo divanuqe.

⁴⁹ We tomo'otoqanidiavo Ieisu enavo wete tupwaidiavo vevine base Ieisu iemulieni taiauda imai Galili waineye'eqa, kanikie'eqa itovoi ikikisanaqo.

Ieisu kanatavuna

^50-51 Tamo tomoqo kanawavaqa Iosepa, nataoni Alimadia, Iudia Polovinisi naqeneye. Gumanina tomoqo giamaina wete tonotonovina. Ilalaugamasa Yaubada Nakabaloina paipaina we gumanina tamo Diu Kaniselevo kadiyoko naqeneye, we tutuyanina Kaniselevo iloina Ieisu inawapa, dinuanuana ge idakawagiagiamaieni.

⁵² Inaqo Pailato ivelaukuieni Ieisu vovona paipaina.

⁵³ Pailato itagwaneni beqa inaqo laukenobalabala waineye Ieisu vovona isitakia iobuyeni iumai kaleko giamaina beqa. Mulineye ikewai inaweni iyatoi ovu kaivauna waineye, base tomo'otoqa gileu italaluguveni we ge tamo aitoi waineye idatavuni.

⁵⁴ Ieisu itavuni Palaide lavilavie, kaiatanina dede waineye me Diu ivalabubuna paina Kaiata Kabaveyawai saiqanaqa inavelamu.

⁵⁵ Vevinenidiavo Ieisu base ivemulieni imai Galilieqa Iosepa ivemulieni inaqo ovu waineye ikiseni banikodiqa vovona iyatoi.

⁵⁶ Matautauda vevinenidiavo ivila inaqo divanuqe bunama maqaidi giamaidi ivalabubunidi Ieisu vovona paipaina. Tutuyanina ivalabubuna ikakava, we valavala iketoniveni Kaiata Kabaveyawai ivelamu, beqa iveyawai me Diu diloina mesaida.