Luke 22 - Maiadomu

Iudasa itagwana Ieisu inaketoqiluveni

¹ Me Diu dikani Vesikaqalataqona kanakaiata ivekalakusa. Kaninina kanawavaqa kanaveluqa Beledi Tutubeabeana Ge Mekana'isiti.

² No tutuyanina waineye tovelomuvo bwaigidi wete loina kanatovekaivevenavo kedakeda ilalauala banikodiqa Ieisu vaigavueqa inakavikavini inaluvewapai, paina tomo'otoqa igololoyedi.

³ Tutuyanina waineye Seitani Iudasa Isakaliota waineye ilugu, gumanina tamo Ieisu kanatovemulivo 12 waidie'eqa.

⁴ Iudasanina inaqo tovelomuvo bwaigidi wete Temupolo Kanatomiagamata kaditogumetavo taiauda ivesipupu banikodiqa Ieisu inaketoqiluveni.

⁵ Navona inoqai imwasana-otoqa, itagwana mane inaveleni.

⁶ Beqa Iudasa itagwana itauya inaqo kedakeda ilalauala beqa kanasala vaigavueqa Ieisu inakalaqeieni dimadie kavagi tomo'otoqa ge inayagovi.

Inavalabubuna Ieisu nakani paipaina

⁷ Beledi Tutubeabeana Ge Mekana'isiti Kanakani kanakaiata gunabeida ilekwa, no waineye sipi natuvaudi inanigedi Vesikaqalataqona Kanakani kananuavekavina paipaina.

⁸ Beqa Ieisu Pita wete Ioni ivonedi ivo, “Kwainaqo Vesikaqalataqona Kanakani kida paipaida kwaivalabubuni taikani.”

⁹ Ivelautolieni ivo, “Vakaiebei wayaqimu kaivalabubuni?”

^10-11 Ieisu ibaivila ivo, “Kwainaqo Ielusalema tamo tomoqo bwasi kabagoi ikavalai inaqonaqo kwaibabaneni, komi kwaivemulieni. Vanuqanina waineye inalugulugu taiauda kwailugu tonivanuqa kwaivoneni kwanavo, ‘Tovekaivevena ivo: Vakaiebei tutudabanina waineye Yau wete kagutovemulivo taiauda Vesikaqalataqona Kanakani kaikania?’

¹² Matautauda tonivanuqa inakewami inalagavemi tutudaba bwaigina tabwaneye inavevemi vikainina gunabeida ivalabubuni, we no waineye kanikani kwaivalabubuni paipaida.”

¹³ Tovemulivo itauya inaqo Ielusalema, sakunidiavo mesaida Ieisu ivesipupuyedi waidie ibabanedi. We kanikani ivalabubuni Vesikaqalataqona kananuavekavina paipaina.

Ieisu nakani

¹⁴ Kani kanakaiata ilekwa, Ieisu mena'apositolovo 12 inaqo imiabui kabakani waineye.

¹⁵ Ieisu ivesipupu waidie ivo, “Yau wayaqiotoqigu Vesikaqalataqona Kanakani aikania komi taiauda mulineye yau veviqa bwaigina aibabaneni.

¹⁶ We aivonemi yau ge wete Vesikaqalataqona Kanakani aikania kanaketoava Yaubada Nakabaloina inamai we kaninina kananuakawananaqai kanamwaqitana inasauyeni.”

¹⁷ Mulineye oine vedina ikewai Yaubada waineye ivekaiwa ikakava ivo, “Oine dede kwaikewai tamoqana tamoqana kwaiyemu.

¹⁸ Avona-mwaqitana waimie oine ge wete aiyemuya kanaketoava Yaubada Nakabaloina inamai.”

¹⁹ Wete beledi ikewai Yaubada waineye ivekaiwa ikakava. Mulineye igiatomwai kanatovemulivo iveledi ivo, “Dede vovogu akakalaqeieni komi paipaimi. Tutuya puena dede mesaida kwaikanikaniedi kagunuavekavina paipaina.”

²⁰ Kani mulineye oine mevedina ikewai iveledi ivo, “Dayaqigu dede. Ilailolo komi paipaimi. Yau dayaqigunina Yaubada navonadabadaba kaivauna kanagiavepakala.

²¹ “We aivonemi, kaninina waineye gumanina inaketoqiluvegu gamwadeye taiauda takanikani.

²² Yau Mwaqitana Kanatomoqo aiwapa mesaida Buki Maqemaqetana waineye ivesipupu. We kagutoketoqiluva kabanuakapo waineye paina kawaie veviqa bwaigina inababaneni.”

²³ Matautauda kanatovemulivo kaisekavadi ivelautoliedi ivo, “Aitoi gumanina inaketoqiluva?”

Aitoi kanawavaqa bwaigiotoqina

²⁴ Mulineye tovemulivo ivelamu iekawadibidibi waidie'eqa aitoi gumanina kanawavaqa bwaigiotoqina.

²⁵ Beqa Ieisu ivonedi ivo, “Gunabeida kwayagovi Denitali dikabaloina tamoqana tamoqana dikinivo diloina veluvelulunidi beqa medinualaga tomo'otoqa iloloinakapoyedi wete wayaqidi tomo'otoqa medivekimatana inadididigedi inavo, ‘Komi togumetavo giamaimi kamatokaivaisa.’

²⁶ We komi ge mesaida kwaivalabubunedi. Kago aitoi waimie'eqa wayaqina kanawavaqa inavebwaiga, naqaida taunina inasiobuyeni inavetomo'otoqa maimaiqa. We kago aitoi wayaqina inavetogumeta, naqaida inavetolituqa enavo paipaidi.

²⁷ Beqa aitoi kanawavaqa bwaigiotoqina, gumanina somala waineye ikanikani o gumanina ilitulituqa? Mwaqitana gumanina somala waineye kanawavaqa bwaigiotoqina. We yau gamwamie kaia aetolituqamo paipaimi.

²⁸ “Komi yau taiauda tamiamia kagumwau waidie we ge kwadabailegu.

²⁹ We Tamagu iyatogu avekini mesaida komi wete ayatomi taiauda tailoina.

³⁰ Beqa komi Gukabaloina waineye kamiwavaqa bwaigina, no waineye taikani wete taiyemu gusomala waineye, we toloina dikabamia guyoguyo waidie kwaimiabui me Isileli manuqa 12 kwailoinedi.”

Ieisu ivonavaqata Pita navekewa paipaina

³¹ Wete Ieisu ivesipupu ivo, “Saimoni, Saimoni, kuvevaneneqa Seitani gunabeida tagwana ikewai Yaubada waineye'eqa matatabumi inavekautovonimi, mesaida tobagula witi itutuveyavuyavuidi kanikaninidi iyayatokedi we namidadi itawetawedi.

³² We Saimoni gunabeida avelaukui paipaimu muvetumaqana ge inamwea. Kawaie kibailegu, we tutuyanina kinuavila waigue, emwavo divetumaqana kigiaveluvelulunidi.”

³³ We Pita ibaivila ivo, “Tomwaya, yau atagwana aivemuliemu. Kago inakavikavinimu inanawemu deli waineye inayatomu wete inaluvewapamu, yau wete taiauda.”

³⁴ We Ieisu ivesipupu ivo, “Pita, avona-mwaqitana waimue dede lovananina waineye kamukamu ge inagwaqe naqaida kivekewegu kaitonu kunavo, ‘Yau ge adayagovi!”

Vona mane, venuana wete kepata paipaidi

³⁵ Ieisu ivelautoliedi ivo, “Base avetunemi kwanaqo Valea Giamaina kwalauguguya we saku tupwaidiavo aketobodedi, mesaida mane kamiyawana waidie, venuana wete kaqeyapayapa. We sakunidiavo mimia paipaina kwavekalakusa o gebuka?” We ibaivila ivo, “Gebuka.”

^36-37 Wete Ieisu ivesipupu waidie ivo, “We deqoina sulina, paina vakai matatabuna base palopita igililia Buki Maqemaqetana waineye paipaigu kanamwaqitana inasauyeni. Tamo vonavaqata ivo, ‘Tomo'otoqa dinuanuana nigodibei gumanina toloinabai taiuada.’ Paina vonavaqatanina kanamwaqitana isasauyeni we tomo'otoqa inavalabubuni waigue nigodibei yau toloinabai, beqa meqavoi medimane kanayawana inakewai wete meqavoi medivenuana inakewadi wete kago aitoi ge menakepata, kanakaleko inavegimwaneyeni manenina beqa nakepata inagimwanei.”

³⁸ Kanatovemulivo ivo, “Tomwaya, kepata kailuqa dede.” Ieisu ibaivila ivo, “Kaiana.”

Ieisu ivelaukui Koya Olibe waineye

³⁹ Ieisu mekanatovemulivo taoni ikiaweni inaqo Koya Olibe waineye mesaida tutuya puena divalabubuna.

⁴⁰ Tutuyanina ilekwa vikainina waineye, Ieisu ivonedi ivo, “Kwaivelaukui Yaubada waineye inagiaveluvelulunimi kavagi ketotovona waineye ge kwaibeku.”

⁴¹ No waineye kanatovemulivo ikiawedi itauya inaqo saiqanaqa mesaida kataqida kanakaniakwana waineye tutuqana iveketonokuyedi ivelaukui.

⁴² Ivo, “Tamagu, kago Komu munuanuana veviqa kanavedi dede kikewayavuleni ge aiyemuya, we Yau ge gunuanua kivalabubuni, we komu munuanuana.”

⁴³ Matautauda tamo anelose abame'eqa isauyeni igiaveluveluluni.

⁴⁴ Tutuyanina ielaukui nuapouna iveviqa bwaigiotoqina beqa navelaukui igiaveluvelulunidi, we kanagamweai ilailolo iobu pwayepwayeye mesaida dayaqa.

⁴⁵ Tutuyanina ivelaukui ikakava, itovoi ivila inaqo kanatovemulivo waidie, ikisedi ikenomataiva paina nuadi ikapo-otoqa.

⁴⁶ Ivesipupu waidie ivo, “Uvale kwakenokeno? Kwatovoi kwaivelaukui Yaubada waineye inagiaveluvelulunimi kavagi ketotovona waineye ge kwaibeku.”

Ieisu kanakavekavina

⁴⁷ Tutuyanina Ieisu giladi iesipupu tovemulivo waidie, yoko bwaigina ilekwa, we Iudasa gumanina tovemulivo kadikuma 12 waidie'eqa, yokonina igumegumetedi. Imai inaqo Ieisu waineye nigodi idayaoqi.

⁴⁸ We Ieisu Iudasa ivelautolieni ivo, “Iudasa, uvale komu kumai Mwaqitana Kanatomoqo kiketoqiluveni yaoqaeqa?”

⁴⁹ Tutuyanina kanatovemulivo ikisedi yokonina wayaqidi Ieisu inakavikavini ivo, “Tomwaya, banikodiqa? Kanasala makepataeqa kainigedi?”

⁵⁰ We tamo tovemuli nakepata isiokei tovelomuvo kaditogumeta natolituqa taniqana kanakataqie igusuya.

⁵¹ We Ieisu ivonedi ivo, “Kaiana! Kwavekwada!” Tomoqonina taniqana ikavikavini ivegiagiamai.

⁵² Tomo'otoqanidiavo imai Ieisu kanakavekavina paipaina gumanidiavo, tovelomuvo bwaigidi, Temupolo Kanatomiagamata kaditogumetavo wete tomoqovo bwaigidi. Ieisu ivonedi ivo, “Uvale kwamai waigue memikepata wete memiwabibi kwaikavekavinigu, tadavo Yau mesaida toloinabai wete vetalaqa kanatovelamu?

⁵³ Kaiata tamoqana tamoqana Yau komi taiauda tamiamia Temupolo malewina waineye, we ge kwadakavekavinigu. We deqoina komi mitutuya, tutuyanina vaitoma navelulunaeqa iloiloina.”

Pita Ieisu ivekeweni

⁵⁴ Yokonina Ieisu ikavikavini inaweni tovelomuvo kaditogumeta navanuqe. We Pita saiqanaqa kanikie'eqa iemulieni.

⁵⁵ Vanuqanina malewina gamwaneye tomo'otoqa tupwaidiavo kai ilevai imiabui ievala. Pita imai imiabui taiauda.

⁵⁶ We tamo tolituqa vavinedi Pita ikiseni imiabui imiamia ievala kai maqetana waineye ikisanaqo ikisavetovetonovi ivo, “Dede tomoqonina tamo Ieisu iana.”

⁵⁷ We ivekeweni ibaivila ivo, “Vavina, tomoqonina ge adayagoviqa!”

⁵⁸ Tutuya kalakusana tamo tomoqo wete ikiseni ivo, “Komu wete tamo Ieisu iana.” Pita ibaivila ivo, “Tomoqo, yau gebuka!”

⁵⁹ Kawasasa tamoqana ikakava, mulineye tamo tomoqo ilavulewai ivo, “Mwaqitana, tomoqonina tamo Ieisu iana paina gumanina wete me Galili.”

⁶⁰ Pita ibaivila ivo, “Tomoqo, ge adayagoviqa vakai kwaesipupuyeni!” Navesipupu ge idavekakavai we kamukamu igwaqe.

⁶¹ Ieisu ikisavilai Pita ikisakikikia, we Pita inuani base Ieisu navona ivoneni ivo, “Naqaida komu kivekewegu kaitonu kunavo, ‘Ge adayagovi’ mulineye kamukamu inagwaqe.”

⁶² Pita nuana ikapo isauyeni vanuqanina kanakala waineye menanuakapo itaitaiqa.

Ieisu isaidibieni wete inigei

⁶³ Tomoqovonidiavo Ieisu imimiagamatai ivelamu isasaidibieni wete inigenigei.

⁶⁴ Matana kalekoeqa ipania inigei ivelautolieni ivo, “Kago komu Yaubada napalopita kivonema aitoi inigemu?”

⁶⁵ Wete vona kapoiotoqidi beqa ikawakapoyeni.

Ieisu itovoi Diu Kaniselevo matadie

⁶⁶ Kawakawaiotoqe Diu Kaniselevo matatabudi imiakauqa we Ieisu imaieni matadie ivetovoia. Kaniselenidiavo tomoqovo bwaigidi, tovelomuvo bwaigidi wete loina kanatovekaivevenavo.

⁶⁷ Ivelautolieni ivo, “Kuvonema, komu mwaqitana Mesaia?” Ieisu ibaivila ivo, “Kago aivonemi, komi ge kwaivetumaqanegu.

⁶⁸ We kago aivelautoliemi, ge kwaibaivila.

⁶⁹ We deqoina inaqonaqo Yau Mwaqitana Kanatomoqo aimiabui Yaubada Veluvelulunaotoqina kataqineye vikai vekivekimatanina waineye.”

⁷⁰ Beqa matatabudi ivelautolieni ivo, “Kaloma, komu Yaubada natuna?” Ieisu ibaivila ivo, “Vakai kwavesipupuyeni kaia mesaida.”

⁷¹ Kaniselenidiavo Ieisu navona inoqai ivo, “Kima ge wayaqima tupwaidiavo tovonakaivaisa! Gunabeida taunida kawanaeqa tanoqai navona kapo Yaubada isiwataoi.”