Luke 21 - Maiadomu

Kwabula dikalaqeimaimaiqa

¹ Tutuyanina Ieisu imiabui Temupolo malewineye ikisalaga tomo'otoqa guyoguyodi ietonovidi dikalaqeimaimaiqa iyatoyato mane kabayato waineye.

² We tamo kwabula yomuyomudi ikisedi imai dimane mesaida toea kailuqa iyatodi.

³ Ieisu kanatovemulivo ivonedi ivo, “Avona-mwaqitana waimie, dede kwabulanidi yomuyomudi dikalaqeimaimaiqa isaki, matautauda tupwaidiavo.

⁴ Paina tupwaidiavo iyato we diyatobala bwaigidi ikenokeno, we gumanidi yomuyomudi vakai dimia paipaina gunabeida iyatosaweni.”

Ieisu ivesipupu pwayapwaya kanakabavekakava kanatutuya paipaina

⁵ Ieisu kanatovemulivo tupwaidiavo Temupolo ikiseni paipaina ivesipupu ivo, “Kwakiseni vanuqa kanakisa giamaiotoqina paina iyoqoni gileu bwaigidi wete namanamalidi beqa, we kanavaiqavu tomo'otoqa dikalaqeimaimaiqa Yaubada waineye.” We Ieisu ivesipupu ivo,

⁶ “Kamukabeida dede sakunidiavo matatabuna kwakisedi me Diu kadiqaviavo inakavekapoidi we ge tamo gileu inakenokeno ediavo tabwadie.”

⁷ We ivelautoli Ieisu waineye ivo, “Tovekaivevena, wayaqima kudavonema vakai tutuya dede sakunidiavo inasauyedi wete vaka kiakiaya kaikiseni beqa kaiyagovi sakunidiavo saiqanaqa inasauyedi?”

⁸ Ieisu ivonedi ivo, “Kwavekisabodebodemi kavagi ge tamo aitoi inakatupwaiemi. Tomo'otoqa puedi inamai kaguwavaqaeqa, inavo, ‘Yau Mesaia,’ wete inavo, ‘Yaubada natutuya gunabeida isasauyeni.’ We bonadi ge kwainoqaidi wete ge kwaivemuliedi.

⁹ Tutuyanina qavia butudi kwainoqaidi wete tupwaidiavo qavia valeadi kwainoqaidi, ge kwaigololo. Mwaqitana, dede sakunidiavo naqaida inasauyedi, we pwayapwaya kanakabavekakava giladi.”

¹⁰ Wete Ieisu ivonedi ivo, “Tamo yoko wete tamo yoko taiauda inaetalaqa, we kabaloina tamo wete kabaloina taiauda inaetalaqa.

¹¹ Tutuyanina waineye yoyoyo bwaigidi inayueyue, lase bwaigina wete viqa kapoidi inasauyedi vikai puedi waidie. We kabagololo puedi tomo'otoqa inakisedi wete abame kiakiaya kabanuavilele inasauyedi.

¹² “Kawaie sakunidiavo inasauyedi, we naqaida tomo'otoqa inakavikavinimi veviqa bwaigina inavelemi. Paina kwavetumaqana waigue beqa inakalaqeiemi sinagogi waidie wete inanawemi kwaitovoi kinivo wete toloinavo matadie sivetonova paipaina. Mulineye inayatomi deli waineye.

¹³ We tutuyanina waineye kanasala Valeagu Giamaina kwailauguguyeni waidie.

¹⁴ Nuapoumi kwaitauvepakalidi, we ge kwaivenuapousakala vakai kago kwaivesipupuyeni wete banikodiqa kwaivekewedi sivetonova waineye.

¹⁵ Tutuyanina waineye vona wete nuauya aivelemi we aivonakedekedemi kavagi kamiqaviavo ge kadisala mivona inatutuli, wete vakai kwaivesipupuyeni ge kadisala inavo, ‘Kwakatupoe.’

^16-17 Paina kwavetumaqanegu beqa tomo'otoqa matatabudi wete misusuvo inavedumwekaikaiemi wete inaveqaviqaviami. Mesaida tamamiavo, inamiavo, tatamiavo, taimiavo, novumiavo wete emiavo inaketoqiluvemi toloinavo waidie we tupwaimiavo inaluvewapami.

¹⁸ We ge tamo navakaumi inavuyo kananuakawananaqai ge tamo saiqana kwaiwapa-vaqata.

¹⁹ Kwaitovoi-pakala kavagi yawaina vaqata kwaibabaneni.”

Ielusalema wete kanatomianavo kadileo paipaina Ieisu ivesipupu

²⁰ We Ieisu ivonedi ivo, “Kawaie kwaikiseni tolauqaviavo Ielusalema inatovoivelauvivili matautauda kwaiyagovi saiqanaqa inaleodi.

²¹ Tutuyanina kiakiayanina inasauyeni, meqavoi imiamia Iudia Polovinisi naqeneye ilaubwainedi inadeqa inanaqo koyeye, meqavoi Ielusalema taoni naqeneye imiamia inakiaweni inadeqa, we meqavoi imiamia maleweye ge idalaubwaineni inalugu Ielusalema.

²² Tutuyanina waineye Yaubada nakaimatavuloqa basenaqaidaotoqa Yaubada Nabuki waineye igililia paipaina kanamwaqitana inasauyeni.

²³ Kaiatanidiavo waineye kabanuakapo tove'ina'inaqe wete tovesusu waidie paina ge kadisala inavedimadimana inadeqa. Mwau bwaigiotoqina inasauyeni dede pwayapwayanina waineye wete Yaubada kanakapoka inasauyeni tomo'otoqanidiavo waidie.

²⁴ Kadiqaviavo tupwaidiavo inaluvewapadi kepata beqa, we tupwaidiavo inakavikavinidi dipilisinavo inanawedi tupwaidiavo kabaloina waidie. Denitali diloina veluveluluna waineye'eqa Ielusalema inamiagagaleni kanaketoava Yaubada wayaqina diloina kanatutuya inakakava.”

Ieisu navila vaituqana paipaina

²⁵ “Tutuyanina waineye kiakiaya kabagololo kwaikisedi valavala, wetaki wete mwatuia waidie'eqa. We pwayapwaya tabwaneye tomo'otoqa matatabudi inagololo paina kaiayava inavelauqa butudi bwaigidi inanoqaidi dinuanuana inavekalakusa.

²⁶ Yaubada natovelulunavo abame inavekalapeto beqa tomo'otoqa inayagovi sakunidiavo saiqanaqa inasauyedi pwayepwayeye, we digololo waidie'eqa inamwea.

²⁷ No tutuyanina waineye tomo'otoqa matatabudi inakiseni Mwaqitana Kanatomoqo inalausimatala waumana tabwaneye, we inamaimai menaveluluna wete mata'udu'udulina.

²⁸ Tutuyanina kwaikisedi sakunidiavo inasauyedi, kwaitovoi kwaikisalaga meminuavata kwaikiseni kamitoketoyavu gunabeida imaimai.”

²⁹ Matautauda Ieisu ivonawakedubala tomo'otoqa waidie ivo, “Kwaikisedi modaba wete welavi tupwaidiavo divalabubuna.

³⁰ Tutuyanina lugudi ina'uqa'uqa wete inadiadia kwaiyagovi tutuya bagula.

³¹ Wete mesaida, tutuyanina kiakiayanidiavo naqaida avesipupuyedi kwaikisedi inasauyedi, kwaiyagovi saiqanaqa Yaubada Nakabaloina inasauyeni.

³² Avona-mwaqitana waimie, lagata dede ge inakakava kanaketoava sakunidiavo matatabudi avesipupuyedi waimie inasauyedi.

³³ Kawaie abama wete pwayapwaya inakakava, we guvona ge inakakava inakeno-vaqata.”

Kwaivalabubuna Ieisu navila vaituqana paipaina

^34-35 “Taunimi kwaikisavekavinimi inanaqonaqo saku tupwaidiavo nuami inakewadi kwaimianuavulu, mesaida sagali, bwasi veluvelulunidi wete mimiana pwayepwayeye paipaina kwaivenuapousakala. Kago mesaida kwaimimianuavulu guvila vaituqana kanakaiata waineye aiveyawailovoqimi. Mesaida sikwana kaisaya isikwasikwanidi yawaidi ielovoqidi, komi tomiapwayapwaya matatabumi mesaida aivalabubuni waimie.

³⁶ Tutuya puena kwaietonova wete kwaielaukui ge kwaimiamaimaiqemi kavagi mivetumaqana inaveluluna dede mwaunidiavo waimie ge inasauyedi wete kamisala kwaitovoi Mwaqitana Kanatomoqo matague.”

³⁷ Kaiatanidiavo waidie Ieisu iekaivevena Temupolo naqeneye, we lavilavie inaqonaqo Koya Olibe waineye ikenokeno.

³⁸ Kawakawaiotoqe tomo'otoqa matatabudi inaqonaqo Temupolo waineye wayaqidi Ieisu navona inavevaneneqeni.