Luke 20 - Maiadomu

Ieisu naloina lamuna paipaina ivelautolieni

¹ Tamo kaiata Ieisu ilugu Temupolo malewina waineye ilalauguguya tomo'otoqa waidie. Tutuyanina iekaivevena waidie Valea Giamaina paipaina, tovelomuvo bwaigidi, loina kanatovekaivevenavo wete tomoqovo bwaigidi imai waineye wayaqidi inayaqaia.

² Ivelautolieni ivo, “Aitoi naloinaeqa togimwane wete tovegimwane kukwavinedi iluguaqeta Temupolo navikaie? Aitoi veluluna ivelemu mesaida kuvavalabubunedi?”

³ Ieisu ivesipupu ivo, “Naqaida velautoli tamo aivelautoliemi kwaibaivila waigue.

⁴ Aitoi Ioni loina iveleni tomo'otoqa ibabitaisodi? Banikodiqa, Yaubada waineye'eqa o tomo'otoqa waidie'eqa?”

⁵ Beqa ivelamu kaisekavadi ielautoliedi ivo, “Kago tanavo, ‘Yaubada loina iveleni,’ inavo, ‘Uvale Ioni ge kwadavetumaqaneni?’

⁶ We kago tanavo, ‘Tomo'otoqa loina iveleni,’ yoko dede gileueqa inanigeda paina ivetumaqana Ioni tamo Yaubada napalopita.”

⁷ Beqa Ieisu waineye ibaivila ivo, “Kima ge kadayagovi aitoi loina Ioni iveleni.”

⁸ Ieisu ivonedi ivo, “Yau mesaida, ge aivonemi aitoi veluluna wete loina ivelegu sakunidiavo avavalabubunidi.”

Vonawakedubala oine kanatanoqa kanatovekisabodaboda paipaidi

⁹ Matautauda Ieisu vonawakedubalaeqa ivesipupu tomo'otoqa waidie ivo, “Tamo tomoqo oine ibaguli tanoqa waineye. Mulineye tupwaidiavo tovekisabodaboda ikewadi dimadie natanoqa iyatoi inavekisabodebodeni, we inaqo kanikie inamiamia tutuya kaniakwanina.

¹⁰ We oine gumaqa kanatutuya ilekwa, tonitanoqanina tamo tolituqa ivetuneni inanaqo tovekisabodaboda waidie kanakalaqei inakewai tavinina waineye. We tovekisabodabodanidiavo ikavikavini, inigei, ivetuneni dimakavakavana ivila.

¹¹ Mulineye tonitanoqa wete tamo tolituqa ivetuneni, we inigei ivalabubuna-kapo waineye wete dimakavakavana ivetuneni ivila.

¹² Wete kanavetonu ivetuneni, veviqa bwaigina iveleni we itaweni iobu kalamulie.

¹³ “Beqa tonitanoqa inuanuana ivo, ‘Vakai aivalabubuni? Gunabeida ayagovi! Taunigu natugu nuapougu aivetuneni oge inavekimataneni.’

¹⁴ “We oine tovekisabodaboda ivo, ‘Dede gumanina tonitanoqa natuna, gumanina kawaie tonitanoqa inawapa tanoqa dede inakewai, beqa tainigei tailuvewapai. We oine kanatanoqa dede kida waideye inamiamia.’

¹⁵ Beqa tomoqonina ikavikavini itaweni iobu oine kanatanoqa mulineye iluvewapai.” Ieisu navonawakedubala ivekakavai tomo'otoqa waidie ivelautoliedi ivo, “Banikodiqa tonitanoqa inavalabubunedi?

¹⁶ Inamai tanoqa kanatovekisabodabodavo inaluvewapadi, we oine kanatanoqa inakalaqeieni malitomo'otoqa waidie.” Tutuyanina tomo'otoqa Ieisu navona inoqai ivesipupu ivo, “Aiaa! Mwaunina Yaubada idaketobodeni ge inasauyeni.”

¹⁷ Ieisu ikisakikikidi ivesipupu ivo, “Banikodiqa Buki Maqemaqetana navona kananuakawananaqai? “Vonanina ivo, ‘We gileu toyoqona ivedumwekaikaieni, Yaubada gunabeida gileunina iyatoi ivekunututu navanuqa waineye.’

¹⁸ “Yau gileunigu. Beqa aitoi ivedumwekaikaiegu mesaida gumanidiavo inabeku gileunina waineye inatutudabedabedi, we kago gileunina inabeku tabwadie inatutugudagudadi.”

¹⁹ Loina kanatovekaivevenavo wete tovelomuvo bwaigidi iyagovi gumanidiavo tovekisabodaboda dede vonawakedubalanina paipaidi iesipupu beqa kedakeda ilalauala Ieisu inakavikavini kaiatanina waineye, we yoko igololoyedi.

Takisi Sisa paipaina

²⁰ Me Diu kaditogumetavo wayaqidi Ieisu inakavekavini beqa ietonovi, we tokisavetovetonova mane iveledi kaditutula inanaqo Ieisu waineye dimaiseba velautolieqa inasiloloi. Kago ge inatutula-vekavekai togumetanidiavo inakavekavini inakalaqeieni Loma Gabemani naveluluna wete naloina waineye.

²¹ We imai nuatabwadieqa ivesipupu waineye ivo, “Tovekaivevena, kima kayagovimu komu tovona mwaqitana wete ge kudanuanuana tamo aitoi kanawavaqa bwaigina paipaina, tomo'otoqa bwaigidi o tomo'otoqa maimaiqa ge kudaketovegeidi, we kaia muvona wete muvekaivevena tonotonovina Yaubada nakeda paipaina.

²² Beqa kaivelautoliemu, kida ilaubwaineda takisi taiyato Sisa waineye o gebuka?”

²³ Tokisavetovetonova divelautoli lamuna wayaqidi Ieisu Sisa idakawakapoyeni idanoqai idanaqo toloinavo waidie idasimana. We Ieisu dinuanuana gunabeida iyagovidi iekautovona inasiloloi beqa ivo,

²⁴ “Dinali kwamaieni kwavelegu aikiseni. Aitoi kanununa wete kanawavaqa?” We ivo, “Sisa.”

²⁵ Beqa Ieisu ivonedi ivo, “Vakai Sisa paipaina Sisa waineye kwaikalaqei, we vakai Yaubada paipaina Yaubada waineye kwaikalaqei.”

²⁶ Tokedagumetanidiavo ge kadisala tamo vakai inavalabubuni beqa Ieisu inasiloloi inakatupoe tomo'otoqa matadie. Ieisu nabaivela'eqa nuadi ivilele beqa ivekwadamo.

Towapa ditovoi vaituqana paipaina

²⁷ Sadusivo dinuanuana nigodibei tovoi vaituqana gebuka. We tupwaidiavo imai Ieisu waineye ivelamu ielautolieni ivo,

²⁸ “Tovekaivevena, basenaqaida Mosese kadaloina igililia ivo, ‘Kago tamo tomoqo inawapa we ge menatunavo, kwabulina taina inanaqidi we tutuyanina inavenatuna gwagwamanidiavo mesaida tatana natunavo.’

²⁹ Tamo tomoqo metainavo kadikuma 7 taiauda imiamia. Tomwayai inaqidi iwapa we ge menatuna.

³⁰ Wete taina kanaveluqa vavinenidi inaqidi, iwapa we ge tamo menatuna

³¹ Kadivetonu wete mesaida. Kadikuma 7-nidiavo vavinenidi inaqidi iwapa we ge tamo aitoi menatuna.

³² Kabavekakava vavine iwapa.

³³ Beqa wayaqima kivonema kaiyagovi kawaie tovoi vaituqana waineye vavinenidi aitoi mwanedi, paina kadikuma 7 inaqidi?”

³⁴ Ieisu ibaivila ivo, “Tomo'otoqa kasiotoqa pwayepwayeye imiamia, tomoqovo wete vevine, inaqinaqi.

³⁵ We tomo'otoqanidiavo kawaie Iave inakawagiagiamaiedi inatovoi-vaituqana inalugu abame inamiamia divalabubuna sulina we naqi gebuka.

³⁶ Gumanidiavo ge wete inawapa mesaida anelose we Yaubada natunavo paina inasivetovoidi wapaeqa.

³⁷ “Komi kwaivesipupu kwavo, ‘Towapa ge inatovoi vaituqana,’ we aivonemi komi kwakatupoe. Kago Mosese kanagiligilili kwadawawai-vekavekaia kwadakiseni towapa inayawasa-vaituqana. Basenaqaidaotoqa Iave ivesipupu-luguaqeta Mosese waineye welavi siaina ikalakalata waineye'eqa ivo, ‘Yau Ebelamo, Aisake, wete Iakobo di Yaubada.’ Tomoqovonidiavo iwapa, we deqoina meyawaidi imiamia Yaubada taiauda.

³⁸ Yaubada ge tomo'otoqa wapadi di Yaubada, we tomo'otoqa meyawaidi di Yaubada. Beqa tutuyanina komi kwavo, ‘Towapa ge inatovoi-vaituqana,’ komi kaia kwakatupoe-otoqa.”

³⁹ We tupwaidiavo loina kanatovekaivevenavo Ieisu navona inoqai ivesipupu ivo, “Tovekaivevena, kuvona-mwaqitana.”

⁴⁰ We mulineye tomo'otoqa igololo beqa ge tamo aitoi menanuavatu inavelautoli-katupoe Ieisu waineye.

Velautoli Mesaia paipaina

⁴¹ Ieisu tomo'otoqa ivelautoliedi ivo, “Tomo'otoqa ivesipupu ivo, ‘Mesaia Deibida tubuleleleqina.’ Uvale mesaida ivesipupuyedi?

⁴² Basenaqaida Deibida taunina igililia Buki Same waineye Mesaia paipaina ivesipupu ivo, “ ‘Iave ivona gu Tomwaya waineye ivo, Kumiabui kataqigue vikai vekivekimatanina waineye,

⁴³ kanaketoava kamutalavualavo aivelulunapeledi we aiyatodi muloina matakwanineye.’

⁴⁴ “Gilili waineye Deibida kaisena Mesaia iqoleni Tomwaya, beqa banikodiqa Mesaia Kini Deibida tubuleleleqina?”

Ieisu loina kanatovekaivevenavo paipaidi ivesipupu

⁴⁵ Yoko bwaigina Ieisu ievaneneqeni, we kanatovemulivo ivonedi ivo,

⁴⁶ “Taunimi kwavekisabodebodemi, ge kwaivalabubuna mesaida loina kanatovekaivevenavo. Gumanidiavo wayaqidi kaleko kaniakwanidi inakwesenidi inasasasala maketie kavagi tomo'otoqa inakisedi medivekimatana inavonamwasamwasenedi. Wayaqidi kabamia giamaidi tomo'otoqa matadie inamialagalaga sinagogi naqedie, wete wayaqidi kani bwaigidi waidie matadie inamiabui tomo'otoqa vesivesinuadi taiauda.

⁴⁷ Gumanidiavo kwabukwabulavo inakatupwaiedi divanuqa wete disakuvo inakwayedi, wete divelaukui ilalaukaniakwanidi kavagi tomo'otoqa inakisedi inakawatonotonovedi. We kamukabeida kadikaimatavuloqa bwaigiotoqina Yaubada inaveledi!”