Luke 2 - Maiadomu

Ieisu natubuqa

¹ Tutuyanina Ioni siaineye, me Loma iloloinedi me Diu divikaie. Ditoloina bwaigiotoqina kanawavaqa Sisa Agusitusi, iloina wayaqina tomo'otoqanidiavo imiamia Loma nakabaloina matatabuna waineye kadiwavaqa inagililidi senisisi paipaina.

² Dede loinanina ivelamu Loma gabemani Kuliniasi natutuya ietoloina Silia Polovinisi waineye.

³ We tomo'otoqa matatabudi inaqo kadituvadeye kadiwavaqa inagililidi senisisi paipaina.

⁴ We Iosepa isauyeni Kini Deibida namanuqa waineye'eqa imiamia Nasaleta taoni Galili Polovinisi naqeneye. Beqa itovoi inaqo Deibida kanatuvadeye kanawavaqa Bedeliema Iudia Polovinisi naqeneye.

⁵ Inaqo Meli taiauda, gumanina basenaqaida iveyagutaqonidi, kanatuvadeye kadiwavaqa inagililidi. No tutuyanina waineye Meli gunabeida ive'ina'inaqe.

⁶ Tutuyanina Bedeliema imiamia Meli ivebutudi paina ditutuya gunabeida imai.

⁷ We vanuqa ulatau iadaqa ge tamo lana waineye inalugu, beqa inaqo kaisaya ditutudaba waineye ivenatuna, we natudi diyagavau lamoqina itubuqa. Gwamana iumai kaleko sepidi beqa wete iveketobalai bulumakau kaditakula waineye.

Sipi kaditovekisabodabodavo inaqo Ieisu ikiseni

⁸ Lovane Bedeliema vivineye sipi kaditovekisabodabodavo yavoqidi iekisabodebodedi maleweye libi waidie.

⁹ We Iave na'anelose tamo isauyeni waidie Iave namaqeta mata'udu'udulina imaqetadi beqa igololo-otoqa.

¹⁰ We anelosenina ivesipupu ivo, “Ge kwaigololo. Yau valea giamaina amaieni waimie, beqa tomo'otoqa matatabumi kwaimwasana bwaigina.

¹¹ Kasiotoqa kami Toketoyavu itubuqa Deibida kanatuvadeye Bedeliema waineye, gumanina Mesaia, da Tomwaya.

¹² Kwaikisakinanai dede kiakiayanina beqa: kwaikiseni gwamana mwedamwedalina iumai kaleko sepidi beqa bulumakau kaditakula waineye ivekenovi.”

¹³ Anelosenina ivesipupu ikakava vedimadimanaeqa anelose yoko bwaigina isauyedi abame'eqa we taiauda matatabudi Yaubada ididigeni ivo,

¹⁴ “Abama tabwaotoqineye Yaubada taididigeni, wete pwayepwayeye tomo'otoqanidiavo paipaidi Yaubada imwasana inamia-niwalova.”

¹⁵ Tutuyanina anelosenidiavo ikiawedi ivila abame sipi kaditovekisabodabodavo kaisediqa ivesipupu ivo, “Tainaqo Bedeliema sakunina gunabeida isauyeni paipaina Iave ivoneda taikiseni.”

¹⁶ Beqa itovoi vedimadimanaeqa inaqo Meli wete Iosepa ibabanedi we gwamana ikiseni bulumakau kaditakula waineye iveketobalai ikenokeno.

¹⁷ Tutuyanina gwamananina ikiseni ikakava, isimanaluguaqetedi inana, tamana wete tomo'otoqa matatabudi waidie vakai anelose ivonedi gwamananina paipaina.

¹⁸ We tomo'otoqa matatabudi valeanina inoqai nuadi ivilele sipi kaditovekisabodabodavo divona paipaina.

¹⁹ We Meli vonanidiavo matatabuna inuapwatedi paipaidi ienuana.

²⁰ Sipi kaditovekisabodabodavo ivila dikaisayavo waidie Yaubada ididigeni wete isisilagai vakai ikisedi wete inoqaidi paipaidi, paina anelose navona waidie kanamwaqitana ikiseni.

Ieisu kanawavaqa iqoleni

²¹ Gwamana natubuqa waineye'eqa imiana kaiata 8 waineye bunu kanagusu ivalabubuni wete kanawavaqa iqoleni Ieisu. Basenaqaida Meli giladi ge idave'ina'inaqe, anelose wavaqanina iveleni.

Meli wete Iosepa Ieisu inaweni Temupolo waineye

^22-24 Meli divegabu kanatutuya gunabeida ikakava, beqa Meli wete Iosepa wayaqidi inalaga inanaqo Temupolo Ielusalema waineye Meli kadikawagiagiamai paipaina wete Ieisu kanavonavenapwayewa paipaina. Meli kadikawagiagiamai paipaina manuqa kailuqa inawedi inakalaqeiedi Iave waineye mesaida Mosese naloina igililia ivo, “Malasi kailuqa o bunetutu siaidi kailuqa kwainigedi kwaivelomuyedi Iave waineye gwamana inana kadigiavemaqeta paipaina.” Ieisu kanavonavenapwayewa paipaina inaweni Temupolo waineye we inakalaqeieni Iave waineye mesaida Mosese naloina igililia ivo, “Gwagwama lamoqidiavo mitomwayai tamoqana tamoqana kwaikalaqeiedi Iave waineye.” Beqa Iosepa, Meli wete gwamana taiauda inaqo Ielusalema waineye dede sakunidiavo paipaidi.

Simioni navonavaqata

²⁵ Tutuyanina waineye tamo tomoqo imiamia Ielusalema, kanawavaqa Simioni. Gumanina tomoqo tonotonovina wete tovekimatana Yaubada waineye, we ilalaugamasa Mesaia namai paipaina me Isileli inaketoyavudi. Vaitabu Maqemaqetana iveadaqi,

²⁶ we iveveni naqaida Iave kanavesivesinua Mesaia inakiseni mulineye inawapa.

²⁷ Kaiatanina waineye Vaitabu Maqemaqetana Simioni ivoneni ilugu Temupolo naqeneye, we Ieisu inana wete tamana imaieni inakalaqeieni Iave waineye mesaida Mosese naloina naqona.

²⁸ Simioni ibabanedi, Ieisu ikavalai Yaubada ididigeni ivesipupu ivo,

^29-32 “Tomwaya, mesaida muvonadabadaba waigue matagueqa gwamana dede akiseni. Gumanina kama Toketoyavu kuvalabubuni tomo'otoqa matatabuma paipaima kaikiseni. Mesaida maqeta gumanina Komu isiluguaqetemu gumanidiavo Denitali waidie beqa munuanuana inayagovi, wete kima mutomo'otoqavo me Isileli kamadidiga kaibababaneni gwamananina waineye! Beqa deqoina mutolituqa kitagwanegu megumwasana niwalovaeqa aiwapa.”

³³ Meli wete Iosepa nuadi ivilele Simioni navona Ieisu paipaina.

^34-35 Mulineye Simioni ivonavenapwayewedi we Meli ivonedi ivo, “Gwamana dede Yaubada ivesinueni beqa waineye'eqa me Isileli puedi ketoyavu inababaneni we kanatovedumwekaikai puedi inabeku wete kapoina inababaneni waineye'eqa. Gumanina kiakiaya Yaubada waineye'eqa, we puedi inakawakapoyeni kavagi dinuanuana vaigavu inalausimataledi. We komi Meli divedumwekaikai paipaina nuami inakapo-otoqa tadavona nuapoumi una idamwalamwalaqi.”

Ana divonavaqata

³⁶ Tutuyanina waineye tamo Yaubada napalopita imiamia Temupolo naqeneye kadiwavaqa Ana. Tamadi Penueli, Aseli namanuqa waineye'eqa. Gunabeida imokai-otoqa. Base tutuyanina kaniabadie inaqi imiamia diqaba 7 waineye mwanedi taiauda.

³⁷ We mwanedi iwapa ikwabula imiamia diqaba 84 ibabaneni. Ana Temupolo ge idakiakiaweni, we kaiata wete lovana isobwasobwanu Yaubada waineye, ielaukui wete iekudiqana kani waineye'eqa kavagi divelaukui inaveluluna.

³⁸ Tutuyanina Simioni iesipupu Meli wete Iosepa taiauda, Ana imai ivelamu Yaubada waineye iekaiwa, wete iesipupu tomo'otoqa matatabudi waidie Temupolo waineye gwamananina paipaina. Tomo'otoqanidiavo divona ievaneneqa Mesaia ilalaugamaseni, wayaqidi Ielusalema inaketoyavuya me Loma diloina waineye'eqa.

³⁹ Loinanidiavo Iave waineye imai, gunabeida Meli wete Iosepa ivalabubuna-kakavadi, mulineye ivila ditaoni Nasaleta Galili Polovinisi naqeneye.

⁴⁰ Ieisu itaulai veluvelulunina wete nuauya iveadaqi we Yaubada navenua'ina'inaqe waineye ikenokeno.

Ieisu ibabaneni Temupolo naqeneye

⁴¹ Diqaba kaitamoqana kaitamoqana Ieisu inana wete tamana ilagalaga Ielusalema Vesikaqalataqona Kanakani paipaina.

⁴² Tutuyanina Ieisu kanadiqaba 12 waineye taiauda ilaga kaninina waineye divalabubuna mesaida.

⁴³ We Ielusalema waineye imiamia kanaketoava kani ikakava, mulineye tomo'otoqa matatabudi ivila divikai waidie, we Ieisu Ielusalema imiamia. Tamana wete inana ge idayagovi.

⁴⁴ Dinuanuana ivo, “Oge edavo taiauda gunabeida inaqonaqo.” Inaqo kaiata kaitamoqana ikakava. Tutuyanina ilovane we Ieisu ge idababaneni, beqa ilauala disusuvo wete ediavo waidie.

⁴⁵ We tutuyanina ge idababaneni, beqa ivila inaqo Ielusalema ilaualeni.

⁴⁶ Kaiata kaitonu ikakava mulineye ibabaneni Temupolo naqeneye, diloina kaditovekaivevenavo taiauda imiabui imiamia. Taiauda iesipupu divona ievaneneqedi wete ielautoliedi.

⁴⁷ Tomo'otoqa matatabudi Ieisu navona inoqaidi ikiseni nayagova bwaigiotoqina wete inoqai nabaivila giamaidi wete tonotonovidi beqa nuadi ivilele.

⁴⁸ We inana tamana taiauda ikiseni nuadi ivilele, beqa inana ivesipupu ivo, “Natugu uvale dede mesaida kuvavalabubunedi, beqa memavenuapouviqa tamamu taiauda kalalaualemu?”

⁴⁹ Ieisu ivesipupu ivo, “Uvale kwalalaualegu? Ge kwadayagovi yau ilaubwainegu Tamagu navanuqe amiamia?”

⁵⁰ We inana tamana taiauda navona paipaina nuadi ge idakawananaqai.

⁵¹ Matautauda Ieisu inana wete tamana taiauda ivila inaqo Nasaleta waineye divona iematamatanedi. We inana sakunidiavo matatabudi paipaidi nuapoudie inuanuanidi.

⁵² Ieisu itataulai, mebununa wete menayagova, mekanavenua'ina'inaqe Yaubada waineye'eqa wete tomo'otoqa waidie'eqa.