Luke 19 - Maiadomu

Sakiusa navetumaqana Ieisu waineye ketoyavu ibabaneni

¹ Ieisu gunabeida ilekwa Ieliko taoni gamwaneyemo inaqonaqo.

² We taoninina waineye tamo tomoqo kanawavaqa Sakiusa imiamia. Gumanina takisi kanatokewa kaditogumeta wete tamo toveguyoguyo.

³ Tutuyanina Ieisu itauya inaqonaqo, Sakiusa wayaqina inakiseni gumanina aitoi, we ge kanasala paina tomoqo kalakusana wete yoko bwaigina itovoibodebodeni.

⁴ Beqa ilaukwavina igumeta inaqo tamo welavi bwaigina kanawavaqa sikwamole keda doleneye itovotovoi, ilaga tabwaneye kavagi kanasala Ieisu inakiseni.

⁵ Tutuyanina Ieisu vikainina waineye ilekwa, ikisalaga ikiseni ivoneni ivo, “Sakiusa, kuvedimadimana kuobuma. Kasiotoqa komu wete yau muvanuqe taisikauqa.”

⁶ Sakiusa vedimadimanaeqa iobuma menamwasana Ieisu ikewai inaweni navanuqe.

⁷ We tomo'otoqa matatabudi ikiseni Ieisu inaqo takisi kanatokewa navanuqa waineye, beqa ibwadu ivo, “Aiaa! Gumanina inaqo tokapoina navanuqa naqeneye ilugu nigo gumanina kana'ulatau.”

⁸ Beqa Sakiusa itovoi Ieisu mataneye ivoneni ivo, “Tomwaya, aivonemu guyoguyo matatabuna aiketovegeia bou kailuqa. Bou tamo yomuyomudi aiveledi we saiqana taunigu paipaigu. Wete base katupoe'eqa tomo'otoqa dimane akewamaiqidi aiveviladi kanabou mesaida pulina aiveledi.”

⁹ We Ieisu ivoneni ivo, “Kasiotoqa ketoyavu imai vanuqa dede kanatomia waidie kanalaubwaina, paina tomoqo dede Ebelamo tubuleleleqina.

¹⁰ We Yau Mwaqitana Kanatomoqo amai vuyovuyodi ailaualedi aiketoyavudi mesaida tomoqo dede.”

Ieisu ivonawakedubala tolituqa giamaidi wete kapoidi paipaidi

¹¹ Tutuyanina tomo'otoqa ievaneneqa Ieisu ivelamu vonawakedubalaeqa iesipupu, paina tomo'otoqa dinuanuana saiqanaqa Ieisu inalekwa Ielusalema we Yaubada Nakabaloina inavelamu.

¹² Beqa Ieisu ivesipupu ivo, “Tamo toloina bwaigina inanaqo kanikie tamo kabaloina waineye inasilagai inavekini taunina napolovinisi paipaina, mulineye inavila-vaituqana inamai navikaie inaloina.

¹³ Natolituqavo kadikuma 10 iqolekauqidi imai waineye, tamoqana tamoqana seluba 100 iveledi wete ivonedi ivo, ‘Seluba dede kwaivelituqedi kwaikavesulaidi kanaketoava aivila aimai.’ Dede mesaida ivalabubuna mulineye itauya.

¹⁴ “We tomoqonina natomo'otoqavo ivedumwekaikaieni, beqa tutuyanina inaqonaqo valea ivetuneni kini bwaigina waineye ivo, ‘Kima ge wayaqima dede tomoqonina waimeye inavekini.’

¹⁵ “We tomoqonina ivekini napolovinisi paipaina mulineye ivila imai navanuqe. Tutuyanina ilekwa natolituqavo iqoledi imai waineye, gumanidiavo basenaqaida seluba iveledi. Wayaqina inayagovi kaivia seluba kavesulai ibababanedi.

¹⁶ “We tolituqa gumegumetana imai itovoi ivo, ‘Tomwaya, base seluba 100 kuvelegu, avelituqeni kanakavesulai dede seluba 1,000 ababaneni.’

¹⁷ “Natomwaya ivoneni ivo, ‘Giamaina, komu tolituqa giamaimu mekamuvetumaqana. Paina saku siaina kuvekisabodeboda-vekavekaieni, beqa aiyatomu taoni bwaigidi 10 kivekisabodebodedi.’

¹⁸ “We tomoqo kanaveluqa imai ivo, ‘Tomwaya, base seluba 100 kuvelegu, avelituqeni kanakavesulai dede seluba 500 ababaneni.’

¹⁹ “Natomwaya ivoneni ivo, ‘Giamaina, aiyatomu taoni bwaigidi 5 kivekisabodebodedi.’

²⁰ “Matautauda tolituqa kadivetonu imai ivo, ‘Tomwaya, seluba 100 kuvelegu sideqoina, aumai kalekoeqa aekisabodebodedi.

²¹ Ayagovi muloina pakalina, beqa agololoyemu. Tupwaidiavo tomo'otoqa mane paipaina ilituqa, we manenina kukewakewadi wete ge kudabagubagula we kutavitavimo tupwaidiavo tomo'otoqa dibagulaeqa.’

²² “Natomwaya ivoneni ivo, ‘Komu tolituqa kapoimu! Muvonanina beqa kamuloina aivelemu. Kuyagovi yau guloina pakalina wete kuvesipupu yau tomo'otoqa disaku akewakewadi wete ge adabagubagula we atavitavimo tupwaidiavo tomo'otoqa dibagulaeqa.

²³ Beqa uvale gumane ge kudayatoi beniki waineye, kavagi tutuyanina avila amai gumane mekanakavesulai adakewai?’

²⁴ “Tomwayanina tomo'otoqa ivonedi ivo, ‘Seluba 100 waineye kwaikewai, we tolituqa gumegumetana seluba 1,000 gumanina waineye kwaiveleni.’

²⁵ “We navona ibaivilai ivo, ‘Tomwaya, gunabeida seluba 1,000 ikenokeno waineye.’

²⁶ “Wete divona ibaivilai ivo, ‘Aivonemi, kago aitoi kanakalaqei waineye'eqa inalituqa-giagiamai kavesulai inababaneni, we aitoi kanakalaqei ge inalituqa-giagaimaia kalaqeinina siaina inakewayavuleni waineye'eqa.

²⁷ We tovedumwekaikainidiavo basenaqaida ivona ge wayaqidi aivekini waidie, kwaimaiedi kwailuvewapadi matague.”

Ieisu ilugu Ielusalema mesaida Kini

²⁸ Tutuyanina Ieisu ivesipupu-kakava tomo'otoqa waidie igumeta inaqo Ielusalema.

²⁹ Saiqanaqa inalekwa taoni kailuqa waidie Bedipegi wete Bedani Koya Olibe debapouneye, Ieisu kanatovemulivo kadikailuqa ivetunedi inagumeta.

³⁰ We ivonedi ivo, “Kwanaqo taoni matadeye. Tutuyanina kwailekwa kwailugu, doniki natuvauna kwaikiseni no waineye italaipweni, ge tamo aitoi idadodoqatovoni. Kwayavuya kwamaieni waigue.

³¹ We kago aitoi inavelautoliemi inavo, ‘Uvale kwayavuyavuya?’ Kwanavo, ‘Tomwaya wayaqina.”

³² Tovemulinidiavo kadikailuqa inaqo vakai Ieisu ivesipupuyeni mesaida ibabaneni.

³³ Tutuyanina doniki iyavuyavuya, tonikaisayanidiavo ivo, “Uvale doniki kwayavuyavuya?”

³⁴ We tovemulivo ivo, “Tomwaya wayaqina.”

³⁵ Beqa doniki imaieni Ieisu waineye, kadikalekoeqa doniki dumwena iesoi, we Ieisu isilagai imiabui doniki dumweneye.

³⁶ Tutuyanina inaqonaqo tomo'otoqa puedi medivekimatana kadikalekoeqa keda iesoi.

³⁷ Tutuyanina ilekwa Koya Olibe debapouneye wete no waineye keda iobuobu Ielusalema paipaina, kanatovemulivo puedi medivekaiwa bonadi bwaiginaeqa Yaubada ididigeni kabanuavilele matatabudi Ieisu ivalabubunidi paipaidi.

³⁸ Ivelamu ieqoleqole ivo, “Ma Kini, Iave kanawavaqaeqa kumai. Yaubada ivonavenapwayewemu! Tomia'abama medimwasana inamia-niwalova, Yaubada abama tabwaotoqineye kaidididigeni.”

³⁹ We tupwaidiavo Palisivo yoko waidie'eqa Ieisu ivoneni ivo, “Tovekaivevena, kamutovemulivo kuyaqaidi inavekwada.”

⁴⁰ Ieisu divona ibaivilai ivo, “Aivonemi, kago gumanidiavo inavekwada, gileu bonadi bwaiginaeqa inadidigegu.”

Ieisu ilaumataqeu Ielusalema paipaina

⁴¹ Tutuyanina Ieisu ilekwa Ielusalema viviotoqineye ikiseni, menanuakapo mataqeuna ilailolo.

⁴² Wete ivesipupu ivo, “O Ielusalema kanatomianavo, wayaqiotoqigu deqoina kwadayagovi banikodiqa kwadavalabubunedi kavagi mimia idavegiagiamai. We paina Yaubada ivaigavuyeni waimie, ge kanasala kwaiyagovi.

⁴³ Tamo tutuya inasauyeni waimie kamiqaviavo inamai inatovoi-velauvivilemi wete inatovoibodemi. Mitaoninina kalakalana wete pakalina, we kamiqavianidiavo kalamulie'eqa pwayapwaya ina'ivuya inalaga, no waineye'eqa inalaga inalugua matautauda inaleomi.

⁴⁴ Inaluvelakovimi ge tamo aitoi inaluvetupwai. Mitaoni wete kalanina matatabuna inaqeudi, ge tamo gileu nakabamia waineye inamiamia. Mwaunina inasauyeni waimie paina tutuyanina Yaubada imai wayaqina inaketoyavumi we komi ge kwadakinanai.”

Ieisu inaqo Temupolo waineye

^45-46 Tutuyanina Ieisu ilugu Temupolo malewina naqeneye ikisedi tomo'otoqa puedi disakuvo iegimwaneyedi. Beqa matatabudi ikwavinedi we ivonedi ivo, “Basenaqaidaotoqa igililia Yaubada Nabuki waineye, Yaubada ivesipupu ivo, ‘Guvanuqa kanawavaqa vanuqa kabavelaukui,’ we komi kwasivilai tovainaqo dikabavaigavu.”

⁴⁷ Kaiata tamoqana tamoqana Ieisu iekaivevena Temupolo malewina naqeneye. Tovelomuvo bwaigidi, loina kanatovekaivevenavo wete tomo'otoqa kaditogumetavo matatabudi wayaqidi inaluvewapai.

⁴⁸ Kanaluvewapa kanakeda ilauala-wayoqeni paina tomo'otoqa matatabudi navesipupu ievaneneqeni ge wayaqidi tamo navona inavebebekuya.