Luke 18 - Maiadomu

Ieisu ivonawakedubala velaukui veluveluluna paipaina

¹ Matautauda Ieisu vonawakedubalaeqa ivekaivevena kanatovemulivo waidie beqa tutuya puena inaelaukui we ge inavekwada.

² Ieisu ivesipupu ivo, “Tamo taoni waineye tamo loina kanatokalaqei Yaubada ge idavekimataneni wete tomo'otoqa paipaidi ge idanuanua.

³ We taoninina waineye tamo kwabula imiamia. Tutuya puena inaqonaqo toloinanina waineye ielaukui ivo, ‘Tamo tomoqo ivavalabubuna-kapo waimeye, wayaqima muloina beqa kudakaivaisema.’

⁴ Tutuya kaniakwanina toloinanina ibaibaila ge wayaqina inakaivaisedi, mulineye iloqi nanuanuana isivilai ivo, ‘Yaubada ge adavekimataneni wete tomo'otoqa paipaidi ge adanuanuana,

⁵ we kwabulanidi paipaidi akabiawa beqa aikaivaisedi. Kago ge ailoina beqa kaivaisa inababaneni, tutuya puena inamai-vaivaituqana waigue inakiveloqiloqigu.”

⁶ Matautauda Ieisu ivonedi ivo, “Kwainuani loina kanatokalaqeinina navona paipaina, oge banikodiqa gumanina tokapoina we kwabulanidi ikaivaisedi.

⁷ Beqa mwaqitanaotoqa Yaubada natomo'otoqa vesivesinuadi inakaivaisedi, gumanidiavo lovana wete kaiata ielaukui-veluveluluna kaivaisa paipaina. Gumanina ge inavemumuna.

⁸ We aivonemi inaloina nanuanua tonotonovidi'eqa kavagi vedimadimanaeqa kaivaisa inababaneni. We tutuyanina Yau Mwaqitana Kanatomoqo aivila-vaituqana aimai kaivia tomo'otoqa medivetumaqana aibabanedi pwayepwayeye?”

Ieisu ivonawakedubala Palisi wete takisi kanatokewa divelaukui paipaidi

⁹ Tomo'otoqa tupwaidiavo dinuanuana gumanidiavo kaisedi tonotonovidi, we ediavo matatabudi ikisataqonidi, beqa Ieisu ivonawakedubala paipaidi.

¹⁰ Ivo, “Tomoqovo kadikailuqa ilugu Temupolo waineye inavelaukui. Tamo Palisi we tamo takisi kanatokewa.

¹¹ Palisi kaisena itovoi ivelaukui ivo, ‘Yaubada, avekaiwa waimue paina guvalabubuna ge tupwaidiavo tomo'otoqa mesaida gumanidiavo tovainaqo, tokapoina wete togimala. We avekaiwa bwaigina paina yau ge dede takisi kanatokewa mesaida!

¹² Wiki kaitamoqana kaitamoqana naqedie kaiata kailuqa naqedie aekudiqana, wete vakai matatabuna akewadi aketovegeidi kanayoko 10 we tamoqana akalaqeieni waimue.’

¹³ “We takisi kanatokewa kanikie itovoi ge wayaqina inakisalaga abame we menavovomayamayaqa nuapouna itutuya ielaukui ivo, ‘Yaubada, yau tokapoina, kudavenua'ina'inaqeyegu.”

¹⁴ We Ieisu ivesipupu ivo, “Aivonemi, takisi kanatokewanina Yaubada ikawatonotonoveni inaqo navanuqe, we Palisi gebuka. Meqavoi taunidi inasilagaidi Yaubada inasiobuyedi, we meqavoi taunidi inasiobuyedi Yaubada inasilagaidi.”

Ieisu gwagwama ivonavenapwayewedi

¹⁵ Tomo'otoqa tupwaidiavo gwagwama imaiedi Ieisu waineye wayaqidi dimana inayatoi waidie inavonavenapwayewedi, we tutuyanina kanatovemulivo gumanidiavo ikisedi iyaqaidi.

¹⁶ We Ieisu gwagwamanidiavo ivonedi inamai waineye we ivo, “Gwagwama ge kwaiketobodedi. Kwatagwanedi inamai waigue, paina gumanidiavo tonuaobu mesaida gwagwama dede kanasala taunidi inatagwanedi Yaubada inaloinedi.

¹⁷ Yau avona-mwaqitana, kago tamo tomo'otoqa ge inamwasana wete ge inatagwana Yaubada inaloineni mesaida gwagwamanidiavo, ge kanasala Yaubada Nakabaloina waineye inalugu.”

Tomoqo guyoguyona

¹⁸ Tamo me Diu kaditogumeta Ieisu ivelautolieni ivo, “Tovekaivevena Giamaimu, vakai aivalabubuni yawaina vaqata aibabaneni?”

¹⁹ We Ieisu ivo, “Uvale kuqolegu giamaina? Ge tamo aitoi giamaiotoqina, kaia Yaubada kaisena giamaiotoqina.

²⁰ Gunabeida Yaubada naloinavo kuyagovidi: ‘Ge kigimala, ge kiluvewapa, ge kivainaqo, ge tomo'otoqa vonakatupoe'eqa kivemwauya, wete tamamu inamu kivekimatanedi.”

²¹ We tomoqo ibaivila ivo, “Gututuya gwamana waineye'eqa kanaketoava deqoina dede loinanidiavo avemuliedi.”

²² Tutuyanina Ieisu inoqai ivoneni ivo, “Valabubuna tamoqana ge kudavalabubuni. Kunaqo muvanuqe, musaku puepuena kivegimwaneyedi, manena kikalaqeiedi yomuyomudi waidie, matautauda kawaie abame Yaubada kamubaivila inavelemu. Mulineye, kimai kivemuliegu.”

²³ We tutuyanina tomoqo Ieisu navona inoqai nuana ikapo, paina naguyoguyo puedi, ge wayaqina nasakuvo puedi inavegimwaneyedi wete inakalaqeiedi.

²⁴ Ieisu tomoqo ikiseni nuana ikapo beqa ivo, “Mwaqitana, gumanidiavo disakuvo boudi dilugu Yaubada Nakabaloina waineye mwau'otoqina waidie.

²⁵ Kameli nalugu yaima matana waineye mwauna, we toveguyoguyo dilugu Yaubada Nakabaloina waineye mwau'otoqina.”

²⁶ Tomo'otoqanidiavo Ieisu navona inoqai ivoneni ivo, “Aiaa! Kago dede mesaida, ge tamo aitoi ketoyavu inababaneni!”

²⁷ Ieisu divona ibaivilai ivo, “Tomo'otoqa ge kanasala taunidi inaketoyavudi, we Yaubada kanasala vakai puepuena inavalabubuni, wete Yaubada kanasala inaketoyavudi.”

²⁸ Matautauda Pita Ieisu ivoneni ivo, “Kima banikodiqa? Gunabeida vakai matatabuna kabailedi, we kavemuliemu.”

²⁹ Ieisu ivonedi ivo, “Avona-mwaqitana waimie, aitoi navanuqa, mwanena, tainavo, novunavo, inana, tamana, natunavo inabailedi matautauda inamai inavemuliegu Yaubada Nakabaloina paipaina,

³⁰ yawaina waineye Yaubada inabaivilai, wete kanabaivilanina inakavesulaia, we kamukabei yawaina vaqata inababaneni.”

Ieisu ivesipupu kanavetonu nawapa paipaina

³¹ Ieisu kanatovemulivo kadikuma 12 ivonedi taiauda inaqo sulidie ivonedi ivo, “Aivonemi, tailaga Ielusalema waineye saku matatabuna base Yaubada napalopita igililia Mwaqitana Kanatomoqo paipaigu kanamwaqitana inasauyeni waigue.

³² Inakalaqeiegu Denitali waidie inasaidibiegu, inalotomwasi'iegu wete inagiwaligu.

³³ Kabakaipitala beqa inanigegu inaluvewapagu, we kaiata kanavetonu waineye wapaeqa aitovoi-vaituqana.”

³⁴ We tovemulivo navona ge idanuakawananaqaia. Kananuakawananaqai Yaubada ivaigavuyeni beqa vakai ivesipupuyedi ge kadisala inayagovi.

Ieisu tovelaukui matana pwalupwaluna ikavegiagiamaia

³⁵ Ieisu enavo taiauda saiqanaqa inalekwa Ieliko, we tamo tomoqo matana pwalupwaluna ibabaneni kedeye imiabui ielaukui mane paipaina.

³⁶ Tutuyanina yoko ilekwa inaqonaqo, tomoqonina bonadi inoqai beqa ivelautoli ivo, “No vakai isasauyeni?”

³⁷ We tomo'otoqa ivoneni ivo, “Ieisu tomoqo Nasaleta imai inaqonaqo.”

³⁸ Itoge iveqole ivo, “Ieisu, Deibida tubuna, kudavenua'ina'inaqeyegu.”

³⁹ We tomo'otoqanidiavo igumegumeta iyaqaia ivo, “Kuvekwada!” We kaia ieqolemo bonana bwaiginaeqa ivo, “Deibida tubuna, kudavenua'ina'inaqeyegu!”

⁴⁰ Ieisu bonana inoqai itovoi ivo, “Tomoqonina kwamaieni waigue.” Tutuyanina imai vivineye Ieisu ivelautolieni ivo,

⁴¹ “Vakai wayaqimu aivalabubuni waimue?” We ibaivila ivo, “Tomwaya, wayaqigu matagu inavegiagiamai kavagi aikisa-vaituqana.”

⁴² Ieisu ivesipupu waineye ivo, “Kukisa-vaituqana! Muvetumaqanaeqa kuvegiagiamai.”

⁴³ We vedimadimanaeqa matana ivegiagiamai, Ieisu ivemulieni Yaubada idididigeni. Tutuyanina tomo'otoqa ikiseni wete Yaubada ididigeni.