Luke 17 - Maiadomu

Kapoina paipaidi

¹ Ieisu kanatovemulivo waidie ivesipupu ivo, “Kabaketotovona puedi ikenokeno waidie'eqa tomo'otoqa inakapoina. We kago aitoi tamo tomoqo inaweweseni inakapoina, kabanuakapo waineye paina kawaie mwau bwaigiotoqina inababaneni.

² Kago towewesa tamo aitoi mesaida dede gwamana siaina inaweweseni kapoina waineye inabeku, Yaubada towewesanina inakaimatavuloqi, we Yaubada nakaimatavuloqa bwaigaotoqina matautauda tomo'otoqa dikaimatavuloqa. Tamo kabakisa dede mesaida: kago gileu tageyoina towewesanina kodoneye inalaipweni ligwagweye inataweni inaobu, no kaimatavuloqanina saiqanaqa.

³ Beqa taunimi kwaivekisabodebodemi! “Kago tamo iamu kapoina inavalabubuni waimue, kivonamatapouyeni we kago inanuavila nakapoina waineye kinuataqoni.

⁴ “Munuataqona emwavo waidie ge inakakava. We kago iamu kaiata tamoqana naqeneye kapoina 7 inavalabubunidi waimue, namai tamoqana tamoqana waimue inavo, ‘Avovomayamayaqa guvalabubuna paipaina kudanuataqonigu,’ bonana kinoqai kinuataqoni.”

Vetumaqana paipaina

⁵ Beqa apositolovo Tomwaya ivoneni ivo, “Wayaqima mavetumaqana kudagiaveluvelulunidi.”

⁶ We ibaivila waidie ivo, “Kago mivetumaqana kanabwaiga mesaida kailugu bilana, kanasala welavi bwaigina dede kwadavoneni kwadavo, ‘Kukawayabumu kunaqo ligwagweye kutovoi,’ we mivona inavematamatani.”

Tolituqa navalabubuna

⁷ Wete Ieisu ivesipupu waidie ivo, “Kago waimie'eqa tamo aitoi menatolituqa, tolituqanina inabagubagula o sipi inaekisabodebodedi, tutuyanina inavila inamai vanuqe kanatoloina banikodiqa inavesipupuyedi waineye? Oge inavo, ‘Vedimadimanaeqa, kumai kumiabui kukani?’

⁸ Anuani gebuka. We kaia inavo, ‘Kagu kivalabubuni, kabalituqa kanatalauma kisilagai kagu wete kagulukai kimaiedi kimimiagamatagu aikani wete aiyemu inakakava mulineye komu kikani wete kiyemu.’

⁹ Toloina ge inavekaiwa natolituqa waineye, paina tolituqa ilaubwaineni kaia mesaida kanatoloina ivoneni lituqanina inavalabubuni.

¹⁰ Beqa komi mesaida tutuyanina kwaivematamatanegu kwanavo, ‘Kima kaia mutolituqavo, banikodiqa mesaida kuvonema kaia lituqanina kavalabubuni.”

Tomo'otoqa 10 mekadiviqa lepelo Ieisu ikavegiagiamaidi

¹¹ Tutuyanina Ieisu inaqonaqo Ielusalema waineye, ilekwa Galili wete Samelia divikai kanakabavekakava waineye.

¹² Saiqanaqa inalekwa tamo taoni siaina waineye, tomoqovo 10 mekadiviqa bunudie kanawavaqa lepelo ibabanedi itovotovoi kanikie'eqa.

¹³ We ieqole bonadi bwaiginaeqa ivo, “Ieisu, Tomwaya, kudavenua'ina'inaqeyema!”

¹⁴ Beqa Ieisu ikisavilai ivonedi ivo, “Kwainaqo tovelomu waidie, taunimi kwaivekaivevenemi kavagi inakisemi viqanina gunabeida ikakava.” Tomoqovonidiavo itauya inaqonaqo kedeye kadiviqa lepelo ikakava ivegiagiamai.

¹⁵ Matatabudi taunidi ikisedi gunabeida ivegiagiamai, we tamo iadi menamwasana ivila imai Ieisu waineye Yaubada ididigeni bonana bwaiginaeqa.

¹⁶ We menavekimatana isobwanu Ieisu kaqena vivineye ivekaiwa waineye. Gumanina Samelia tomoqina.

¹⁷ Ieisu ivo, “Tomoqovo 10 akavegiagiamaidi we 9 vakaiebeida?

¹⁸ Tomoqovonidiavo 9 me Diu we Samelia tomoqina kaisena ivila imai ivekaiwa Yaubada waineye.”

¹⁹ Beqa Samelia tomoqina ivoneni ivo, “Kutovoi kunaqo muvetumaqana ikavegiagiamaimu.”

Yaubada Nakabaloina kanatutuya namai paipaina

²⁰ Tamo tutuya tupwaidiavo Palisivo Ieisu ivelautolieni ivo, “Vaka tutuya waineye Yaubada Nakabaloina inamai tomo'otoqa waideye?” Ieisu ibaivila ivo, “Yaubada Nakabaloina namai ge kanasala kwaikiseni matamieqa.

²¹ Wete tomo'otoqa ge kanasala inavo, ‘Sideqoina gumanina,’ o ‘Sinoqoina gumanina,’ paina Yaubada Nakabaloina gunabeida isauyeni gamwamie.”

²² Mulineye kanatovemulivo ivonedi ivo, “Tutuya imaimai no waineye wayaqiotoqimi Yau Mwaqitana Kanatomoqo gukaiata kwadakiseni we ge kwaikiseni.

²³ Kawaie tomo'otoqa inavonemi inavo, ‘Sideqoina gumanina’ o ‘Sinoqoina gumanina,’ we ge kwainaqo kwaivemuliedi.

²⁴ Paina Yau Mwaqitana Kanatomoqo gukaiata mesaida namanamala inanamali abama matatabuna inamaqetai, we tutuyanina aivila aimai tomo'otoqa matatabudi inakisegu.

²⁵ We naqaida veviqa bwaigina aibabaneni wete lagata dede inavedumwekaikaiegu.

²⁶ “Kawaie tutuyanina Yau Mwaqitana Kanatomoqo avila-vaituqana tomo'otoqa divalabubuna kaia mesaida Noa natutuye aiveyawailovoqidi.

²⁷ No tutuyanina waineye tomo'otoqa imimianuavulu ikanikani, iyemuyemu wete iepokala kanaketoava Noa nawaga waineye idodoqa we wayaqata tomo'otoqa matatabudi idoedi ivekalawapawapa.

²⁸ “Wete basenaqaida Lota natutuya waineye kaia mesaida. Tomo'otoqa imimianuavulu ikanikani, iyemuyemu, igimwagimwane wete iegimwane, ibagubagula wete vanuqa ikakaiyoqona.

²⁹ We tutuyanina Lota itovoi Sodoma ikiaweni, Iave kaiyabeyabela wete gileu yauyauqidi maqaidi boganidi mesaida kwei ikalavainanidi abame'eqa iobuma tomo'otoqa matatabudi ikalaidi.

³⁰ Kaiatanina Yau Mwaqitana Kanatomoqo aivila-vaituqana wete mesaida, tomo'otoqa inamimianuavulu waineye ailekwa aiveyawailovoqidi.

³¹ “Kaiatanina waineye aitoi navanuqa tabwana kanakubu beabeana waineye inamiamia ge idalaubwaineni inaobu inalugu navanuqe nasakuvo inakewadi, vedimadimanaeqa inadeqamo paina tutuya ivekalakusa. Wete aitoi inaqo tanoqe ge idalaubwaineni inavila vanuqe tamo vakai kanakewa paipaina.

³² Kwainuani Lota mwanena! Kaikalakalata waineye'eqa ideqadeqa ikisaviladi iwapa.

³³ Aitoi yawaina inavekokoleni, ge wayaqina inatagwaneni paipaigu inawapa-vaqata. We kago aitoi yawaina inatagwaneni paipaigu, miavaqata inababaneni.

³⁴ Aivonemi, lovananina waineye tomo'otoqa kadikailuqa inakenokeno kabakeno kaitamoqana waineye, tamo Yaubada inakewai we tamo inabaileni.

³⁵ Vevine kadikailuqa witi inakakaitutu, tamo Yaubada inakewadi we tamo inabailedi.

³⁶ Tomo'otoqa kadikailuqa inabagubagula, kaitamoqana Yaubada inakewai, tamo inabaileni.”

³⁷ Tovemulivo ivelautolieni ivo, “Tomwaya, vakaiebei dede sakunidiavo inasauyedi?” Ieisu ivesipupu ivo, “Kago bwayobwayo kwaikisedi inamimiakauqa kwaiyagovi tamo saku wapana ikenokeno waineye, wete mesaida kiakiayanidiavo kwaikisedi kwaiyagovi tutuya kabavekakava gunabeida ivekalakusa.”