Luke 16 - Maiadomu

Vonawakedubala tovekisabodaboda kapoina menayagova paipaina

¹ Ieisu wayaqina kanatovemulivo inagiavepakalidi pwayapwaya kanaguyoguyovo kanavelituqa vekavekai paipaina kavagi tutuyanina guyoguyonidiavo inakakava Yaubada inavonamwasamwasanedi inalugu kabamiavaqata waineye. We dede vonawakedubalanina beqa ivonedi ivo, “Tamo tomoqo guyoguyona natolituqa isilagai nasakuvo wete naguyoguyovo matatabuna inavekisabodebodedi. Tamo tutuya tomo'otoqa tupwaidiavo inaqo tomoqo guyoguyona waineye ivesipupu ivo, ‘Mutovekisabodaboda navalabubuna kapoina mumane ikakaiyavuyavuledi.’

² “Beqa tomoqo guyoguyona natovekisabodaboda iqoleni imai ivoneni ivo, ‘Gunabeida tamo valea anoqai muvalabubuna kapoina paipaina. Wayaqigu gusaku matatabuna kaditutula kiluvetaubamidi taikiseni kaivia mane ilugu wete kaivia mane isauyedi kavagi taiyagovi kaivia mane kukaiyavuyavuledi. Kivalabubuna-kakavai mulineye komu kikakava lituqanina waineye'eqa.’

³ “We tovekisabodabodanina inaqo kaisena inuanuana ivo, ‘Gutomwaya gukabalituqa waidie'eqa inaveuqeuqegu, banikodiqa aivalabubunedi? Ge kagusala aibagula paina gunabeida abwalogo wete velaukui vovomayamayaqina.

⁴ Gunabeida nuagu ikawananaqai ayagovi vakai aivalabubuni. Tomo'otoqa kadiloaga gutomwaya waineye aikavesiasiaidi kavagi tutuyanina aisauyegu lituqanina waineye ainaqo toloaganidiavo puedi inamaseagagu divanuqe aikanikani wete aikenokeno.’

⁵ “We tovekisabodabodanina toloaga tamoqana tamoqana iqoledi imai waineye. Toloaga gumegumetana ivelautolieni ivo, ‘Kamuloaga gutomwaya waineye kaivia?’

⁶ “Ivo, ‘Bunama medalamudi 100.’ “Tovekisabodabodanina ivoneni ivo, ‘Basenaqaida sakunidiavo kukewadi wete kugililia dede kanalubulubu. Kumiabui kikweuya 100, vedimadimanaeqa kigililia 50.’

⁷ “Wete tamo tomoqo ivelautolieni ivo, ‘Kamuloaga gutomwaya waineye kaivia?’ “We ivo, ‘Witi mebaikidi 100.’ “Tovekisabodabodanina ivoneni ivo, ‘Side kanalubulubu base kukewai kugililia dede waineye, kumiabui kikweuya 100, vedimadimanaeqa kigililia 80.’ Wete dede mesaida ivalabubunedi toloaga matatabudi paipaidi.

⁸ “Tutuyanina natomwaya valea inoqai tovekisabodabodanina nalituqa paipaina ivo, ‘Oge banikodiqa kuvainaqo yau waigue, we komu mwaqitana toyagova bwaigimu paina toloaganidiavo inamaseagamu inanawemu divanuqe tutuyanina yau aiveqeuqemu mulituqa waineye.” Ieisu navonawakedubala ivekakavai ivesipupu ivo, “Dede vonawakedubalanina iveveda tomo'otoqa ge tovetumaqana diyagova bwaigidi mane kadivalabubuna paipaidi. Tutuya puedi diyagova bwaigina beqa mane ikakavesulaidi matautauda Yaubada kanatovetumaqanavo.”

⁹ Wete Ieisu ivesipupu ivo, “Aivonemi, kwaikalaqei-maiqa tomo'otoqa yomuyomudi waidie miguyoguyovo wete misakuvo beqa kavagi inaveianemi. Tutuyanina kawaie guyoguyonidiavo wete sakunidiavo inakakava, Yaubada inavonamwasamwasanemi kwailugu nakabamiavaqata waineye.

¹⁰ “Aitoi saku siaidi inakisavekavina-giagiamaidi gumanina mekanavetumaqana, wete kanasala saku bwaigidi inakisavekavina-giagiamaidi. We aitoi saku siaidi inakisavekavina-kapoyedi wete saku bwaigidi inakisavekavina-kapoyedi.

¹¹ We kago Yaubada ge kanasala pwayapwaya kanaguyoguyovo waidie inavetumaqanemi, mwaqitanaotoqa abama kanaguyoguyovo waidie ge inavetumaqanemi.

¹² Kago malitomo'otoqa disaku kwaikisavekavina-kapoyedi, Yaubada miguyoguyo ge inavelemi.

¹³ “Tamo tolituqa ge kanasala togumetavo kadikailuqa waidie inalitulituqa. Tamo inabaileni wete inavedumwekaikaieni we tamo inavenapwayeweni wete inavematamataneni. Ge kamisala kwaivetolituqa Yaubada wete guyoguyo waidie.”

¹⁴ Palisivo dinuanuana bwaigina mane beqa tutuyanina Ieisu navona inoqai isasaidibieni.

¹⁵ Beqa Ieisu ivonedi ivo, “Komi gumanimiavo wayaqimi tomo'otoqa inakisemi inakawagiagiamaiemi, we Yaubada minuanuana gunabeida iyagovidi. Sakunidiavo tomo'otoqa idididigedi, Yaubada mataneye ikawakapoyedi.”

Ieisu navona tupwaidiavo

¹⁶ “Loinanidiavo Mosese wete palopitavo digilili waidie'eqa mesaida kamivonakedakeda imai kanaketoava Ioni Tobabitaiso ilekwa. Tutuyanina waineye ivelamu Valea Giamaina ilauguguyeni Yaubada nakeda kaivauna natomo'otoqa inaloinedi paipaina. Tomo'otoqa puedi inoqai ietutupelapela wayaqidi inalugu Yaubada Nakabaloina naqeneye.

¹⁷ Abama wete pwayapwaya kanasala inakakava, we Yaubada naloinanidiavo waidie'eqa ge kanasala tamo saku siaina inakakava.

¹⁸ “Dede tamo kabakisa. Kago tomoqo mwanena inasailedi tamo vavine sulidi inanaqidi, gunabeida gimala ivalabubuni. No mesaida, kago tomoqo vavina saisailidi inanaqidi, no tomoqonina wete gimala ivalabubuni.”

Tomoqo guyoguyona wete Lasalo

¹⁹ Wete Ieisu ivo, “Tamo tomoqo guyoguyona imiamia. Tutuya puena kaleko giamaikavadi wete kaditutula bwaigidi beqa ivavaiqavu wete kanikani giamaidi ikanikani.

^20-21 We tamo tomoqo yomuyomuna kanawavaqa Lasalo. Tutuya puena enavo imaimaieni tomoqonina guyoguyona navanuqa kanakala kawaneye. No waineye iemiabuia wayaqina tomoqo guyoguyona kanamugumugu kanatakula'eqa inatawetaweni inakanikani. Lasalo bonubonuna koukou imaimai bonuna iyamuyamudi.

²² “Tutuyanina Lasalo iwapa anelosevo ikavalai inaweni abame Ebelamo vivineye ivemiabuia. Mulineye tomoqo guyoguyona iwapa itavuni inaqo Kaiyabeyabela waineye.

²³ No waineye veviqa bwaigina ilautovoni, ikisalaga Ebelamo ikiseni kanikie Lasalo taiauda.

²⁴ “Beqa iveqole waineye ivo, ‘Tamagu Ebelamo, kudakisavenua'ina'inaqeyegu Lasalo kudavetuneni dimana bwasie idakutuvi meagu idavebigai. Yau veviqa bwaigina alalautovoni kaiyabeyabela dede waineye.’

²⁵ “We Ebelamo ivoneni ivo, ‘Natugu, kunuani base meyawaimue saku puena giamaidi waimue we Lasalo kapoidi. We kasiotoqa menamwasana saku giamaidi ibababanedi dede vikainina waineye we komu veviqa kulalautovoni.

²⁶ We paina kawasasa bwaigina komu wete kima gamwadeye ikenokeno beqa meqavoi wayaqidi inawai ge kadisala wete ge tamo aitoi waimue'eqa inadamana waimeye.’

^27-28 “We tomoqo guyoguyona ivo, ‘Tamagu, we kago ge kanasala, aelaukui waimue wayaqigu Lasalo kivetuneni tamagu navanuqe taigwavo 5 inaloina-pakaledi inanuavila kavagi dede kabaveviqanina waineye ge inamai.’

²⁹ “We Ebelamo ivo, ‘Gunabeida loina Mosese waineye'eqa wete Yaubada napalopitavo divona ikenokeno, ilaubwainedi taimwavo vonanidiavo inanoqaidi wete inavematamatanidi.’

³⁰ “We tomoqo guyoguyona ivo, ‘Tamagu Ebelamo, we ge kanasala. Kago tamo tomoqo wapawapana inayawasa-vaituqana inanaqo inavonedi kadisala inanuavila dikapoina waidie'eqa.’

³¹ “We Ebelamo ivo, ‘Kago Mosese wete palopitavo divona inabaila wete mesaida kago towapa inayawasa-vaituqana ge navona inavetumaqaneni.”