Luke 15 - Maiadomu

Vonawakedubala kaitonu Yaubada navenapwayewa bwaigina tomo'otoqa vuyovuyodi paipaidi

¹ Tamo kaiata takisi kanatokewavo wete tupwaidiavo tokapoina imai Ieisu waineye navona inavevaneneqeni.

² We Palisivo wete loina kanatovekaivevenavo tupwaidiavo ibwadubwadu ivo, “No tomoqonina tokapoina iveiaianedi we taiauda ikanikani. Uvale natutuya igogogovi vuyovuyodi waidie?”

Vonawakedubala sipi vuyovuyona paipaina

^3-4 Dinuanuana Ieisu gunabeida iyagovi beqa vonawakedubala kaitonu ivonedi. Ieisu navonawakedubala gumegumetana beqa Palisivo ivonedi ivo, “Kago aitoi waimie'eqa sipi 100 we tamoqana inavuyo banikodiqa inavalabubunedi? Sipi 99 inabailedi inamiamia kawasasamaiqe libi inakanikani we inavila inanaqo inalaualeni kanaketoava inababaneni.

⁵ Tutuyanina ibabaneni menamwasana ikewai, iluaqavuya isilagai kavalaneye.

⁶ Matautauda ivila inaqo navanuqe. Enavo wete kanamialatuma matatabudi inaqolekauqidi inavo, ‘Gusipi ivuyo gunabeida ababaneni, beqa kwamai taiauda taimwasana!’

⁷ Aivonemi, dede mesaida kago tokapoina inanuavila nakapoina waineye tomia abama inamwasana-otoqa paipaina, we dimwasana tomo'otoqa tonotonovidi 99 waidie saiqanaqa paina ge idavuyo.”

Vonawakedubala tamo mane seluba vuyovuyona paipaina

⁸ Ieisu navonawakedubala kanaveluqa beqa Palisivo ivonedi ivo, “Kago tamo vavina dimane seluba 10, we tamoqana ivuyo, banikodiqa inavalabubunedi? Lamupa inagabuni wete vanuqa inadivuya inalauala-vekavekaieni kanaketoava inababaneni.

⁹ Tutuyanina inababaneni ediavo wete kadimialatuma matatabudi inaqolekauqidi inavonedi inavo, ‘Taimwasana paina tamo mamane seluba ivuyo gunabeida kababaneni.’

¹⁰ Aivonemi, dede mesaida Yaubada na'anelosevo inamwasana bwaigina kago tamo tokapoina inanuavila.”

Vonawakedubala natu lamoqina vuyovuyona paipaina

¹¹ Ieisu navonawakedubala kanavetonu beqa Palisivo ivonedi ivo, “Tamo tomoqo natunavo lamoqidiavo kadikailuqa.

¹² Natuna siaina tamana ivoneni ivo, ‘Tamagu, kawaie kiwapa musakuvo wete mupwayapwaya metatagu kaisenadi. We deqoina yau wayaqigu kagukalaqei kiketovegeia kivelegu.’ Beqa tamadi saku matatabuna iketovegeia natunavo kadikailuqa waidie.

¹³ “Kaiata tupwaidiavo ikakava natuna siaina kanakalaqei ivegimwaneyedi kaditutula ikewadi ivalabubuna itauya inaqo kanikie tamo kabaloina waineye, no waineye valabubuna kapoidi waidie namane matatabudi ikaiyavuyavuledi.

¹⁴ Tutuyanina namane matatabuna ivekakaveni, lase bwaigina isauyeni kawalawanina waineye, we namane ge tamo saiqana idayatobaleni.

¹⁵ Beqa inaqo kawalawanina kanatomiana tamo waineye wayaqina inalituqa, we ivoneni inanaqo nabawe inavekisabodebodedi.

¹⁶ No waineye lase bwaigina ilautovoni wayaqina bawe kadinigilaeqa inakani gamona inayatoi we ge tamo aitoi vakai idaveleni idakani.

¹⁷ “Imiamia tutuya kaniakwanina mulineye nuana ikawananaqai inuavila ivo, ‘Tamagu natolituqavo matatabudi mekadi kadisala inakani-wayoqedi, we yau dede waineye lase'eqa saiqanaqa aiwapa.’

¹⁸ Aitovoi aivila tamagu waineye aivoneni anavo, ‘Tamagu, akapoina Yaubada mataneye wete komu matamue.

¹⁹ Ge idalaubwainegu kikawanatunegu we kiyatogumo aivetolituqa waimue.’

²⁰ Beqa itovoi ivila inaqo tamana waineye. “Tutuyanina kanikie'eqa giladi imaimai, tamana ikisanaqo ikiseni ikisavenua'ina'inaqeyeni ilaukwavina inaqo iloaqavuya iyaoqi.

²¹ Natuna ivesipupu ivo, ‘Tamagu, yau akapoina Yaubada mataneye wete komu matamue. Ge idalaubwainemu kikawanatunegu.’

²² “We tamana natolituqavo iqoledi imai ivonedi ivo, ‘Vedimadimanaeqa kwailaukwavina kaleko giamaiotoqina kwaimaieni kwaivaiqavuya, dimaneye dimakwasila kwaiyatoi wete kanakaqeyapayapa kaqeneye kwaisilagaidi.

²³ Matautauda kwainaqo bulumakau natuna tubutubuqina kwainigei medamwasana kani bwaigina taivalabubuni.

²⁴ Paina natugu dede iwapa wete iyawasa-vaituqana. Ivuyo wete ababaneni.’ Beqa kanikani ivalabubuni ikani imwasana.

²⁵ “Tutuyanina waineye ikanikani, natuna natomwayai ilitulituqa tanoqe. Tanoqe'eqa ivila imaimai saiqanaqa inalekwa vanuqe kabagiavegwaqegwaqe butuna wete isuyasuya inoqai.

²⁶ Tamo tolituqa iqoleni inaqo ivelautolieni ivo, ‘Vakai isasauyeni?’

²⁷ “We tolituqa ivo, ‘Taimu ilekwa beqa tamamu menamwasana iloinedi bulumakau natuna tubutubuqina inigei we kani bwaigina ivalabubuni paina natuna ge idawapa, meyawaina ivila imai.’

²⁸ “Natuna natomwayai kanakapoka ioqala-otoqa ibaila ge wayaqina inanaqo vanuqe inalugu. Beqa tamana isauyeni inaqo ielaukuieni iweweseni taiauda inalugu.

²⁹ We natuna natomwayai ivesipupu ivo, ‘Diqaba puedi alitulituqa waimue mesaida tolituqa maimaiqa wete muloina matatabudi aematamatanedi. We ge tamo kaisaya siaina mesaida gouti natuna kudavelegu beqa egwavo taiauda kadakani kadamwasana.

³⁰ We dede natumu musakuvo ikaiyavuyavuledi vevine tovematalagava waidie we tutuyanina ivila imai kuloinedi bulumakau natuna tubutubuqina inigei paipaina.’

³¹ “We navona tamana ibaivilai ivo, ‘Natugu komu tutuya puena taiauda tamiamia we gusaku matatabuna komu musakuvo.

³² Ilaubwaineda taikani taimwasana paina taimu iwapa we iyawasa-vaituqana, ivuyo we tababaneni!”