Luke 12 - Maiadomu

Ieisu ivemataluana Palisivo paipaidi

¹ Yoko bwaigiotoqina mesaida tausani iyoko imai ietutupelapela wayaqidi Ieisu navona inavevaneneqeni. Naqaida Ieisu ivesipupu kanatovemulivo waidie. Ivesipupu ivo, “Kwavekisabodebodemi Palisivo di'isiti waineye inanaqonaqo inavedamanimi. Dikatupoe paipaina aivesipupu paina kawadieqa valabubuna kapoidi ikeketobodedi, we vaigavueqa ivavalabubunidi.

² Vakai tomo'otoqa inavaigavuyedi Yaubada inagiaveluguaqetedi. Vakai inanuanuavaigavuyedi Yaubada inavesipupuyedi.

³ Side mesaida vakai vaigavueqa kwavesipupuyedi tadavona lovane we kaiate inagiaveluguaqetedi tomo'otoqa matadie. Vakai kwaekawa'ayeayediqa tutudaba naqeneye kawaie inaveqoleqoleyedi maleweye tomo'otoqa matatabudi waidie.

⁴ “Egwavo, dede aivonemi kwainoqai. Gumanidiavo wayaqidi bunumi inaluvewapadi ge kwaigololoyedi. Oge bunumi inaluvewapadi, we mulineye ge kanasala tamo veviqa inavelemi.

⁵ Wete aivonemi gumanina ilaubwainemi kwaigololoyeni. Mwaqitana memivekimatana Yaubada kwaigololoyeni paina menaveluluna kanasala inaluvewapami wete inatawemi kwaiobu Kaiyabeyabela waineye.

⁶ “Kago manukayakayalele 5 taigimwanedi, kaditutula siaidi mesaida 2 toea. We Yaubada mataneye manukayakayalele saku bwaigina. Tamoqana tamoqana inuanuanidi ge nuana idavulu.

⁷ Wete komi mesaida mataneye saku bwaigina. Iyagova-vekavekaimi mesaida navakaumi matatabuna kanayoko iyagovidi. Beqa ge kwaigololo komi saku bwaigiotoqina Yaubada mataneye matautauda manukayakayalele matatabudi beqa ikikisavekavinimi.

⁸ “Avona-mwaqitana kago aitoi pwayepwayeye inavesipupu tomo'otoqa matadie paipaigu inavo, ‘Yau atagwanegu Ieisu waineye gumanina kagu Toloina.’ Wete mesaida Yau Mwaqitana Kanatomoqo kawaie Yaubada na'anelosevo matadie aitovoi anavo, ‘No tomoqonina yau gutomo'otoqa.’

⁹ We kago aitoi inavekewegu tomo'otoqa matadie inavo, ‘Ieisu ge kagu Toloina,’ wete mesaida kawaie yau Yaubada na'anelosevo matadie aivekeweni anavo, ‘No tomoqonina ge yau gutomo'otoqa.’

¹⁰ Wete kago aitoi Mwaqitana Kanatomoqo inakawakapoyegu Yaubada kanasala inanuataqoni, we kago aitoi Yaubada Vaitabuna ge inavekimataneniqa paipaina inavona-kapo inasiwataoi, Yaubada ge kanasala nakapoinanina inanuataqoni.

¹¹ “Kwaemuliegu beqa kawaie malitomo'otoqa inakewami inanawemi sinagogi waidie kwaivonayavu tokedagumetavo wete toloinavo matadie. Ge kwaivenuapousakala kwanavo, ‘Ivemwauda banikodiqa taivekewedi wete banikodiqa taivesipupuyedi?’

¹² Paina kaiatanina waineye Vaitabu Maqemaqetana inavonakedekedemi banikodiqa kwaivesipupu.”

Vonawakedubala guyoguyo paipaidi

¹³ Tutuyanina Ieisu iesipupu tamo tomoqo yoko naqedie'eqa ivesipupu ivo, “Tovekaivevena, wayaqigu tatagu kivoneni beqa sakunidiavo tamama iwapakubukubuidi inasenadi yau wete gumanina taiauda.”

¹⁴ Ieisu navona ibaivila ivo, “Iagu, ge tamo aitoi loina idavelegu beqa kamikailuqa misaku aisenadi.”

¹⁵ Beqa ivesipupu matatabudi waidie ivo, “Taunimi kwaivekisabodebodemi beqa ge kwaivemomogai saku sulidi sulidi waidie. We aivonemi, ge kanasala guyoguyo waineye'eqa mimia giamaina kwaibabaneni.”

¹⁶ Beqa Ieisu vonawakedubalaeqa ivesipupu waidie ivo, “Tamo tomoqo guyoguyona napwayapwaya waineye kanikani bwaigina itavia.

¹⁷ Ikiseni nanuanuana waineye ivo, ‘Banikodiqa aivalabubunedi? Gunala gunabeida iadaqa.’

¹⁸ Beqa inuanuana ivo, ‘Gunabeida anuani. Side mesaida, gunala matatabuna aiqeuya kaivauna wete bwaigina aiyoqoni waineye kanikani matatabuna aivedodoqi wete gusakuvo tupwaidiavo taiauda.

¹⁹ Mulineye taunigu aivonegu anavo, “Yau tamo toveguyo. Guguyoguyovo gunabeida avalabubunidi inamialaugamasa diqaba matadeye paipaidi. Beqa lituqa waidie'eqa aiveyawai megumwasana aikanikanimo wete bwasi veluvelulunina aiyemuyemumo.”

²⁰ “We Yaubada ivoneni ivo, ‘Komu mwaqitana qauqaumu! Dede lovananina waineye kiwapa, we sakunidiavo kuvalabubunidi taunimu paipaimu aitoi inakewadi inaloinedi?”

²¹ Ieisu navona kabavekakava waineye ivo, “Vona mwaqitana, meqavoi pwayapwaya kanaguyoguyo ieboudi taunidi paipaidi, ge inaveguyoguyo Yaubada mataneye, kawaie vakai kanagiamaina waidie.”

Yaubada kaisena taivetumaqaneni

²² Wete Ieisu kanatovemulivo ivonedi ivo, “Ge kwaivenuapousakala yawaimi paipaina kwanavo, ‘Vakai kaikanikani?’ o kwainuanuana vovomi paipaidi kwanavo, ‘Vakai kaleko beqa kaisilagata?’

²³ Yawaida saku bwaigina matautauda kanikani, we vovoda saku bwaigina matautauda kaleko.

²⁴ We bwayobwayo divalabubuna kwainuanidi. Ge idabagubagula, ge idatavitavi wete ge medinala we Yaubada iekanidi. Manuqa sakumaimaiqa we komi tomo'otoqa saku bwaigina Yaubada mataneye beqa wete kami inavelevelemi.

²⁵ Beqa ge tamo saku paipaina kwaivenuapousakala. Ge kanasala tamo aitoi navenuapousakalaeqa namiana pwayepwayeye inakavekaniakwani.

²⁶ Kago venuapousakala ge kanasala inakaivaisemi tamo saku siaina waineye, beqa uvale kwaenuapousakala saku puedi paipaidi?

²⁷ “Kwainuanidi pwalapwalasi ditabwa. Ge idalitulituqa wete ge kadikaleko idavavalabubunidi we kadivaiqavu giamaidi. Aivonemi, Kini Solomoni tomoqo guyoguyona kanavaiqavu giamaidi we pwalapwalasi giamaiotoqidi.

²⁸ Mosomoso matatabuna sakumaimaiqa, kasiotoqa takisekisedi we kawaie inatunudi inakalaidi we Yaubada ivavaiqavudi. We komi tamo saku bwaigiotoqina mataneye, mwaqitana mekaminuanuana inavavaiqavumi. Uvale mivetumaqana Yaubada waineye siaina?

²⁹ “Beqa kanikani wete yemu paipaidi ge kwaivenuapousakala tutuya puena paipaidi kwailalauala.

³⁰ Gumanidiavo Yaubada ibavuyeni dede sakunidiavo paipaidi ienuapousakala bwaigina. We komi sakunidiavo wayaqimi, Tamami abame gunabeida minuanuana iyagovidi.

³¹ We ilaubwainemi naqaida taunimi kwaitagwanemi Yaubada inaloloinemi wete nanuanuana kwaivavalabubuni mulineye sakunidiavo inavelemi.

³² “Komi gusipivo mesaida wete yoko siaina ge puemi, we ge kwaigololo paina Tamami menamwasana wayaqina inaloloinemi Nakabaloina naqeneye.

³³ Misakuvo kwaivegimwaneyedi, kaditutula kwaikewadi toveyomuyomu kwaiveledi, kavagi miguyoguyo inavepopoi abame. No waineye kanamane kabavedodoqa ge inavetutuwai wete inakawalabuki, we guyoguyonidiavo inakeno-vaqata paina tovainaqo gebuka wete naganaga ge inakavekapoidi.

³⁴ Kwainuani vakaiebei miguyoguyo ikenokeno, waineye tutuya puena minuanuana inanaqonaqo.”

Taivalabubuna Ieisu namai paipaina

³⁵ Ieisu ivesipupu vaituqana ivo, “Taunimi kwaivalabubunimi lituqa paipaina kwailalaugamasa, kamikaleko kwaisilagaidi, kamiwakila kwailaipwedi wete mimaqeta kwaigabunidi inakalakalata.

³⁶ Tolituqa giamaidi kwavetutuyamedi, mesaida ditomwaya inaqo naqi kanakani waineye we natolituqavo ivalabubuna ilalaugamasa makavia inavila inamai. Tutuyanina inalekwa inatutukeke vedimadimanaeqa awa inasibaleni.

³⁷ Tutuyanina kago ditomwaya inavila-vaituqana inababanedi inalalaugamaseni kabamwasana bwaigina waidie. Avona-mwaqitana, ditomwayanina inamwasana natolituqavo waidie beqa inavonedi inamiabui tolituqavo kadikalekoeqa inasilagai lituqa paipaina mulineye kadi inasiobuyedi inakani.

³⁸ Wete kago tomwayanina lovana gamwane o mamale inalekwa we natolituqavo inalalaugamaseni kabamwasana bwaigina waidie paina tutula inakewadi.

³⁹ “Kwainuani, kago tamo tonivanuqa tovainaqo namai kanatutuya inayagovi ge inakeno inaetonova kavagi tovainaqonina ge kanasala inalugu navanuqe.

⁴⁰ Komi wete mesaida kwavalabubuna kwailalaugamasa. Tutuyanina Mwaqitana Kanatomoqo inamai inavesalawapami paina namai kanatutuya ge kwadayagovi.”

⁴¹ Pita Ieisu ivelautolieni ivo, “Tomwaya, vonawakedubalanina kuesipupuyeni kima tovemulivo kaisema kamavona o tomo'otoqa matatabuma paipaima?”

⁴² Ieisu ivesipupu ivo, “Aivonemi ilaubwainemi komi mesaida tolituqa giamaina, gumanina menanuakawananaqai wete mekanavetumaqana. Natomwaya ivoneni tolituqa tupwaidiavo inakikisavekavinidi wete kadi inaveleveledi kaiata tamoqana tamoqana kani kanatutuya waineye mulineye inakiawedi.

⁴³ Tutuyanina ditomwayanina inavila inamai, kago inakiseni tolituqanina lituqanidiavo inalitulituqidi inakawagiagiamaieni wete kanatakona inaveleni.

⁴⁴ Avona-mwaqitana waimie, tomwayanina inasilagai inayatoi navanuqa wete nasakuvo matatabuna kaditokisavekavina.

⁴⁵ We kago tolituqanina nanuanuana inavo, ‘Gutomwaya ge vedimadimanaeqa inamai,’ beqa tupwaidiavo tolituqa tomoqovo wete vevine inanigenigedi we kani inavalabubuni wete bwasi veluvelulunidi inayemuyemu beqa nuana inagiaveqauya.

⁴⁶ Tamo tutuya waineye tolituqanina ge idayagovi natomwaya inamai inavesalawapai. We inatoge inanigei navalabubunanina kapoina paipaina mulineye inayatoi gumanidiavo ge idavetumaqana taiauda divikai kabakaimatavuloqa waineye.

⁴⁷ “Tolituqanina natomwaya nanuanuana iyagovidi we ibaila ge idavalabubuni wete navila vaituqana paipaina ge idavalabubuna, kanakaimatavuloqa bwaigiotoqina inababaneni.

⁴⁸ We tolituqanina natomwaya nanuanuana ge idayagovidi we inakapoina kanakaimatavuloqa ge bwaigina. Wete mesaida meqavoi kadikalaqei bwaigina Yaubada inaveledi, wayaqina kalaqeinina inavelituqa-vekavekaieni paipaina we kago meqavoi kadikalaqei bwaigiotoqina Yaubada ivetumaqanedi wayaqina kadikalaqeinina inavelituqa-vekavekaieni bwaigiotoqina.”

Tomo'otoqa inaketovegei Ieisu paipaina

⁴⁹ Wete Ieisu ivonedi ivo, “Yau amai kaikalakalata aimaieni pwayepwayeye. We wayaqigu bwaigina gunabeida idakalakalata mulineye yau aimai.

⁵⁰ Yau nuapougu ieviqa paina kawaie ailugu veviqa bwaigina waineye, we nuapougu inaeviqa kanaketoava veviqanina inakakava.

⁵¹ Tupwaimiavo minuanuana amai nigo tomo'otoqa matatabumi kwaiveiana niwalova waineye kwaimiamia. We gebuka. Aivonemi amai tomo'otoqa inaketovegei.

⁵² Deqoina kaiatanidiavo wete tutuya imaimai waidie susu waidie ketovegei inasauyeni. Side mesaida, susu tamoqana naqeneye tomo'otoqa 5, kadikaitonu wayaqidi yau, we kadikailuqa inavedumwekaikaiegu, o kadikailuqa wayaqidi yau we kadikaitonu inavedumwekaikaiegu beqa ketovegeinina inasauyeni.

⁵³ Diketovegeinina dede mesaida: Tomoqo metamana inaketovegei, vavina me'inana inaketovegei wete vavina melawadi vavina inaketovegei paipaigu.”

Kiakiaya kadiyagova

⁵⁴ Matautauda Ieisu ivesipupu tomo'otoqa waidie ivo, “Kago kwaikiseni kwau inaetovoia youyaeqa (wesiti) kwaiyagovi kwanavo, ‘Inakwei,’ we mwaqitana.

⁵⁵ We tutuyanina yaqina kwaiboga (sauti) inanunuqa, kwaiyagovi kwanavo, ‘Kasiotoqa yauyauta bwaigina,’ we mwaqitana.

⁵⁶ Komi tokatupoe! Kiakiaya abame wete pwayepwayeye inavevemi beqa kanasala kwaiyagovidi vakai inasauyedi, we kiakiaya veluvelulunidi Yaubada ivavalabubunidi matamie deqoina ge kwadakisakinanadi.

⁵⁷ “Uvale ge wayaqimi kwaivenuana-vekavekai keda tonotonovina waineye kwainaqo?

⁵⁸ Kago tamo tomoqo inavemwaumu kapoina paipaina we inakewamu inanawenawemu kabasivetonova waineye, kwaiekautovona kedeye kwaisivetovetonovi. We kago gebuka, inayatomu kabasivetonova waineye, mulineye toloinavo inakalaqeiemu tolauqavia waidie inayatomu deli waineye.

⁵⁹ Avona-mwaqitana ge inavedimadimana inaketoyavumu no waineye kimiamia kanaketoava kitutula-kakava matautauda inaketoyavumu.”