Luke 11 - Maiadomu

Ieisu velaukui paipaina ivekaivevena

¹ Tamo kaiata Ieisu ielaukui tamo vikai waineye. Tutuyanina ivekakava, tamo kanatovemuli ivoneni ivo, “Tomwaya, base Ioni Tobabitaiso kanatovemulivo velaukui ivevedi, kima wete wayaqima kivevema.”

² Ieisu ivonedi ivo, “Side mesaida kwaivelaukuiedi kwanavo, “Tamama, Komu maqemaqetamu Wayaqima tomo'otoqa matatabuma kamuwavaqa kaivekimataneni, Wayaqima kiloinema,

³ Wayaqima kama kivelevelema kaiata tamoqana tamoqana paipaidi,

⁴ Komu makapoina kinuataqonidi, Kima wete mesaida malitomo'otoqa ivavalabubuna-kapo waimeye kainuataqonidi. Kabaketotovona waidie ge kitagwanema.”

^5-6 Wete Ieisu ivekaivevena kanatovemulivo waidie velaukui kanayagova paipaina. Ivo, “Kago komu kinaqo iamu waineye lovana gamwane kunavo, ‘Iagu, kagu'ulatau imai we yau ge tamo vakai aiveleni inakani. Beqa beledi kaitonu kivelegu ainaqo aiveleni we kawaie wete aitutulidi.’

⁷ We kago iamu inavo, ‘Ge kivematagagigagi. Gunabeida kavebubula megususuvo kakenokeno. Ge kagusala aitovoi aivelemu.’

⁸ We aivonemi, ge veiaiana paipaina inakaivaisemu, we muvelaukui-vaivaituqana paipaina inatovoi inavelemu vakai wayaqimu.

⁹ “Beqa komi wete mesaida. Kwaivelaukui Yaubada waineye inavelemi, kwailauala kwaibabaneni, wete kwaitutukeke inanoqai awa inasibaleni.

¹⁰ Vona mwaqitana, meqavoi ielaukuiqa Yaubada inaveledi, meqavoi ilalaualaqa inababaneni wete meqavoi itututukeke inanoqai awa inasibaleni.

¹¹ “We komi tama kago natumiavo iqana inavelaukuieni, banikodiqa baisoa siwasiwayadi kwaiveledi? Gebuka!

¹² O kago pou inavelaukuiemu, banikodiqa kwilama kiveleni? Gebuka!

¹³ Komi tokapoina we tutuya puedi vakai saku giamaidi natumiavo wayaqidi kwaveleveledi. Tamada abame navenapwayewa bwaigiotoqina waimie matautauda komi mivenapwayewa natumiavo waidie, beqa kago kwaivelaukuieni Vaitabu Maqemaqetana inavelemi.”

Vakaiebei Ieisu naveluluna ibabaneni

¹⁴ Tamo tomoqo base vaitabu kapoina iluguya ge kanasala inavesipupu. Ieisu ibabaneni vaitabu kapoina ikwavineni isauyeni, we tutuyanina isauyeni tomoqonina ivesipupu-vaituqana. Tomo'otoqa puedi ikiseni beqa nuadi ivilele.

¹⁵ We tomo'otoqa tupwaidiavo ivo, “Seitani, gumanina vaitabu kapoidi kaditogumeta, Ieisu iekuniqeni beqa navelulunaeqa vaitabu kapoidi ikwavikwavinedi.”

¹⁶ Tomo'otoqa tupwaidiavo wayaqidi Ieisu inavekautovoni beqa ivesipupu ivo, “Wayaqima tamo kabanuavilele kivalabubuni kavagi kaiyagovi mwaqitana muveluluna Yaubada waineye'eqa imai.”

¹⁷ We Ieisu gunabeida dinuanuana iyagovi beqa ivonedi ivo, “Kago kabaloina tamoqana inaketovegeia yoko kailuqa taiauda inaetalaqa, no kabaloinanina ge kanasala inakenokeno. Wete mesaida susu tamoqana inaketovegeia yoko kailuqa ediavo taiauda inaetalaqa, no susunina ge kanasala inamiamia.

¹⁸ Kwavona nigo Seitani naveluluna ivelegu beqa vaitabu kapoidi adakwavikwavinedi, we komi tokatupoe. Kago Yau Seitani nayoko naqeneye ge vaitabu kapoidi adakwavikwavinedi adakakaivaisedi ge taiauda kadaetalaqa. We kago Seitani nakabaloina inaketovegeia yoko kailuqa taiauda inaetalaqa, nakabaloina ge kanasala inakenokeno kaia inakakava.

¹⁹ Kago kwaesipupu yau Seitani navelulunaeqa vaitabu kapoidi akwavikwavinedi, we komi Palisivo kamitovemulivo aitoi navelulunaeqa vaitabu kapoidi ikwavikwavinedi? We kamitovemulivo inavonemi inavo, ‘Ge Seitani navelulunaeqa! Komi kwakatupoe!’

²⁰ We kago mwaqitana Yaubada navelulunaeqa vaitabu kapoidi akwavikwavinedi, Yaubada Nakabaloina gunabeida isauyeni kawasasamie.

²¹ “Seitani mesaida tamo tomoqo veluvelulunina menakabavetalaqa puedi, navanuqa iekisabodebodeni beqa ge tamo aitoi nasakuvo inavainaqodi.

²² We kago tamo tomoqo veluvelulunaotoqina inamai tomoqonina taiauda inavetalaqa inavelulunapeleni nasakuvo wete nakabavetalaqa ietumaqanedi inakewadi enavo inasenedi.

²³ “Kago aitoi ge taiauda kailitulituqa gumanina kaguqavia. We kago aitoi ge taiauda tomo'otoqa kaikewakewadi kaimaimaiedi Yaubada waineye, gumanina tomo'otoqa ikwavikwavinedi gulituqa kanatokavekapo.”

Vaitabu kapoina navila vaituqana tomoqo naqeneye

²⁴ Ieisu ivesipupu-vaituqana ivo, “Kago vaitabu kapoina inasauyeni tamo tomoqo waineye inanaqo walakaimaiqe inasasasala nakabamia inalalauala. We kago ge inababaneni inavo, ‘Aivila gukabamia base akiaweni waineye.’

²⁵ We inavila inamai kabamianina inakiseni gunabeida ivalabubuni-giamaina ikenokeno naqekavana.

²⁶ Matautauda vaitabunina kapoina inanaqo vaitabu kapoiotoqidi 7 inamaseagadi inamaiedi inalugu kabamianina waineye. We tomoqonina inakavekapo'otoqi, base ge mesaida.”

²⁷ Tutuyanina Ieisu ivesipupu ikakava, tamo vavine yoko gamwadie bonadi bwaiginaeqa itoge iveqole ivo, “Kabamwasana inamu waidie paina ivenatunemu wete ivesusumu.”

²⁸ Ieisu ivonedi ivo, “Kwavona-mwaqitana we meqavoi Yaubada navona inanoqai wete inavematamataneni kabamwasana bwaigina waidie.”

Tomo'otoqa wayaqidi kiakiaya inakiseni Ieisu waineye'eqa

²⁹ Yoko bwaigina Ieisu itovoi-velauvivili beqa ivonedi ivo, “Lagata dede kanatomo'otoqa mivalabubuna kapoidi paina wayaqimi tamo kiakiaya aivalabubuni matamie, kwaikiseni kwaikawamwaqitana yau Yaubada waineye amai. We yau kaia tamoqana kiakiaya aivevemi, gumanina isauyeni Yaubada napalopita Iona waineye.

³⁰ Sakunina isauyeni Iona waineye me Ninive dikiakiaya Yaubada ivetuneni. Wete mesaida Yau Mwaqitana Kanatomoqo sakunidiavo inasauyedi waigue mikiakiaya Yaubada ivetunegu.

³¹ “Kawaie Vonayavu Kanakaiata waineye Siba kanakwini wete lagata dede taiauda kwaitovoi Yaubada mataneye we kwininidi inakawakapoyemi paina basenaqaidaotoqa kanikie'eqa imai Kini Solomoni navekaivevena nuauya paipaina inavevaneneqeni. We aivonemi, Kini Solomoni tomoqo bwaigina we deqoina tomoqonina itovotovoi gamwamie bwaigiotoqina we komi ge wayaqimi navekaivevena kwaivevaneneqeni wete kwainuavila.

³² Wete mesaida Vonayavu Kanakaiata waineye me Ninive wete lagata dede taiauda kwaitovoi Yaubada mataneye tomo'otoqanidiavo komi inakawakapoyemi paina tutuyanina Iona ilauguguya waidie inuavila. Aivonemi, Iona tomoqo bwaigina we tomoqonina itovotovoi gamwamie bwaigiotoqina we komi ge wayaqimi nalauguguya kwaivevaneneqeni wete kwainuavila.”

Maqeta kanavonawakedubala

³³ Ge tamo aitoi maqeta idagabugabuni idavavaigavuyeni o nau beqa idatatalapwateni. We maqeta kabayato waineye iyatoyatoi kavagi tomo'otoqa inalugulugu vanuqanina waineye inamaqemaqetadi.

³⁴ “Matami gumanina vovomi kanamaqeta. We kago matami giamaidi vovomi matatabuna maqemaqetadi, we kago matami kapoidi vovomi matatabuna inavaitomadi.

³⁵ Kwaietonova inanaqonaqo mimaqetanina nuapoumie inakweu vovomi matatabuna inavaitomai.

³⁶ Kago vovomi matatabudi maqemaqetadi wete ge tamo vikai vaitoma, saku matatabuna maqemaqetadi waimie mesaida lamupa maqetana'eqa idamaqemaqetemi.”

Ieisu Palisivo wete loina kanatovekaivevenavo iyaqaidi

³⁷ Tutuyanina Ieisu ivesipupu ikakava, tamo Palisi ivelaukuieni kani paipaina beqa inaqo navanuqe ilugu imiabui inakani.

³⁸ Palisinina Ieisu ikiseni ge dimana idalegwa-vekavekaidi tubudiavo divekaivevena kani paipaina idavetutuyameni beqa nuana ivilele.

³⁹ We Ieisu tomoqonina nanuanuana gunabeida iyagovi beqa ivoneni ivo, “Komi Palisivo mivalabubuna mesaida vedi wete takula dumwedi kwailegwalegwadi we naqedi bweubweudi paina vovomiqa kwagigiavemaqetadi we naqemi vemomogai wete valabubuna kapoidi iadaqidi.

⁴⁰ Komi kwavakwavami! Yaubada naqemi wete vovomi ivalabubunidi. Gumanina wayaqina naqemi wete vovomi inamaqeta.

⁴¹ Beqa ilaubwainemi kwaikalaqei-maimaiqa tovelaulauyogu waidie, tadavona naqemi kwadagigiavemaqetadi valabubuna kapoidi waidie'eqa, we saku matatabudi waidie'eqa komi maqemaqetami.

⁴² “Komi Palisivo kabanuakapo waimie, paina kawaie mwau bwaigina kwaibabaneni Yaubada waineye'eqa. Loina siaidi kwaekimatanedi we loina bwaigidi kwabaibailedi. Kago saku siaiotoqidi mesaida kemopo 10 waimie kaitamoqana kwaikalaqei-maimaiqa Yaubada waineye mesaida naloina. Dede loinanidiavo kwavalabubunidi, we uvale loina bwaigidi kwabailedi? Yaubada ge kwadavenapwayeweni wete tomo'otoqa waidie ge kwadavalabubuna giagiamai valabubuna tonotonovidi beqa. Ilaubwainemi naqaida dede sakunidiavo bwaigidi kwaivalabubunidi matautauda saku siaidi.

⁴³ “Komi Palisivo kabanuakapo waimie, paina kawaie mwau bwaigina kwaibabaneni Yaubada waineye'eqa. Tutuyanina kwailugulugu sinagogi waineye, wayaqimi togumetavo bwaigidi taiauda kwaimiabui. Wete tutuyanina kwainaqonaqo maketi waidie wayaqimi tomo'otoqa puedi kwaibabanedi medivekimatana inavonamwasamwasanemi.

⁴⁴ Kabanuakapo waimie, komi mesaida taumata ge mekanakiaiaya, naqena kapoina we tabwana giamaina. Tomo'otoqa tabwaneye ibaqa inaqonaqo we ge idayagovi dibuneye pwasana ikenokeno. Wete komi mesaida vovomi giamaidi, we naqemi kapoidi.”

⁴⁵ We tamo loina kanatovekaivevena Ieisu ivoneni ivo, “Tovekaivevena muvonanina waineye'eqa kima wete kukawakapoyema.”

⁴⁶ Ieisu ivo, “Komi loina kaditovekaivevenavo kabanuakapo waimie, kawaie mwau bwaigina kwaibabaneni Yaubada waineye'eqa. Tomo'otoqa kwawewesedi beqa miloina iematamatanidi, tadavona mesaida venuana mwaudi kwadaekavaladi, we ge tamo saiqana kwadakaivaisedi.

⁴⁷ Kabanuakapo waimie, komi wayaqimi tomo'otoqa inadidigemi nigo komi togiamaina, beqa memimwasana Yaubada napalopitavo kaditaumata kadinuavekavina kwavalabubunidi, we tubumiavo ge idavekimatanedi iluvewapadi.

⁴⁸ Beqa kwakawamwaqitaneni tubumiavo divalabubunanina kwakakawagiagiamaieni paina palopitanidiavo iluvewapadi we komi kaditaumata kwavalabubunidi.

⁴⁹ Yaubada minuanuana iyagovidi beqa menanuauya ivo, ‘Gupalopitavo wete gu'apositolovo aivetunedi waidie, tolituqanidiavo tupwaidiavo inaluvewapadi wete tupwaidiavo veviqa inaveledi.’

^50-51 Tutuyanina Yaubada pwayapwaya ivalabubuni kanaketoava deqoina tubumiavo palopitavo puedi iluvewapadi. Basenaqaidaotoqa Keni taina Ebeli iluvewapai, tutuyanina waineye kainige ivelamu imai Sakalaia waineye, gumanina iluvewapai didiqa kabavelomu wete Tutudaba Maqemaqetana gamwadie. Avona-mwaqitana lagata dede tokainige kadikaimatavuloqa kwaikavalai.

⁵² “Komi loina kanatovekaivevenavo kabanuakapo waimie, nuakawananaqai Yaubada Nakabaloina paipaina mesaida vanuqa we komi kana'awa kwagiabodai. Komi kanasala vanuqa kwaisibaleni we tomo'otoqa kwaivevedi. We ge wayaqimi kwailugu waineye we gumanidiavo wayaqidi inalugu kwaketobodedi.”

⁵³ Tutuyanina Ieisu ivesipupu ikakava vanuqanina ikiaweni. We Palisivo wete loina kanatovekaivevenavo mekadikapoka isiloloi velautoli puedi beqa.

⁵⁴ Gumanidiavo wayaqidi Ieisu inakatupoieni inavona-kapo no waineye inavemwauya.