Luke 10 - Maiadomu

Ieisu tovemulivo 72 ivetunedi

¹ Ieisu tomo'otoqanidiavo kadikaitonu waidie ivesipupu ikakava, mulineye tomo'otoqa 72 ivesinuedi kanatovemulivo waidie'eqa. Kadikailuqa kadikailuqa ivetunedi inagumeta inanaqo taoni bwaigidi wete siaidi waidie, taoninidiavo waidie kawaie Ieisu inanaqo.

² Ieisu ivonedi ivo, “Bagula bwaigiotoqina wete gunabeida vuadi iyatodi ibwabwaku, we tolituqa ge puedi. Beqa kwaivelaukui Yaubada gumanina tonibagula waineye tolituqa puedi inavetunedi vuaqanidiavo inatavidi nabagula waineye.

³ Kwainaqo, we kwainuanuani! Aivetunemi mesaida sipi kwanaqonaqo koukou walawalakai dabadabadi gamwadie.

⁴ Ge kwaikewadi mane kamiyawana waidie, venuana o kaqeyapayapa tupwaidiavo. We kago aitoi kedeye kwaibabaneni, ge taiauda kwaivesipupu kaniakwanina.

⁵ “Kago tamo vanuqa waineye kwailugu vanuqanina kanatomianavo kwaivonavenapwayewedi kwanavo, ‘Kaiwa, memimwasana kwaimiamia, Yaubada inavonavenapwayewemi.’

⁶ We kago vanuqanina kanatomianavo wayaqidi mivonavenapwayewa inanoqai, Yaubada inavalabubuna-giagiamai waidie, we kago gebuka Yaubada ge inavalabubuna-giagiamai waidie, katumapu mivonavenapwayewanina inavila inamai waimie.

⁷ Vanuqanina waineye kwailugu kwamiamia ge kwaimiatovotovona tupwaidiavo vanuqa waidie. Kanikani wete bwasi inavalabubunidi paipaimi kwaikani wete kwaiyemu, ge kwaivovomayamayaqa paina tolituqa ilaubwainedi kaditutula inakewai.

⁸ “Kago vaka taoni waineye kwailugu kanatomiana inavonamwasamwasanemi, vaka kanikani inavalabubuni paipaimi ge kwaivenuanaluqa kwaikanimo.

⁹ Taoninina waineye toviqa kwaikavegiagiamaidi wete tomo'otoqa matatabudi kwaivonedi kwanavo, ‘Yaubada Nakabaloina isauyeni vivimie.’

¹⁰ We kago vaka taoni ge inamwasanemi, kwainaqo taoninina kanakedavo waidie kwaivonedi kwanavo,

¹¹ ‘Kaikiawemi wete mitaoni kaupualina kamakaqeyapayapa kaitutuvutuqidi inaobu. Beqa no mikabakisa waimie kwainuavila! Kavagi kwaiyagova-vekavekaia Yaubada Nakabaloina gunabeida isauyeni vivimie.’

¹² Aivonemi, kawaie Vonayavu Kanakaiata waineye tomo'otoqanidiavo inavedumwekaikaiemi kadikaimatavuloqa bwaigiotoqina inababaneni Yaubada waineye matautauda me Sodoma kadikaimatavuloqa.”

Tomo'otoqa tupwaidiavo Ieisu ge idavetumaqaneni

¹³ Wete Ieisu ivesipupu ivo, “Aiaa, komi me Kolesini wete me Betisaida kabanuakapo waimie, kawaie veviqa bwaigidi kwaibabanedi. Base kabanuavilele avalabubunidi matamie, we ge kwadanuavila. Kabanuavilelenidiavo ge adavalabubunidi me Taia wete me Saidoni matadie. We kago kabanuavilelenidiavo adavalabubunidi tokapoinanidiavo matadie, kaleko mwesimwesiadi idasilagata wete kaupapa idatawetawedi idalagalaga kunukunudie dinuakapo idavekaiveveneni gunabeida dikapoina waidie inuavila.

¹⁴ Aivonemi, kawaie Vonayavu Kanakaiata waineye kamikaimatavuloqa bwaigiotoqina kwaibabaneni Yaubada waineye matautauda me Taia wete me Saidoni kadikaimatavuloqa.

¹⁵ We komi me Kapeneumi taunimi kwasisilagaimi kwavo, ‘Kima giamaima, abame kailugu,’ we mwaqitana Yaubada inaloina kwaiobu towapa divikai waineye.”

¹⁶ Wete Ieisu ivesipupu kanatovemulivo waidie ivo, “Kago aitoi mivona inanoqai, gunabeida guvona inoqai, wete kago aitoi inavedumwekaikaiemi, gunabeida ivedumwekaikaiegu. Wete kago aitoi inavedumwekaikaiegu, gunabeida Iave kagutovetune ivedumwekaikaieni.” Tomo'otoqanidiavo 72 Ieisu navona inoqai ikakava matautauda inaqo ivalabubuni vakai matatabuna Ieisu ivesipupu waidie.

Tomo'otoqanidiavo 72 lituqaeqa ivila

¹⁷ Tomo'otoqanidiavo 72 base Ieisu ivetunedi, gunabeida dilituqa ivekakava medimwasanaotoqa ivila imai Ieisu waineye. Ilekwa ivoneni ivo, “Tomwaya, tomo'otoqa matatabudi mavona inoqaidi wete vaitabu kapoidi kaloinedi mavona ivematamatanidi isauyedi!”

¹⁸ Ieisu divona ibaivilai ivo, “Yau akiseni Seitani abame'eqa ibeku iobu mesaida namanamala inamanamali.

¹⁹ Wete aivonemi, loina gunabeida avelemi beqa komi kanasala baisoa siwasiwayadi wete kwilama kwaibaqadi we ge inaovami wete velulunanina beqa kamiqavia Seitani naveluluna kwaivelulunapeleni beqa ge tamo vakai inakavekapoimi.

²⁰ Kwamwasana paina vaitabu kapoidi mivona ivematamatanidi. Giamaina, we ge saku bwaigina. Mwaqitana kwaimwasana-otoqa paina Yaubada gunabeida kamiwavaqa igililidi nabuki naqeneye abame.”

²¹ Tutuyanina waineye Vaitabu Maqemaqetana Ieisu igiavemwasani beqa ivesipupu ivo, “Tamagu, komu abama wete pwayapwaya kadi Toloina. Avekaiwa waimue paina guvekaivevena kadiyagova kuvaigavuyedi tonuauya wete toyagova waidie, we meqavoi inuaobu mesaida gwagwama, guvekaivevena kadiyagova kulausimataledi waidie. Tamagu, mwaqitana kuvalabubuni dede mesaida paina munuanuana wete igigiavemwasanimu.”

²² Ieisu ivelaukui ikakava tomo'otoqa ivonedi ivo, “Tamagu gunabeida veluluna wete yagova matatabuna dimague iyatodi. Ge tamo aitoi Yau Yaubada Natuna idayagovigu, Tamagu kaiseotoqina iyagovigu. Wete ge tamo aitoi Tamagu idayagovi, Yau Natuna kaiseotoqigu ayagovi wete gumanidiavo avesinuedi waidie Tamagu ailausimataleni.”

²³ Mulineye Ieisu kanatovemulivo kaisekavadi ivonedi ivo, “Kabamwasana waimie paina kabanuavilele avalabubunidi matamie.

²⁴ We aivonemi, palopitavo wete kinivo puedi basenaqaida imiamia wayaqidi bwaigina gulituqavo kwakisekisedi we ge idakisedi wete guvekaivevena kwanoqanoqai we ge idanoqai.”

Loina bwaigiotoqina

²⁵ Mulineye tamo loina kanatovekaivevena itovoi wayaqina Ieisu inavekautovoni beqa ivelautolieni ivo, “Tovekaivevena, vakai aivalabubuni yawaina vaqata aibabaneni?”

²⁶ Ieisu navona ibaivilai ivo, “Loinanina Mosese igililia, banikodiqa ivesipupuyedi? Banikodiqa kigiavemaqetai?”

²⁷ Loina kanatovekaivevena ivesipupu ivo, “ ‘Iave mi Yaubada kwaivenapwayeweni nuapoumi matatabunaeqa, vaitabumi matatabunaeqa, miveluluna matatabunaeqa, wete nuami matatabunaeqa.’ We ‘iamu kivenapwayeweni mesaida taunimu kamuvenapwayewa.’ ”

²⁸ Ieisu ivoneni ivo, “Kaia kuvona-mwaqitana. Loinanidiavo kivalabubunidi yawaina vaqata kibabaneni.”

²⁹ Loina kanatovekaivevena wayaqina taunina inasilagai gumanina tomoqo tonotonovina matadie beqa ivelautoli-vaituqaneni ivo, “Aitoi tomo'otoqa iagu?”

Vonawakedubala Samelia tomoqo giamaina paipaina

³⁰ Tomoqonina navona Ieisu ibaivilai ivo, “Side mesaida. Tamo Diu tomoqina Ielusalemaeqa itauya iobuobu Ieliko. Kedeye tovainaqo ibabanedi ikavekavini kanakaleko ikewadi wete inigei itutu-palapalalai, saiqanaqa idaluvewapai. Nasaku wete namane ieloi ibaileni kedeye ikenokeno we ideqa.

³¹ “Kaiatanina waineye, tamo tovelomu kedanina waineye inaqonaqo ikiseni igemeni.

³² Wete tamo tovelomu kaditokaivaisa Libai namanuqa waineye'eqa mesaida imai ikisanaweni ikiseni, inaqo manawaneye ikisa-vekavekaia wete igemeni.

³³ Mulineye tamo Samelia tomoqina menadoniki imai, gumanidiavo me Diu ge taiauda idaeiaiana, ikiseni nuana ikapo paipaina wete ivenua'ina'inaqeyeni.

³⁴ Inaqo waineye kanagimagima ilaumulamuladi olibe bunamina wete oine beqa mulineye kalekoeqa ipanidi. Matautauda isivetovoia idodoqi nakaisaya doniki dumweneye inaweni vanuqa ulatau waineye ikisavekavini lovana kaitamoqana.

³⁵ Ikawananaqai seluba kailuqa ikewadi inaqo vanuqa ulatau kanatokisavekavina iveleni ivoneni ivo, ‘Dede manenina beqa tomoqo kikisavekavini. Kago mane kivekakavai kawaie aivila aimai wete mane aivelemu mukisavekavina paipaina.”

³⁶ Vesipusipupunina Ieisu ivekakavai mulineye loina kanatovekaivevenanina ivoneni ivo, “Tomoqovonidiavo kadikaitonu waidie'eqa kudanuani, tomoqonina tovainaqo inigei aitoi iana?”

³⁷ Loina kanatovekaivevena ivo, “Tomoqonina ivenua'ina'inaqeyeni gumanina iana.” Beqa Ieisu ivoneni ivo, “Komu kinaqo mesaida kivalabubunedi.”

Ieisu inaqo Malita wete Meli waidie

³⁸ Ieisu mekanatovemulivo inaqonaqo ilekwa tamo taoni waineye. Tamo vavina kadiwavaqa Malita ivelavulavudi ilugu divanuqe kani paipaina.

³⁹ Malita taidi kadiwavaqa Meli imai Ieisu kaqena vivineye imiabui navona ievaneneqeni.

⁴⁰ We Malita kaisedi kanikani ivavalabubuna beqa inua-kapo bwaigina, imai Ieisu ivoneni ivo, “Tomwaya kukiseni, yau kaisegu avavalabubuna, we komu oge ge paipaina kudanuanuana. Meli kudavoneni idamai idakaivaisegu.”

⁴¹ Ieisu ivesipupu waineye ivo, “Malita, Malita, komu taunimu kugigiavenuanuanimu sakunidiavo paipaidi.

⁴² Mwaqitana saku tamo bwaigina ilaubwainemu paipaina kudanuanuana. Sakunina paipaina Meli inuanuana beqa ge kanasala aiketobodeni.”