Luke 1 - Maiadomu

^1-2 Ee iagu Tiopilo, komu tomoqo bwaigimu. Gunabeida kuyagovidi saku tupwaidiavo isauyedi waideye tutuyanina Ieisu imiamia pwayepwayeye. Tomo'otoqa puedi matadieqa sakunidiavo Ieisu ivalabubunidi ikisedi inaqo kabavekakava waineye, gunabeida ivesipupuyedi. Tomo'otoqa tupwaidiavo wayaqidi vesipusipupunina Ieisu paipaina inagililia, beqa inaqo ivesipupu tomo'otoqanidiavo base Ieisu taiauda ilitulituqa waidie, kavagi mediyagova kanasala inagilili-vekavekaia.

³ Yau basenaqaida kanaketoava deqoina tomo'otoqanidiavo kadigiligilili awawawa-vaituqanidi beqa kanatokisanidiavo divesipupueqa saku matatabuna Ieisu paipaina ayagova-vekavekaidi. Paipainanina ayagovi Ieisu valeana matatabuna aigililia kiwawai.

⁴ Basenaqaida valeakavadi kunoqaidi, we dede kagugiligilili kiwawai kiyagova-vekavekaia wete kikawamwaqitaneni.

Anelose Ioni Tobabitaiso natubuqa ivesipupu-luguaqeteni

⁵ Dede mesaida. Tutuyanina Kini Elodi Iudia navikai kanamatatabu iloloinedi, tamo tovelomu imiamia kanawavaqa Sakalaia. Gumanina tubuna tovelomu Ebaya nayoko taiauda ilitulituqa Temupolo waineye. Mwanena kadiwavaqa Elisabeti, gumanidi wete tovelomu Eloni namanuqa waineye'eqa.

⁶ Sakalaia wete Elisabeti divalabubuna tonotonovina Iave mataneye, naloina wete navemataluana matatabudi iematamatanidi.

⁷ Elisabeti gagalidi imokai wete Sakalaia itomwaya beqa ge menatudiavo.

⁸ Tamo wiki Sakalaia menayokovo ditutuya ibabaneni inanaqo Temupolo waineye inalituqa, we no waineye Sakalaia ilitulituqa Iave mataneye.

⁹ Tovelomu divalabubuna mesaida, tamoqana tamoqana kadiwavaqa gileu siaidi waidie igililidi kawaqaina naqeneye ivedodoqidi iligweni, mulineye tamo tovelomu matana idudunidi gileu tamoqana ikewai. Kaiatanina waineye gileunina waineye Sakalaia kanawavaqa igililia ikewai beqa ilugu Iave na  Temupolo Tutudaba Maqemaqetana waineye vane inagabuni didiqa kabakanigabu waineye.

¹⁰ Tutuyanina vane igabugabuni yoko bwaigina maleweye imiakauqa ielaukui.

¹¹ No tutuyanina waineye Sakalaia ilugu Temupolo waineye, Iave na'anelose tamo isauyeni itovoi kataqinaeqa didiqa vane kabakanigabu vilaneye.

¹² Tutuyanina Sakalaia ikiseni itoalavunuqi igololo-otoqa.

¹³ We anelosenina Sakalaia ivoneni ivo, “Ge kigololo. Yaubada gunabeida muvelaukui inoqai. Mwanemu Elisabeti natumu lamoqina inavenatuneni kiqoleni Ioni.

¹⁴ Gumanina inagiavemwasanimu wete nuamu inakavegiagiamaia, we tomo'otoqa puedi taiauda kwaimwasana bwaigina natubuqa paipaina.

¹⁵ Kwaimwasana paina kawaie natuminina tamo tomoqo kanawavaqa bwaigina Iave mataneye. We bwasi veluvelulunidi wete oine ge inayemudi. Tutuyanina inatubuqa Vaitabu Maqemaqetana inaveadaqa-vaqateni.

¹⁶ Wete gumanina me Isileli puedi inagiavenuaviladi inamaiedi Iave di Yaubada waineye.

¹⁷ Ioni kawaie navalabubuna wete naveluluna mesaida Iave napalopita Ilaitia, inagumeta inavetopalimatamatana Iave paipaina. Nalauguguya waineye'eqa tamadiavo we natudiavo taiauda inamaiedi inavekaitamoqana. Wete tovedumwekaikai Iave ge idaekimataneni inagiavenuaviladi kapoina waineye'eqa, katumapu nuauya inakewai tomo'otoqanidiavo divalabubuna tonotonovidi waidie'eqa. Dede mesaida tomo'otoqa inavalabubunidi Iave da Tomwaya namai paipaina.”

¹⁸ Sakalaia anelose ivelautolieni ivo, “Banikodiqa aiyagovedi dede vona mwaqitana? Yau gunabeida atomwaya wete mwanegu imokai.”

¹⁹ Anelose ivesipupu ivo, “Yau Gabalieli, Yaubada natolituqa, tutuya puena mataneye atovotovoi. Ivetunegu valea giamaina amaieni aesipupuyeni waimue.

²⁰ Valeanina avonemu kanamwaqitana inasauyeni Iave natutuya waineye, we bonagu ge kudavetumaqaneni. Beqa deqoina Iave kawamu inakuluya ge kivesipupu kanaketoava kaiatanina waineye natumu inatubuqa!”

²¹ We tomo'otoqa matatabudi ilalaugamasa maleweye tutuya kaniakwanina, nuadi ivilele ivo, “Uvale Sakalaia namia ivekaniakwana Temupolo naqeneye?”

²² Tutuyanina Sakalaia isauyeni ge kanasala inavesipupu waidie, kaia dimanaeqa ivesipupu waidie, beqa tomo'otoqa iyagovi tamo kisa Iave waineye'eqa ikiseni Temupolo naqeneye.

²³ Sakalaia nalituqa kadikaiata ivekakavadi Temupolo waineye mulineye ivila inaqo navanuqe.

²⁴ Kaiata tupwaidiavo ikakava mulineye Elisabeti ive'ina'inaqe beqa ge idasasala imiamia divanuqe wetaki 5.

²⁵ Beqa Elisabeti ivo, “Dede tutuyanina Iave ivenua'ina'inaqeyema bwaigina. Ikaivaisema beqa kave'ina'inaqe, we gagala kanavovomayamayaqa waimeye'eqa ikewayavuleni tomo'otoqa matadie.”

Ieisu natubuqa ivesipupuyeni

²⁶ Elisabeti dive'ina'inaqe kanawetaki 6 waineye, Yaubada na'anelose Gabalieli ivetuneni abame'eqa imai Nasaleta taoni Galili Polovinisi naqeneye.

²⁷ Imai tamo vavine kaniaba digayagaya waineye kanawavaqa Meli. Gumanina gunabeida iveyagutaqoni tamo tomoqo kanawavaqa Iosepa waineye, Kini Deibida tubuleleleqina.

²⁸ Gabalieli imai ivo, “Avelavulavumu Meli, Iave ivenapwayewemu bwaigina wete komu taiauda.”

²⁹ Meli nuana ivilele wete igiaveqauya Gabalieli navalea paipaina, beqa ienuaneni valeanina kananuakawananaqai paipaina.

³⁰ Gabalieli ivo, “Meli, ge kigololo. Yaubada navenapwayewa bwaigina waimue ikenokeno.

³¹ We aivonemu saiqanaqa kive'ina'inaqe natumu lamoqina kivenatuneni kiqoleni Ieisu.

³² Gumanina tomoqo bwaigiotoqina mekanayagova tomo'otoqa inakinanai inavo, ‘Yaubada Tabwaotoqineye Natuna.’ We Iave da Yaubada inasilagai inavekini tubuna Deibida mesaida.

³³ Wete me Isileli, Iakobo tubuleleleqinavo, waidie inaloloina-vaqata, we nakabaloina ge menakabakakava.”

³⁴ Meli anelosenina Gabalieli ivoneni ivo, “Yau ge tamo tomoqo taiauda kadakenokeno, beqa banikodiqa inasauyeni waigue?”

^35-37 Gabalieli Meli navona ibaivilai ivo, “Yaubada kanasala vakai matatabuna inavalabubunidi. Vaitabu Maqemaqetana inaobuma waimue wete Yaubada Tabwaotoqineye navelulunaeqa kive'ina'inaqe. Beqa gwamana kivenatuneni maqemaqetana wete tomo'otoqa inakinakinanai inavo, ‘Yaubada Natuna.’ Kunuani nibaimu Elisabeti. Base tomo'otoqa ivo, ‘Igagala wete imokai ge kanasala inavenatuna.’ We ive'ina'inaqe diwetaki 6 gunabeida ibabaneni.”

³⁸ Meli ivesipupu ivo, “Yau Iave natolituqa, vakai kuvesipupuyeni waigue mesaida kanamwaqitana inasauyeni.” Mulineye Gabalieli Meli ikiaweni.

Meli inaqo Elisabeti iyavusidi

³⁹ Kaiata tupwaidiavo ikakava mulineye Meli itovoi ivalabubuna vedimadimanaeqa inaqo tamo taoni Iudia Polovinisi naqeneye koya siaidi waidie Elisabeti inayavusidi.

⁴⁰ Tutuyanina ilekwa taoninina waineye Sakalaia imiamia ilugu navanuqe Elisabeti ivonamwasamwasanedi.

^41-42 Tutuyanina Elisabeti Meli navonamwasamwasana inoqai gwamana gamodie ipeto bwaigina. Vaitabu Maqemaqetana Elisabeti iveadaqidi beqa bonadi bwaiginaeqa ivo, “Yaubada ivenapwayewemu bwaigina, vevine matatabudi waidie'eqa ge tamo aitoi komu mesaida. Natumunina kivenatuneni Yaubada menavenapwayewa inavalabubuna-giagiamai waineye.

⁴³ Kamuvekimatana bwaigina waimeye paina ma Tomwaya inana kumai kamayavusa paipaina.

⁴⁴ Tutuyanina muvonamwasamwasana kanoqai gamomeye gwamana menamwasana ipeto bwaigina.

⁴⁵ We komu Iave navona kuvetumaqaneni kanamwaqitana inasauyeni, kabamwasana waimue.”

Meli nakewa didiga

⁴⁶ Meli ivo, “Nuagueqa Iave adidigeni.

⁴⁷ Yaubada gumanina kagu Toketoyavu beqa vaitabugu imwasana bwaigina.

⁴⁸ Adidigeni paina oge banikodiqa yau gwamana siaigu megunuaobu avetolituqa waineye, we inunuavekavinigu. Deqoina wete tutuya imaimai lagata tamoqana tamoqana paipaigu inavo, ‘Mwaqitana Iave ivenapwayeweni.’

⁴⁹ Inavesipupuyeni paina Iave Tovelulunaotoqa gumanina Maqemaqetana, we saku bwaigidi ivalabubunidi paipaigu.

⁵⁰ Tutuya matatabuna lagata tamoqana tamoqana waidie meqavoi Yaubada ivekimataneni inavenua'ina'inaqeyedi.

⁵¹ We tomo'otoqanidiavo inualaga wete taunidi ididigedi Iave dimana veluveluluninaeqa iveyavulidi.

⁵² Toloina veluvelulunidi dikabamia waidie'eqa isiobuyedi, we tonuaobu isilagaidi.

⁵³ Wete tolase saku giamaidi iveledi beqa iveadaqidi, we guyoguyodi dimakavakavadi iveviladi.

^54-55 Yaubada ivonadabadaba tubudavo waidie ge inabailedi. Vonadabadabanina Ebelamo waineye wete tubuleleleqinavo waidie ge inakakava inakeno-vaqata. Beqa natolituqavo me Isileli ikaivaiseda, ge idavenuavuluda we mwaqitana ikisavenua'ina'inaqeyeda.”

⁵⁶ Meli navona ikakava, we Elisabeti taiauda imiamia mesaida wetaki kaitonu ikakava, mulineye ivila inaqo navanuqe.

Ioni Tobabitaiso natubuqa

⁵⁷ Elisabeti ditutuya ibabaneni ivebutudi, ivenatuna natudi lamoqina itubuqa.

⁵⁸ Tutuyanina ediavo wete disusuvo valeadi inoqai Iave ivenua'ina'inaqe-otoqedi matatabudi imwasana taiauda.

⁵⁹ We tutuyanina gwamana nakaiata 8 ibabaneni, ediavo wete disusuvo ivaqakauqa bunu kanagusu inavalabubuni me Diu divalabubuna mesaida, wete wayaqidi idaqoleni tamana naesana Sakalaia.

⁶⁰ We Elisabeti ivesipupu ivo, “Gebuka, taiqoleni Ioni.”

⁶¹ Ediavo ivo, “We wavaqanina ge tamo aitoi misusu naqeneye kanawavaqa.”

⁶² Beqa dimadieqa Sakalaia ivelautolieni vakai wavaqa wayaqina inaqoleni.

⁶³ Sakalaia dimanaeqa ivonedi wayaqina lubulubu waineye wavaqa inagililia. Lubulubu ikewai igililia ivo, “Kanawavaqa Ioni.” Matatabudi ikiseni nuadi ivilele.

⁶⁴ Tutuyanina gwamana kanawavaqa igilili-kakavai, vedimadimanaeqa Sakalaia kawana imeaqana, meana itonova wete ivesipupu-vaituqana, beqa Yaubada ididigeni.

⁶⁵ We ediavo ikiseni wete igololo-otoqa, we valeana ivesipupuyeni Iudia kanapopo kanatomia waidie.

⁶⁶ Tomo'otoqanidiavo sakunidiavo valeadi inoqaidi ienuana taunidi ivelautoliedi ivo, “Kawaie gwamana nalituqa vakai?” Dede mesaida ivesipupuyeni paina Iave naveluluna waineye ikenokeno.

Sakalaia nakewa didiga

⁶⁷ Vaitabu Maqemaqetana Ioni tamana Sakalaia iveadaqi beqa ivonavaqata Yaubada navona ivesipupuyedi ivo,

⁶⁸ “Iave taididigeni, gumanina me Isileli da Yaubada, paina gunabeida imai ikaivaiseda wete iketoyavuda.

⁶⁹ Kada Toketoyavu Veluvelulunina Iave isilagai paipaida Natolituqa Kini Deibida namanuqa waineye'eqa.

⁷⁰ Basenaqaidaotoqa Iave ivonadabadaba napalopitavo maqemaqetadi waidie'eqa

⁷¹ inaketoyavuda kadaqaviavo waidie'eqa wete gumanidiavo iedumwekaikaieda diveluluna waineye.

⁷² We tubudavo ivenua'ina'inaqeyedi, we navonadabadabanina taunina ivalabubuni inuavekavini.

⁷³ Vonadabadabanina ivalabubuni tubuda Ebelamo waineye

^74-75 inaketoyavuda kadaqaviavo dimadie'eqa, mulineye taivetolituqa paipaina ge taigololoyeni. We nakaivaisanina waineye yawaida kanamatatabu paipaina, davalabubuna tonotonovidi wete maqemaqetadi mataneye.”

⁷⁶ We Sakalaia ivonavaqata natuna paipaina ivo, “Wete natugu, tomo'otoqa inaqolemu Yaubada Tabwaotoqineye napalopita, paina komu naqaida kigumeta Iave nakeda kivusia.

⁷⁷ Natomo'otoqa waidie kilauguguya dikapoinaeqa inanuavila kavagi Yaubada inanuataqonidi ketoyavu inababaneni.

⁷⁸ Dede saku matatabudi inasauyedi paina Yaubada ivenua'ina'inaqeyeda bwaigina beqa Mesaia mesaida valavala matapiolina saiqanaqa inamai abame'eqa

⁷⁹ we meqavoi wapa igololoyeni wete vaitoma waineye imiamia inamaqetedi, we inagumeteda kavagi damiana inavegiagiamai.”

⁸⁰ Ioni itaulai wete vaitabuna iveluluna. We pwayapwayamaiqe imiamia, kanaketoava isauyeni nalituqa ivelamu ilalauguguya me Isileli waidie.