Loina Kanaveluqa 7 - Maiadomu

Me Isileli Iave natomo'otoqavo

¹ Mosese me Isileli ivonedi ivo, “Tutuyanina Iave mi Yaubada inamaiemi pwayapwayanina kwaikewai, kabaloina 7 inakwavinedi inasauyedi, gumanidiavo bwaigidi wete veluvelulunidi matautauda komi. No kabaloinanidiavo: Ititi, Gagasaiti, Amoli, Kenani, Pelisaiti, Aibaiti wete Iebusi.

² Dede kabaloinanidiavo Iave mi Yaubada inakalaqeiedi waimie kwaivelulunapeledi we kwailaumutula-kakavadi. We ge taiauda kwaiveiana wete kwaivenua'ina'inaqeyedi.

³ Ge kwainaqidi tomo'otoqanidiavo. Wete ge natumiavo vevinediavo kwaitagwanedi natudiavo lamoqidiavo inanaqidi wete natumiavo lamoqidiavo ge kwaitagwanedi natudiavo vevinenidiavo inanaqidi.

⁴ Dede valabubunanina waineye natumiavo inasiviledi ge Yau waigue inasobwanu we inanaqo yaubada sulina waineye inasobwanu. Kago mesaida Iave kanakapoka inaoqala vedimadimanaeqa inalaumutulimi.

⁵ “Komi dede mesaida kwaivalabubunedi waidie: dididiqa velomu kabakanigabu kwaitutu'ueuedi, digileu maqemaqetana kwaitutumugumuguya, dikoqala Asela dikabasobwanu kwaitalaqidi wete ditokwalui kwaitunudi inakalaidi.

⁶ Komi dede mesaida kwaivalabubunedi paina komi Iave mi Yaubada natomo'otoqa, ivesinuemi wete iyatokemi tomo'otoqa matatabudi pwayepwayeye waidie'eqa, komi natomo'otoqa nuapouna.

⁷ “Iave wayaqina komi tomo'otoqanimiavo, ivesinuemi ge mikabaloina bwaigina paipaina, komi mimanuqa siai-otoqina mulineye tupwaidiavo kabaloina.

⁸ We Iave mwaqitana ivenapwayewemi wete sakunidiavo ivonadabedabedi kanawavaqaeqa tubumiavo waidie inuanuanidi. Beqa navelulunaeqa iketoyavumi ikewaluguaqetemi Itipita Pelo naveluluna waineye'eqa, gumanina iloloinemi vikainina waineye kwavetolituqa-maimaiqa.

⁹ Beqa kwaiyagova-vekavekaia Iave mi Yaubada mwaqitanaotoqa Yaubada, natomo'otoqavo ge inabailedi o nuana inavulu. We vakai ivonadabedabedi mesaida inavalabubuni. We meqavoi inavenapwayeweni wete naloina inavekimatanedi, Yaubada navenapwayewa ge menasivilavila inaketo'iwaqi waidie inadamana inanaqo tubuleleleqidiavo 1,000 lagata imaimai waidie.

¹⁰ We meqavoi ivedumwekaikaieni vedimadimanaeqa inakaimatavuloqidi we inaleodi.

¹¹ Beqa loina wete vemataluana matatabuna deqoina avonevonemi kwaivekimatana-vekavekaiedi.”