Loina Kanaveluqa 18 - Maiadomu

Valabubuna dede Iave ivedumwekaikaiedi

⁹ Mosese tomo'otoqa ivonedi ivo, “Tutuyanina kwailugu pwayapwayanina Iave mi Yaubada ivelevelemi waineye, no kabaloinanidiavo divalabubuna kapoidi kabavovomayamayaqa ge kwaikisavaidi mesaida kwaivavalabubunedi.

^10-11 Wete ge tamo aitoi natuna vavinena o lamoqina kwaivelomuyeni kaie kwaigabuni o kwaitunuya, Ge tamo saku kabakisa, kiakiaya kaisaya bonadieqa, gileu o vakai inakenolaulagateni inavesipupu kawaie vakai inasauyeni paipaidi ge kwaivelituqedi, Ge tamo tokwakwasala wete yaiyaina taiauda kwaivesipupu saku tupwaidiavo kawaie inasauyedi kwaiyagovidi, Ge tamo kwailauniboqana wete kwaivebwaqavu, Ge kwaikawagweli, Ge kwaibwalata, Ge towapa vaitabudi wete kainapwadi waidie kwaivesipupu, Ge kwaitagwanedi vaitabu kapoidi wete kainapwadi inalugu waimie.

¹² “Aitoi dede mesaida inavalabubunedi Iave mekanakapoka inavedumwekaikaieni. Pwayapwayanina waineye kwailugu kabaloinanidiavo dede sakunidiavo ivalabubunidi, beqa Iave mi Yaubada inakwavinedi inasauyedi matamie.

¹³ We komi ilaubwainemi tutuya matatabuna mivalabubuna tonotonovidi Iave mi Yaubada mataneye.

¹⁴ Pwayapwayanina waineye saiqanaqa kwailugu kwaikewai, tomo'otoqanidiavo yaiyaina kanatosobwanuvo tutuya puena matatabudi inaqo tokwakwasalanidiavo waineye ivelaukuiedi inavulataqonidi, we Iave mi Yaubada iketobodemi, sakunidiavo kapoidi ge kwaivalabubunidi.”

Iave palopita inavetuneni mesaida Mosese

¹⁵ Mosese ivesipupu tomo'otoqa waidie ivo, “Kawaie Iave tamo palopita inavetuneni mesaida yau me Isileli waimie'eqa gumanina navona kwainoqai kwaivekimataneni.

¹⁶ Base Koya Sainai waineye tamiakauqa, kwavelaukui Iave mi Yaubada waineye kwavo, ‘Ge wayaqima Iave ma Yaubada bonana kainoqai wete nakaiyabeyabela bwaigina kaikiseni kago mesaida kaiwapa.’

¹⁷ “We Iave ivesipupu waigue ivo, ‘Vakai me Isileli ivesipupuyedi giamaidi waigue.

¹⁸ Kawaie Yau tamo palopita aivesinueni me Isileli waimie'eqa mesaida komu. We guvona aiyatodi kawaneye beqa guloina matatabuna inavesipupuyeni tomo'otoqa waidie.

¹⁹ Kago palopita kaguwavaqaeqa inaesipupu aitoi bonana ge inanoqai wete inavekimataneni aikaimatavuloqi.

²⁰ We kago tamo palopita kaguwavaqaeqa inavonakatupoe kwailuvewapai, wete kago tamo palopita tupwaidiavo yaubadavo kadiwavaqaeqa inaesipupu kwailuvewapai.’

²¹ “Oge taunimi kwaivelautoliemi kwanavo, ‘Banikodiqa kaiyagovedimo valeanina Iave navona o gebuka?’

²² Dede mesaida kwaiyagovi, kago tamo palopita Yau Iave kaguwavaqaeqa inaesipupu we navona ge inavetomo'otoqa, vesipupunina Yau Iave ge guvona. Palopitanina taunina nanuanuaeqa iesipupu, beqa ge kwaigololoyeni.”