Loina 18 - Maiadomu

Naqi kanaloina paipaina

¹ Matautauda Iave ivesipupu Mosese waineye ivo,

² “Kivesipupu me Isileli waidie kunavo, ‘Yau Iave mi Yaubada.

³ We komi ge kwaivalabubuna mesaida me Itipita, gumanidiavo base taiauda kwamiamia, wete me Kenani divalabubuna ge mesaida kwaivalabubunedi, gumanidiavo imiamia pwayapwayanina waineye akedagumetemi kwanaqonaqo. Komi divalabubuna ge kwaivemuliedi.

⁴ Yau Iave mi Yaubada, beqa guloina kwaivekimatanedi wete guvemataluana kwaivalabubunidi.

⁵ We kago guloina kwaivemuliedi wete guvemataluana kwaivalabubunidi mia giamaiotoqina kwaibabaneni. Yau Iave.

^6-18 “ ‘Yau Iave beqa guvemataluana kwainoqaidi. Dayaqimi tamoqana ge taiauda kwainaqi mesaida inamiavo, tamamiavo, taimiavo o tatamiavo, novumiavo, lamwaiamiavo, avumiavo wete yayamiavo.

¹⁹ “ ‘Tutuyanina vavina nawetaki inababaneni ge taiauda kwainaqi paina gumanina ge maqemaqetana.

²⁰ “ ‘Wete ge tamo tomoqo mwanena taiauda kwainaqi, kago no mesaida kwaivalabubunedi komi ge maqemaqetami.

²¹ “ ‘Natumiavo didiqa tabwaneye ge kwaivelomuyedi yaubada katupoe Moleki waineye. Yau Iave mi Yaubada, kago no mesaida kwaivalabubunedi kaguwavaqa kwaigiavemayamayaqi.

²² “ ‘Ge tamo tomoqo iana lamoqina taiauda inanaqi. Dede valabubunanina kapoiotoqina matague.

²³ “ ‘Ge tamo tomoqo o vavina kaisaya taiauda inanaqi. Kago dede mesaida kwaivalabubunedi komi ge maqemaqetami.

²⁴ “ ‘Komi ge kwaibwanenemi dede valabubunanidiavo beqa. No tomo'otoqanidiavo Kenani pwayapwayana waineye imiamia dede mesaida ivavalabubunedi we ge maqemaqetadi matague, beqa aikwavinedi inasauyedi pwayapwayanina waineye we komi kwainaqo kwaikewai no waineye kwaimiana.”