Loina 1 - Maiadomu

Velomu ivalabubuni kapoina kanabaivila paipaina

¹ Iave iveqoleluguaqeta Mosese waineye Ukweta Maqemaqetana waineye'eqa ivesipupu ivo,

² “Deqoidi velomu kanavemataluanavo. Dede vemataluananidiavo me Isileli kuvonedi kunavo, ‘Kago aitoi Iave waineye kaisaya inavelomuyeni, kanasala tamo bulumakau, sipi o gouti kadiyoko waineye'eqa inakewai navelomu paipaina.

³ “ ‘Kaisayanina ilaubwaineni kanasala lamoqina wete giamaiotoqina ge mekanaviqa o lumalumana. Inamaieni Ukweta Maqemaqetana kana'awa waineye kavagi Yau Iave aikawagiagiamaieni.

⁴ We tomoqonina dimana inayatoi kaisayanina kunukununeye we nawapa aikawagiagiamaieni, kanaketopesala nakapoina inakewayavuleni.

⁵ Iave mataneye kaisayanina inaluvewapai, we Eloni natunavo tovelomuvo dayaqina inakewai inanaweni Ukweta Maqemaqetana kawaneye, no waineye didiqa velomu kabakanigabu dolena pulina inalau'itaitalidi.

⁶ Kaisayanina bununa inageai, matautauda inakaipilupilumi.

⁷ We tovelomuvo kaikweukweu inayatodi didiqa tabwaneye inalevai inakalakalata.

^8-9 We tomoqonina kaisayanina dukuna naqena wete kaqena inalegwadi tovelomuvo inaveledi. We tovelomuvo piluma matatabuna, kunukununa wete yapana taiauda inayatodi kaikalakalata tabwadie didiqa waineye, kaisayanina matatabuna inakalagualidi. Velomu gabugabunina tomoqonina inakalaqeimaiqeni Yau Iave waigue, maqaina giamaina wete kiwanina gukabamwasana.” Wete Iave Mosese ivoneni tomo'otoqa kanasala inakalaqei kaisayanidiavo mesaida sipi, gouti, malasi wete bunetutu mwanewaudi inagabunidi velomu paipaina wete vemataluananidiavo ivoneni kaisayanidiavo paipaidi.