Kabavelamu 9 - Maiadomu

Yaubada navonadabadaba Noa waineye

¹ Matautauda Yaubada Noa wete natunavo ivonavenapwayewedi ivo, “Kwavenatuna kwavepue-otoqa pwayapwaya kwaveadaqi.

² We kaisaya bwaigidi, kaisaya siaidi daledaledi pwayapwaya tabwaneye, manuqa wete iqana inagololoyemi. Kadiloina komi dimamie ayatodi.

³ Yoqoyoqo puena kami aivelemi. Mesaida base yoqoyoqo puena mevuadi we melugudi avelemi kami paipaina, deqoina puepuena aivelemi kami paipaina.

⁴ “We dede mesaida, kaisaya yawaina dayaqina waineye imiamia beqa kaisaya medayaqina ge kwaikaniaqa. Kanaketoava dayaqina inalailolo inaobu matautauda kwaikania.

⁵ Kago kaisaya tomoqo inaluvewapai, aibaivila kanakaimatavuloqa paipaina. Dede mesaida, kago tamo aitoi tomoqo inaluvewapai, aibaivilai waineye kanakaimatavuloqa.

⁶ Yau Yaubada tomo'otoqa avalabubunidi taunigu kagukisa mesaida. Beqa aitoi tomoqo inaluvewapai, toluvewapanina inaluvewapai.

⁷ “We komi kwavenatuna kwavepue-otoqa; kwasaila pwayapwaya matatabuna waineye kwaveadaqi.”

⁸ Matautauda Yaubada Noa menatunavo ivonedi ivo,

⁹ “Kwakiseni, tutuya dede waineye Yau kaisegu guvonadabadaba waimie avalabubuni wete tubuleleleqimi imaimai mulimie waidie,

¹⁰ wete yoqoyoqo meyawaidi pwayepwayeye taiauda waimie—manuqa puepuedi, kaisaya tauvanuqa wete kaisaya walawalakai—gumanidiavo wageye'eqa isauyedi komi taiauda.

¹¹ Guvonadabadaba waimie avalabubuni dede mesaida: ge tamo tutuya wete mesaida dede wayaqata aivoneni inakavekapoidi yoqoyoqo puepuedi yawayawaidi pwayepwayeye.”

¹² We Yaubada ivo, “Dede kiakiaya vonadabadaba waimie paipaina, wete lagata imaimai waidie wete yoqoyoqo waidie avavalabubuni.

¹³ Waumana waineye guwalikubwa aiyatoi. Ayatoi guvonadabadaba Yau komi taiauda wete yoqoyoqo puepuedi waidie pwayapwaya tabwaneye inavekiakiaya.

¹⁴ Tutuya puepuena waumanaeqa abama aiumai, we walikubwa inasauyeni waumana waineye,

¹⁵ guvonadabadaba Yau komi taiauda wete yoqoyoqo puepuedi waidie inagiavenuanuanigu ge tamo kaiata wayaqataeqa yoqoyoqo meyawaidi puepuedi aikavekapoidi.”