Kabavelamu 48 - Maiadomu

Iakobo Ipileimu wete Manasa ivonavenapwayewedi

¹ Tamo kaiata waineye tamo tomoqo Iosepa ivoneni ivo, “Tamamu iviqa.” Beqa Iosepa natunavo kadikailuqa Manasa wete Ipileimu ikewadi inaqo Iakobo inakiseni.

² Tutuyanina Iosepa ilekwa tamo tomoqo Iakobo ivoneni ivo, “Natumu Iosepa imai inakisemu,” beqa Iakobo ivepaisiwa kanasomala waineye imialaga.

³ Matautauda Iakobo Iosepa ivoneni ivo, “Yaubada Veluvelulunaotoqina isauyeni waigue vanuqa Lusi Kenani waineye ivonavenapwayewegu,

⁴ wete ivonegu ivo, ‘Natumwavo puedi aivelemu, tubuleleleqimwavo aikavepuedi dikabaloina inavebwaiga wete dede pwayapwayanina aiveledi tubuleleleqimwavo dipwayapwaya ge menakabakakava.’

⁵ “Komu natumwavo kadikailuqa Manasa wete Ipileimu, gumanidiavo itubuqa Itipita waineye mulineye yau amai vikai dede waineye, gumanidiavo mesaida taunigu natugwavo Simioni wete Lubeni.

⁶ We kago mwanemu inavenatuna lamoqidiavo puedi komu paipaimu, wete tatadiavo Manasa wete Ipileimu kadiwavaqaeqa dipwayapwaya inakewai.”

¹³ Iosepa natunavo kadikailuqa imaiedi Iakobo vivineye, Ipileimu ivetovoia Iakobo kanakelie we Manasa ivetovoia Iakobo kanakataqina waineye.

^14-21 We Iakobo dimana isiviviedi, kanakataqina iyatoi tubuna siaina Ipileimu kunukununeye we kanakeli iyatoi tubuna bwaigina Manasa kunukununeye. Tutuyanina waineye Iosepa ikiseni tamana dimana kanakataqina iyatoyatoi Ipileimu kunukununeye ge idamwasana. Beqa tamana dimana ikewai, wayaqina dimana kanakataqina Ipileimu kunukununeye inamaieni Manasa kunukununeye inayatoi. Iosepa ivesipupu tamana waineye ivo, “Tamagu, we ge mesaida! Manasa gumanina tomwayai, waineye kamukataqina kudayatoi kunukununeye.” We tamana ibaila ivo, “Natugu, vakai ayagovi avavalabubuni. Manasa kanawavaqa bwaigina wete tubuleleleqinavo tamo kabaloina, we taina Ipileimu gumanina bwaigiotoqina matautauda tatana, we wete tubuleleleqinavo pueotoqidi dikabaloinavo inavepue-otoqa.” Matautauda Iakobo gwagwama kadikailuqa ivonavenapwayewedi ivo, “Yaubada gumanina tamagu Aisake wete tubugu Ebelamo waineye isobwanu, Yaubada gumanina yawaigu kanamatatabu waineye ivekisabodebodegu mesaida sipi kaditokisavekavina, na'anelose iketoyavugu kabaveilaqi waidie, inavonavenapwayewedi dede gwagwamanidiavo. Aivelaukui gwagwamanidiavo waidie'eqa tomo'otoqa inanuavekavini kaguwavaqa wete tamagu Aisake kanawavaqa wete tubugu Ebelamo kanawavaqa, wete aivelaukui tubuleleleqidiavo inavepue-otoqa pwayapwaya tabwaneye. Kaiatanina waineye me Isileli inavonavenapwayewa kamiwavaqa inavesipupuyedi inavo, ‘Taivelaukui Yaubada waineye inavonavenapwayewemi mesaida Ipileimu wete Manasa ivonavenapwayewedi.’ ” No mesaida ivesipupu Ipileimu kanawavaqa naqai ikinanai matautauda Manasa. Matautauda Iakobo Iosepa ivonavenapwayeweni wete ivesipupu waineye ivo, “Kukiseni, Yau saiqanaqa aiwapa, we Yaubada komu taiauda, inakewavilemu tubumwavo dipwayapwaya waineye.”