Kabavelamu 46 - Maiadomu

Iakobo menatunavo wete tubunavo taiauda inaqo Itipita pwayapwayana waineye

¹ Beqa Iakobo nasakuvo matatabudi ivalabubunidi ilogwegwe inaqo Itipita pwayapwayana waineye nasusuvo taiauda. Tutuyanina ilekwa Bedisiba taoni waineye, kaisayanidiavo iluvewapadi igabunidi tamana Aisake na Yaubada waineye velomu paipaina.

² No lovananina Yaubada ivesipupu Iakobo kenokisakisaeqa waineye ivo, “Iakobo! Iakobo!” Ibaivila ivo, “Uu, Yau sideqoigu.”

³ Matautauda Yaubada ivo, “Yau tamamu na Yaubada. Ge kigololo kinaqo Itipita pwayapwayana waineye, paina kawaie Yau tubuleleleqinavo aikavepuedi dikabaloina inavebwaiga no vikainina waineye.

⁴ Yau taiauda tainaqo Itipita pwayapwayana waineye matautauda mulineye tubuleleleqimwavo aiviledi aimaiedi dede waineye. Tutuyanina kiwapa, natumu Iosepa matamu inagialovoqi.”

⁵ Beqa Iakobo Bedisiba taoni ikiaweni. Natunavo idodoqi wagabiubiu waineye, dede mesaida mwanediavo wete natudiavo siaidi matatabudi ivekaladodoqa wagabiubiu waidie, gumanidiavo Pelo ivetunedi paipaidi.

^6-7 Dikaisayavo matatabudi wete sakunidiavo matatabudi Kenani waineye ikewadi inawedi Itipita waineye. Beqa Iakobo inaqo Itipita pwayapwayana waineye nasusuvo taiauda, mesaida natunavo lamoqidiavo, vevinediavo wete tubunavo.

Iakobo wete nasusuvo taiauda imai Itipita

²⁸ Iakobo Iuda ivetuneni inagumeta, inanaqo Iosepa waineye inavelaukuieni Goseni kanakeda paipaina. Tutuyanina Iakobo wete nasusuvo imai Goseni waineye,

²⁹ Iosepa nawagabiubiu ivalabubuni itauya tamana Iakobo inakiseni Goseni navikaie. Tutuyanina tamana ikiseni, iloaqavuya we itaitaiqa tutuya kaniakwanina.

³⁰ Matautauda Iakobo ivesipupu Iosepa waineye, “Deqoina maiqimu akiseni we ayagovi komu giladi meyawaimu, beqa yau kanasala aiwapa.”