Kabavelamu 42 - Maiadomu

Iakobo natunavo ivetunedi inaqo Itipita

¹ Kaiatanina waineye Iakobo Kenani pwayapwayana waineye imiamia inoqai kanikani ikenokeno Itipita waineye, beqa ivesipupu natunavo waidie ivo, “Uvale kwamimiavoqavoqana?

² Kwavevaneneqa! Anoqai Itipita waineye kanikani ikenokeno. Kwanaqo no waineye kanikani kwagimwane paipaida, beqa kida mekada taimiamia we ge taiwapa.”

³ Beqa Iosepa tatanavo kadikuma 10 itauya inaqo iobu Itipita kanikani inagimwane.

⁴ We Iakobo ge idatagwaneni Iosepa tataotoqina Beniamina taiauda idanaqo paina igololo inuani kago tamo vakai kapoina waineye inasauyeni.

⁵ We lase bwaigiotoqina Kenani waineye, beqa tomo'otoqa puedi wete Iakobo natunavo inaqo iobu Itipita waineye kanikani inagimwane.

⁶ Kaiatanina waineye Iosepa Itipita kanatoloina, gumanina Itipita pwayapwaya matatabuna iloloineni wete kanikani iegimwane tomo'otoqa matatabudi waidie, beqa tutuyanina Iosepa tatanavo ilekwa maiqidieqa isobwanu pwayepwayeye waineye.

⁷ We Iosepa tatanavo ikisedi iyagovidi, we namaiseba nigo ge idayagovidi ivona-veluveluluna waidie ivesipupu ivo, “Komi kaiebei waineye kwamai?” We tatanavo ibaivila ivo, “Kima kamai Kenani pwayapwayana waineye kanikani kaigimwane waimue.”

⁸ Iosepa tatanavo iyagovidi, we tatanavo Iosepa ge idayagovi.

⁹ We Iosepa kanakenokisakisa inuani paipaidi waidie ivesipupu ivo, “Komi tokisavetovetonova! Kwamai pwayapwaya dede waineye kwaiyagovima mapwayapwaya ge mekanatovekisabodaboda beqa kanasala kwailuguma kwainigema.”

¹⁰ We tatanavo ibaivila ivo, “Gebuka tomwaya, kima mutolituqavo kamai kanikani kaigimwane.”

²¹ Matautauda tatanavo kaisedi ivesipupu ivo, “Base tutuyanina taida gulinina waineye ielaukuieda venua'ina'inaqe paipaina waideye, we takiseni nuapouna iveviqa bwaigina we kida ge navona tadanoqai. Kida taunida taikuvanida, beqa deqoina mwau talalautovoni.”

²² Beqa Lubeni ibaivila ivo, “No tutuyanina waineye avonemi avo, ‘Gwamana ge waineye dimada taisiketoidi!’ We komi bonagu ge kwadanoqai. Beqa deqoina kida dayaqina kanabaivila talalautovoni.”

²³ We tutuyanina Iosepa waidie iesipupu me Itipita bonadieqa we tamo tomoqo isisivilai waidie, beqa Iosepa divona ievaneneqedi. We tatanavo ge idayagovi Iosepa iyagovi vakai iesipupuyeni. We Iosepa tatanavo witi igimwane waineye ikewadi iviledi inawedi Kenani tamadi waineye. Mulineye ivila imai wayaqidi witi puedi inagimwane.