Kabavelamu 40 - Maiadomu

Iosepa kenokisakisa kailuqa igiavemaqetadi

¹ We tamo kaiata oine kanatokalaqeivo kaditogumeta wete beledi kanatokanigabuvo kaditogumeta tamo kapoina ivalabubuni Pelo waineye.

² We Pelo kanakapoka ioqala natolituqavo kadikailuqa bwaigidi waidie

³ beqa Pelo iyatodi ivepilisina delinina waineye Iosepa imiamia.

⁴ We delinina kanatogumeta Iosepa ivoneni iekisabodebodedi. Kadikailuqa imiamia deli waineye tutuya kaniakwanina.

⁵ Tamo lovana waineye kadikailuqa ikenomataiva ikenokisakisa. Ikenokisakisa we kadikenokisakisa kailuqa kadinuakawananaqai sulidi.

⁶ Kawakawaie Iosepa inaqo waidie ikisedi nuadi ikapo.

⁷ Beqa ivelautoliedi ivo, “Uvale maiqimi kadikisa mesaida nuakapo kasiotoqa?”

⁸ We ibaivila ivo, “Lovane kamakailuqa kakenokisakisa, we no ge tamo aitoi inagiavemaqetadi kamakenokisakisavo kadinuakawananaqai.” Matautauda Iosepa ivo, “Kaia Yaubada kaisena kanasala inakaivaiseda kadakenokisakisa taigiavemaqetadi. Kamikenokisakisanidiavo kwavonegu.”

⁹ Beqa oine kanatokalaqei kanakenokisakisa Iosepa ivoneni ivo, “Kagukenokisakisa waineye akiseni oine bulavina matague,

¹⁰ we oine bulavina dimana laqalaqadi kaitonu. We tutuyanina lugudi iyatodi vedimadimanaeqa idia we waidie vuadi iyatodi ibwabwaku.

¹¹ We Yau Pelo kanavedi akakavikavini, beqa vuadi agadidi we abibidi bwasidi iobu Pelo kanavedi waineye, matautauda kanavedi dimaneye ayatoi.”

¹² Matautauda Iosepa ivesipupu waineye ivo, “Kamukenokisakisa kanagiavemaqeta dede mesaida: Dima kaitonu kananuakawananaqai kaiata kaitonu.

¹³ Kaiata kaitonu inakakava waineye Pelo inakewaluguaqetemu deli waineye'eqa we inayatomu mukabatovoi waineye kulitulituqa, we komu Pelo kanavedi dimaneye kiyatoi kaia base mesaida kuvavalabubunedi tutuyanina komu oine kanatokalaqeivo kaditogumeta.

¹⁴ We Yau nuamu ge inavulu tutuyanina kabamiana giamaina waineye kimiamia, we kanasala Pelo kivoneni paipaigu kikaivaisegu deli waineye aisauyegu.

¹⁵ Paina tomo'otoqa ivainaqogu Isileli pwayapwayana waineye'eqa ikewagu imaiegu. Yau ge tamo kapoina adavalabubuni dede waineye, we deli naqeneye iyatogu.”

¹⁶ Tutuyanina tokanigabu inoqai kenokisakisa gumegumetana kanagiavemaqeta giamaiotoqina ivoneni ivo, “Yau wete akenokisakisa. Kagukenokisakisanina dede mesaida: Yau beledi meginaedi kaitonu aqabaqabadi kunukunugue.

¹⁷ We ginae waidie kanikani giamaidi gabugabunidi sulidi sulidi Pelo paipaina, we manuqa imai ginae tabwaotoqineye kunukunugue ikanikanidi.”

¹⁸ Iosepa ibaivila ivo, “Kamukenokisakisa kanagiavemaqeta dede mesaida: Ginae kaitonu kananuakawananaqai kaiata kaitonu.

¹⁹ Kaiata kaitonu inakakava Pelo inakewaluguaqetemu natolauqaviavo inavonedi kunukunumu inagusuya, we welavi waineye vovomu inalautauleni. We manuqa inamai vaiqomu inakania.”

²⁰ Kaiata kaitonu ikakava Pelo nakaiata tubuqa. Beqa kani bwaigina ivalabubuni natolituqavo bwaigidi paipaidi. We no waineye Pelo natolauqaviavo ivonedi oine kanatokalaqei wete tokanigabu ikewaluguaqetedi.

²¹ We oine kanatokalaqei iyatoi nakabalituqa waineye.

²² Matautauda natolauqaviavo ivonedi tokanigabu kunukununa inagusuya we vovona inalautauleni welavi waineye. Iosepa kadikenokisakisa igiavemaqetadi kaia mesaida isauyedi.

²³ We oine kanatokalaqei Iosepa ge idanuani paipaina idavesipupu Pelo waineye, nuana ivulu beqa Iosepa giladi deli waineye imiamiana.