Kabavelamu 39 - Maiadomu

Potipali mwanena Iosepa ikisakwayaieni

¹ Tutuyanina tovegimwanenidiavo Iosepa ikewai inaweni Itipita kabaloina bwaigina waineye, matautauda Potipali igimwanei gumanina nalituqa paipaina. Potipali tamo Itipita tomoqina wete tolituqa bwaigina Pelo paipaina, we Pelo navanuqa kanatomiagamata kaditogumeta.

² Beqa Iosepa imiamia tomoqonina navanuqe, gumanina igimwanei. We Iave Iosepa taiauda imiamia we ikaivaiseni nalituqa waineye, beqa vakai puepuedi Iosepa ivalabubunidi kaia giamaikavadi.

³ Potipali iyagovi Iave Iosepa taiauda imiamia ikakaivaiseni, beqa vakai ivalabubunidi kaia giamaikavadi,

⁴ we paipaina imwasana. Beqa ivoneni kaia Iosepa kaisena natolituqa bwaigina, we iyatoi inavetogumeta navanuqa kanatolituqavo, wete nasakuvo matatabudi iyatodi dimaneye inavekisabodebodedi.

⁵ No tutuyanina Iosepa ilitulituqa Potipali waineye, Iave Potipali navanuqa kanatomo'otoqavo ivonavenapwayewedi giamaina ibababaneni. Wete nasaku puepuena vanuqa naqeneye wete natanoqa ivonavenapwayewedi giamaikavadi. Paina Iosepa taiauda imiamia, beqa dede mesaida Iave ivalabubunedi.

⁶ Potipali nasakuvo matatabudi kadiloina Iosepa iveleni inavekisabodebodedi, we ge tamo vakai paipaina idanuanuana kaia kanikani inakanikani. Iosepa itubumatakaikai wete kanakisa giamaiotoqina tomobwaina.

⁷ Tutuya kalakusana imiamia we Potipali mwanena ikisakwayaieni beqa ivoneni ivo, “Kumai, taiauda taikenoluqa.”

⁸ We Iosepa ibaila ivonedi ivo, “Dede waineye amiamia avetoloina beqa Potipali navanuqa naqeneye ge tamo vakai paipaina idanuanua. Nasakuvo matatabudi dimague iyatodi aekisabodebodedi.

⁹ Yau avetoloina vanuqa dede naqeneye mesaida taunina, we no ge tamo vakai idavekokoleni waigue kaia komi mwanena. Beqa banikodiqa, dede kapoina bwaigiotoqina aivalabubuni? Kago aivalabubuni aikapoina-otoqa Yaubada waineye.”

¹⁰ We kaiata tamoqana tamoqana vavinenidi Iosepa iweweweseni, we ibaila ge idakenoluqa we ge taiauda idamiamia.

¹¹ Tamo kaiata Iosepa inaqo vanuqa naqeneye inalituqa, we no kaiatanina ge tamo aitoi vanuqa kanatolituqa idamiamia no waineye.

¹² Matautauda Potipali mwanena inaqo Iosepa waineye we kanakaleko ikavikavini wete ivoneni ivo, “Tainaqo, taiauda taikenoluqa!” We Iosepa ilaupeledi ideqa isauyeni maleweye, we kanakaleko isiyavuya vavina dimadie.

¹³ Tutuyanina vavinenidi ikiseni Iosepa ideqa kanakaleko isiyavuya dimadie,

¹⁴ we vanuqa kanatolituqavo iqoledi imai waidie, we ivonedi ivo, “Kwakise side! Tomoqo Isileli mwanema imaieni waimeye isasaidibiema. Matutudaba naqeneye iluguma wayaqina inakenovema, we bonama bwaigina kabwau.

¹⁵ Tutuyanina bonama inoqai, kanakaleko ikenokeno vivimeye, we ideqa isauyeni maleweye.”

¹⁶ We vavinenidi Iosepa kanakaleko iyatoi vividie imiamia kanaketoava mwanedi imai vanuqe.

¹⁷ We kaia tamoqana divonanina mesaida ditolituqavo ivonedi wete tutuyanina mwanedi ilekwa ivoneni ivo, “Datolituqa Isileli tomoqina kumaieni waideye, matutudaba naqeneye iluguma wayaqina inasaidibiema.

¹⁸ We tutuyanina kabwau, kanakaleko ikenokeno vivimeye, we ideqa isauyeni maleweye.”

¹⁹ Potipali mwanena bonadi inoqai beqa kanakapoka ioqala-otoqa,

²⁰ tolauqaviavo ivonedi Iosepa ikavikavini inaweni deli naqeneye iyatoi, dede vikainina Pelo napilisinavo dikabamiana. Tutuyanina Iosepa dede waineye imiamia,

²¹ Iave taiauda imiamia, navenapwayewa ge menasivilavila iveleni we ivonavenapwayeweni, beqa deli kanatogumeta imwasana Iosepa paipaina.

²² Beqa Iosepa iyatoi pilisinavo kaditogumeta, we deli kanalituqa matatabuna iekisabodebodedi.

²³ We Iave taiauda imiamia beqa ikaivaiseni vakai puepuedi ivalabubunidi kaia giamaikavadi, beqa Iosepa kanatogumeta ge idavenuanaluqa lituqanina iveleni iekisabodaboda paipaina.