Kabavelamu 37 - Maiadomu

Iosepa ikenokisakisa

¹ Mulineye Aisake iwapa, Iakobo menasusuvo, gumanidiavo mesaida olaolaga, imiamia vikainina base tamana imiamia waineye, me Kenani tomo'otoqa divikai.

² Iakobo menatunavo vesipusipupudi dede mesaida. Natuna Iosepa tubuauna kanadiqaba 17, we gumanina sipi wete gouti kaditovekisabodaboda tatanavo taiauda, gumanidiavo tamadi mwanenavo Biluka we Silupa natudiavo. We Iosepa tatanavo divalabubuna kapoina paipaina tamana waineye ivesipupuyeni.

³ Tutuyanina Iosepa itubuqa Iakobo, tamo kanawavaqa Isileli, itomwaya-otoqa, beqa Iakobo Iosepa ivenapwayewa-otoqeni, matautauda tatanavo. Beqa tamo kanatalauma ivalabubuni giamaiotoqina mekanavaiqavu, we Iosepa iveleni.

⁴ Tutuyanina tatanavo ikiseni tamadi Iosepa ivenapwayewa-otoqeni, matautauda kaisedi, kadikapoka ioqala-otoqa wete ibaila-otoqeni. We ge kadisala vona giamaina inavesipupuyeni waineye.

⁵ Tamo lovana Iosepa ikenokisakisa, we tutuyanina kanakenokisakisa ivesipupuyeni tatanavo waidie, kadikapoka kaia ioqala-otoqa.

⁶ Iosepa ivonedi ivo, “Kwavevaneneqa, kagukenokisakisa aivesipupuyeni.

⁷ Kida datanoqe witi tagusudi, tavelagudi we tasikwagigidi. We no tutuyanina Yau gusikwagigi itovotovoi, we komi misikwagigi imiakauqeni isobwanu gusikwagigi waineye.”

⁸ We tatanavo ivoneni ivo, “Banikodiqa, komu kunuani nigo mwaqitana makini we kiloinema?” Paina Iosepa kanakenokisakisa ivesipupuyeni dede mesaida, beqa tatanavo kadikapoka kaia ioqala-otoqa ivetalavualeni.

Iosepa tatanavo ivegimwaneyeni Me Isimeli waidie inaweni Itipita waineye

¹² We tamo tutuya Iosepa tatanavo tamadi nasipinagouti meyokodi ikewadi inawedi Sikemi navikaie iekisabodebodedi we meyokodi iekalakani.

¹³ Beqa tamadi Iakobo, Iosepa ivoneni ivo, “Tatamwavo bwaigidi Sikemi navikai waineye imiamia sipi we gouti iekisabodaboda. Wayaqigu aivetunemu kinaqo waidie.” Beqa itagwana ivo, “Giamaina, ainaqo.”

¹⁴ Beqa tamana ivoneni ivo, “Kinaqo tatamwavo kikisedi, kago giamaidi inamiamia medikaisayavo, matautauda kivila kimai valea kivonegu.” Beqa Iakobo Iosepa ivetuneni itauya, matautauda kawagovanina Ebiloni navikai ikiaweni.

¹⁵ Tutuyanina Sikemi navikaie ilekwa, isasasala no vikainina waineye. We tutuyanina tamo tomoqo Iosepa ibabaneni ivelautolieni ivo, “Vakai kulalaualeni?”

¹⁶ Ibaivila ivo, “Yau tatagwavo alalaualedi, disipi wete digouti meyokodi iekisabodebodedi. Kanasala kivonegu vakaiebei imiamia?”

¹⁷ Ibaivila ivo, “Gunabeida dede vikainina ikiaweni itauya inaqo. We anoqai ivo, ‘Taitauya, tainaqo Dotani navikaie.’ ” Beqa Iosepa tatanavo ivemuliedi, inaqo Dotani navikaie ibabanedi.

¹⁸ Tutuyanina tatanavo ikisanaqo ikiseni kanikieqa imaimai, we saiqanaqa inalekwa waidie kaisedi ienuana ivesipupu velautaubama wayaqidi inaluvewapai.

¹⁹ Kaisedi waidie iesipupu ivo, “Kwakisanaweni, tokenokisakisanina imaimai!

²⁰ Tailuvewapai matautauda vovona taitaweni inaobu tamo guli tomo'otoqa itavia bwasi nakabatutuna paipaina waineye. Matautauda tainaqo tamada waineye taisimana tanavo, ‘Kaisaya dabadabadi ikania.’ Mulineye kanakenokisakisa taikiseni oge mwaqitana inasauyeni o gebuka.”

²¹ Lubeni divona inoqai we wayaqina Iosepa inaketoyavuya, beqa ivo, “Ge yawaina taigusuya,

²² wete dayaqina taigiaveulai. We kaia taitaweni inaobu tamo guli waineye dede pwayapwayamaiqe sayasayana waineye, we dimada ge waineye taisiketoidi.” Lubeni dede mesaida ivesipupuyedi, paina wayaqina Iosepa inaketoyavuya inakewai inavileni inanaweni tamadi waineye.

²³ Tutuyanina Iosepa ilekwa tatanavo waidie ivunuqi, we kanatalauma giamaiotoqina lausabasabana isitakia.

²⁴ We ikewai inaweni itaweni iobu tamo guli bwasi nakabatutuna naqekavana waineye, we bwasinina ge idakenokeno gunabeida isaya.

²⁵ Matautauda inaqo imiabui ikanikani. We ikisanaqo Isimeli nayoko tovegimwane Midiani pwayapwayana waineye'eqa ikisedi medikamelivo imaimai. We saku tupwaidiavo kabavegimwane ivedodoqidi mesaida kadi kabalaumaqamaqaila, tupwaidiavo maqaidi giamaiotoqidi wete bunama mulo. Gumanidiavo imai vanuqa Giliadi waineye'eqa inaqonaqo Itipita.

²⁶ We Iuda enavo ivonedi ivo, “Kago taida tailuvewapaiqa valeana taivaigavuyeni nawapa paipaina, vakai giamaina kawaie taibabaneni?

²⁷ Kwamai taivegimwaneyeni tovegimwane waidie, we dimada ge waineye taisiketoidi paina kida taida, bunuda wete dayaqida tamoqana.” We enavo itagwana.

²⁸ Beqa tutuyanina no tovegimwanenidiavo ilekwa, matautauda tatanavo Iosepa ibiuya ilagaqeteni gulinina waineye'eqa ivegimwaneyeni tovegimwanenidiavo waidie kanatutula seluba 20 beqa. Beqa Iosepa ikewai inaweni Itipita pwayapwayana waineye.

²⁹ Mulineye Lubeni ivila imai inaqo ikisaobu gulinina waineye, Iosepa ge idakiseni, beqa nuana ikapo kanakaleko ilabukidi.

³⁰ Beqa ivila inaqo tainavo waidie ivonedi, “Taida tubuauna ge adakiseni gulinina naqeneye. Banikodiqa, deqoina aivalabubunedi?”

³¹ Beqa Iosepa tatanavo gouti iluvewapai dayaqina beqa kanatalauma idayaqi.

³² Matautauda ikewai inaweni tamadi waineye ivo, “Kima talauma kaniakwanina dede kababaneni. We kukisa-vekavekaia, oge kanakisa mesaida natumu kanatalauma?”

³³ We tamadi talaumanina ikiseni matautauda ivesipupu ivo, “Ee, we natugu kanatalauma. O, mwaqitana natugu kaisaya dabadabadi iovai!”

³⁴ Beqa kanakaleko ilabukidi paina nuana ikapo-otoqa, matautauda kaleko mwesimwesiana ikweseni kaisaya bunudieqa ivalabubuni, we tutuya kaniakwanina iemoqai natuna paipaina.

³⁵ We natunavo lamoqidiavo wete vavinediavo inaqo waineye wayaqidi inalaunuagemai, we ibaila ge wayaqina divona inanoqai. Beqa ivo, “Yau kaia aiemoqai kanaketoava aiwapa.” Beqa kaia itaitaiqamo, we ge inavekwada natuna paipaina.