Kabavelamu 35 - Maiadomu

Yaubada Iakobo ivonavenapwayeweni

⁹ Mulineye Iakobo Lebani navikaie Mesopotemiaeqa ivila imai vikai Bedeli waineye imiamia, Yaubada ilausimatala-vaituqana Iakobo waineye wete ivonavenapwayeweni.

¹⁰ Yaubada ivoneni ivo, “Kamuavaqa Iakobo, deqoina tutuyanina ge Iakobo komu kamuavaqa aiqolemu Isileli.” Beqa Yaubada iqoleni Isileli.

¹¹ Matautauda Yaubada ivoneni ivo, “Yau Yaubada Veluvelulunaotoqina. Kivenatuna kivepue-otoqa. Tubuleleleqimwavo kamukabeida tamo tomo'otoqa kadiyoko bwaigidi we dikabaloina puedi, we kabaloinavo kadikinivo komu tubuleleleqimwavo waidie'eqa kawaie inasauyedi.

¹² Pwayapwaya dede gunabeida Ebelamo wete Aisake waidie avonadabadaba akalaqeieni wete avonadabadaba aikalaqeieni waimue, wete tubuleleleqimwavo mulimue waidie pwayapwaya dede aikalaqeieni waidie.”

¹³ Tutuyanina Yaubada Iakobo taiauda iesipupu ikakava, Yaubada ikiaweni ilaga.

¹⁴ No waineye Yaubada taiauda ivesipupu, beqa Iakobo gileu ikewai isivetovoia we oine i'iwaqi tabwaneye navelomu paipaina, matautauda olibe bunamana beqa wete i'iwaqi.

¹⁵ We no waineye Yaubada taiauda ivesipupu, beqa Iakobo vikainina iqoleni Bedeli.

Litieli iwapa

¹⁶ Mulineye Iakobo menasusuvo Bedeli ikiaweni itauya inaqo, we tutuyanina vikai Epalata giladi kanikie, Litieli ditutuya vetubuqa ivelamu we divetubuqa imwau.

¹⁷ Tutuyanina Litieli ivelamu iepaisiwa we diveviqa iebwaiga-otoqa, we gwamana saiqanaqa inatubuqa-kakava, togiavetubuqa ivo, “Ge kwaigololo! Komi gwamana lamoqina kwavetubuqi.”

¹⁸ Tutuyanina gwamana itubuqa, saiqanaqa Litieli yawaidi inakakava, beqa iqoleni Benoni, we tamana iqoleni Beniamina.

¹⁹ Matautauda Litieli iwapa itavunidi Epalata kenao doleneye. Deqoina Epalata iqoleni Bedeliema.

²⁰ We Iakobo gileu isivetovoia Litieli kaditaumata tabwaneye kadikiakiaya. No kiakiayanina giladi itovotovoi no vikainina waineye.

Aisake iwapa

²² Iakobo natunavo 12:

²³ Lea natudiavo: Lubeni, Iakobo natomwayai, Simioni, Libai, Iuda, Isaka we Sebuloni.

²⁴ Litieli natudiavo: Iosepa wete Beniamina.

²⁵ Biluka, Litieli ditolituqa, natudiavo: Dani wete Napitalai.

²⁶ Silupa, Lea ditolituqa, natudiavo: Gada wete Aseli. Dede Iakobo natunavo mwanenavo ivenatunedi Mesopotemia waineye.

²⁷ Beqa, Iakobo ivila-vaituqana tamana Aisake waineye Mamile, Kiliata Aba vivineye—deqoina taoni iqoleni Ebiloni. No vanuqanina base Ebelamo waineye imiamia mulineye wete Aisake waineye imiamia, gumanidiavo olaolaga.

²⁸ We Aisake imiana kanadiqaba 180.

²⁹ Tutuyanina Aisake itomwaya-otoqa, vaitabuna isauyeni iwapa we inaqo tubunavo waidie. Beqa, natunavo Iso we Iakobo itavuni.