Kabavelamu 3 - Maiadomu

Banikodiqa kapoina ivelamuyedimo pwayepwayeye

¹ Baisoa nanuauya katupoe paipaina ilaga-otoqa mulineye tupwaidiavo kaisaya Iave Yaubada ivalabubunidi. Baisoa vavine ivelautoliedi ivo, “Dede mwaqitana Yaubada ivonemi no kaivuavuaqanidiavo tanoqa naqeneye ge kwaikanidi?”

² We vavine ibaivila ivo, “Gebuka kaivuavuaqa puedi tanoqanina naqeneye kanasala waidie kaikani.

³ We kaivuavuaqa kanatanoqa gamwaneye, Yaubada ivonema ge kaikania wete ge kaialatovoni. We kago kaikania kaiwapa.”

⁴ Baisoa ibaivila ivo, “Aa, we ge kanamwaqitana wete ge kwaiwapa.

⁵ Kaiatanina kwaikaniaqa matami inakawananaqai we giamaina kapoina matatabuna waidie'eqa kwaiyagovidi. Komi Yaubada mesaida. Yaubada iyagovi beqa no iketobodemi kanakani waineye'eqa.”

⁶ Beqa vavine ikiseni no kaivuavuaqa giamaina kabakani, kanakisa giamaina wete wayaqidi inakania beqa matana inakawananaqai vakai matatabudi inayagovidi. Beqa tupwaidiavo vuadi ikewadi, tamo ikania. We mwanedi no waineye taiauda imiamia, beqa tamo iveleni ikania.

⁷ Matadi ikawananaqai iyagovi kayagwenegwenedi beqa welavi pigi lugudi iyalumidi mesaida kosi manawadi itumudi.

⁸ We tutuyanina lavilavie saiqana gaugau, inoqai Iave Yaubada butuna itauya imaimai kaivuavuaqa kanatanoqa naqeneye. Tomoqo memwanena welavi naqedie ivaigavu beqa Yaubada ge inakisedi.

⁹ Iave Yaubada tomoqo waineye iveqole ivo, “Ue, komu kaiebei?”

¹⁰ We tomoqo ibaivila ivo, “Yau kaivuavuaqa kanatanoqa naqeneye butumu anoqai agololo paina kayagwenegwenegu beqa avaigavu.”

¹¹ Yaubada ivelautoli ivo, “Aitoi ivonemu kuvekayakaigwene? Oge kaivuavuaqanina avonemu ge kikaniaqa komu kaivuavuaqanina vuana kukania?”

¹² Tomoqo ibaivila ivo, “Vavinenina kuveleguqa kaivuavuaqa vuana ivelegu akania.”

¹³ Iave Yaubada vavine ivelautoliedi ivo, “Vakai kwavalabubuni?” Vavine ibaivila ivo, “Baisoa ikatupwaiema beqa kakania.”

¹⁴ Iave Yaubada baisoa ivoneni ivo, “Paina komu kapoina kuvalabubuni beqa avekaiwemu kaisaya tauvanuqa wete kaisaya walawalakai waidie'eqa! Komu kamukaniqodadaqa ilaga-otoqa mulineye kaisaya tupwaidiavo. Tutuya puena manawamueqa kidaledale, we pwayapwaya kikanikani yawaimu kanamatatabu.

¹⁵ Aivekaiwemu komu wete vavine kwaivetalavuala tubuleleleqimwavo wete vavine tubuleleleqinavo inavetalavuala. Vavinenina tubuleleleqina kunukunumu inatutuguali, we komu kaqekedukeduna kiovai.”

¹⁶ Iave Yaubada vavine waidie ivona ivo, “Avona waimie kamikaimatavuloqa paipaina. Kamukabeida mwau waimie veviqa bwaigina kwaibabaneni gwamana natubuqa waineye. We kamikaimatavuloqa kanaveluqa dede mesaida, komi wayaqimi mwanemi kwailoineni we mwanemi inaloinemi menaveluluna.”

¹⁷ Iave Yaubada Adama ivoneni ivo, “Avona waimue kamukaimatavuloqa paipaina. Komu mwanemu bonadi kunoqai, we kaivuavuaqa kukania gumanina avonemu avo, ‘Ge kikania,’ “Beqa pwayapwaya aikavekapoi, we komu lituqaeqa kiveviqa kanikani kigoyovi kikani yawaimu kanamatatabu waineye.

¹⁸ Komu kanikani kibaguli we pwayapwaya waineye libi mwalamwalaqidi inavekalatabwatabwa.

¹⁹ We kilituqa-veluveluluna kilaugamweai kanikani kibabaneni, we kivila-vaituqana pwayapwaya waineye. Pwayapwayaeqa pwayapwaya kaupualina akewai avalabubunimu wete kivepwayapwaya-vaituqana.”

²⁰ Tomoqo iyagovi mwanena inave'ina tomo'otoqa yawayawaidi puena waidie beqa iqoledi Ibe.

²¹ Iave Yaubada kaisaya bunudi ikewadi ivalabubunidi Adama wete Ibe paipaidi ivekwesenidi.

Iave Yaubada Adama wete Ibe iveuqeuqedi tanoqe'eqa isauyedi

²² Iave Yaubada ivo, “Tomoqo gunabeida giamaina kapoina matatabuna waidie'eqa iyagovidi beqa mesaida kida. Beqa dimana ge inabalaqa yawaina vaqata kanakaivuavuaqa inakewai inakania, we inamia-vaqata.”

²³ Beqa Iave Yaubada Adama iveuqeuqeni isauyeni tanoqa Ideni naqeneye'eqa pwayapwayanina inalituqi waineye ivalabubuni.

²⁴ Mulineye tomoqo ikwavineni isauyeni, we selubima tupwaidiavo ivonedi inatovotovoi bolimana (isiti) navikaie tanoqa Ideni waineye. Wete kepata tamoqana niniqona we yabeyabelina ielauvivila vikai puena waidie iyatoi. Beqa no sakunidiavo yawaina vaqata kanakaivuavuaqa kanakeda inavekisabodebodeni, we ge tamo aitoi inalugu vikainina waineye.