Kabavelamu 28 - Maiadomu

Aisake Iakobo ivetuneni Lebani waineye

¹ Beqa Aisake Iakobo iqoleni ivonavenapwayeweni we vona veluveluluninaeqa ivoneni ivo, “Kenani vavinena ge tamo kinaqia.

² We kunaqo Mesopotemia waineye, tubumu Bedueli vanuqineye. No waineye avumu Lebani, gumanina inamu novudi, natudiavo waidie'eqa tamo kinaqia.

³ We Yaubada Veluvelulunaotoqina inavonavenapwayewemu beqa komu kivenatuna we natumwavo inavepue-otoqa, we tubuleleleqimwavo kamukabeida tomo'otoqa kadiyoko bwaigidi we dikabaloinavo puedi.

⁴ Base mesaida Yaubada ivonadabadaba tamamu Ebelamo ivonavenapwayeweni, beqa Yaubada inavonavenapwayewemu wete tubuleleleqimwavo. Kamukabei dede pwayapwayanina waineye tamiamia mesaida olaolaga komi kwaikewai mipwayapwaya, gumanina Yaubada ivonadabedabeni Ebelamo waineye.”

Iakobo ikenokisakisa Bedeli waineye

¹⁰ Iakobo Bedisibaeqa itauya inaqonaqo Elana taoni waineye.

¹¹ Valavala gunabeida iketoniveni, beqa tutuyanina ilekwa tamo vikai waineye iveyawai. No waineye ivebaekwa inakeno, tamo gileu ikewai kununeye iyatoi iketobala inakeno.

¹² We ikenokeno ikenokisakisa ikiseni luvewana pwayepwayeye itovoi ilaga tabwana abama ikavikavini, we luvewananina waineye Yaubada na'anelosevo puedi ilagalaga wete iobuobu.

¹³ We Iave luvewananina tabwaneye itovotovoi ivona ivo, “Yau Iave, tubumu Ebelamo na Yaubada wete tamamu Aisake na Yaubada. Pwayapwayanina waineye kukenokeno, aivelemu wete tubuleleleqimwavo aiveledi.

¹⁴ We inayavula inanaqo youyaeqa (wesiti), bolimanaeqa (isiti), kotalaeqa (noti) wete kwaibogaeqa (sauti). Tubuleleleqimwavo aikavepue-otoqidi mesaida pwayapwaya kaupualina, gumanina ge tamo aitoi kanasala inawawai. Pwayepwayeye tomo'otoqa disusuvo matatabuna giamaina inababaneni komu wete tubuleleleqimwavo waimie'eqa.

¹⁵ We Yau komu taiauda we vakai vikai waineye kinaqo aivekisabodebodemu, wete aivilemu aimaiemu dede pwayapwayanina waineye. Ge aibailemu kanaketoava vakai avonadabadaba waimue aivalabubunidi.”

¹⁶ Matautauda Iakobo kenoeqa itovoi ivo, “Oo, mwaqitana dede vikainina waineye Iave imiamia. We Yau ge adayagovi.”

¹⁷ We igololo bwaigina ivo, “Dede vikai igiavegolologu. Dede Yaubada navanuqa we abama kawana kanakabalugu.”

¹⁸ Kawakawaiotoqe Iakobo ikenotovoi matautauda gileunina kununeye ikenokeno ikewai isivetovoia vikainina kanakiakiaya, we bunama ikewai ibunamai inagiavemaqetai Yaubada waineye.

¹⁹ Beqa vikainina kanawavaqa iqoleni, Bedeli, we basenaqaida iqoleni Lusi.

^20-22 We Iakobo Yaubada waineye ivonadabadaba ivo, “Kago kivekisabodebodegu gusasala waineye we kanikani kivelegu wete kaleko kivelegu we aivila aimai tamagu navanuqe megugiamaina matautauda aisobwanu Komu waimue. We kago kivekisabodebodegu dede mesaida matautauda saku matatabudi kivelegu aiketovegeidi kadibou 10 waidie, we bou tamoqana aivelemu. Dede gileunina avetovoia kiakiaya mulineye dede waineye kamukabeida Komu Muvanuqa, we dede vikainina waineye tomo'otoqa komu waimue inasobwanu.”