Kabavelamu 25 - Maiadomu

Iso wete Iakobo itubuqa

¹⁹ Dede Aisake menatunavo vesipusipupudi dede mesaida. Aisake tamana Ebelamo

²⁰ we, tutuyanina Aisake kanadiqaba 40, Libeka inaqidi. Libeka Bedueli natuna we Lebani novuna kaniabadi, gumanidiavo me Elami we Mesopotemia pwayapwayana waineye imiamia.

²¹ We Libeka gagalidi ge menatudiavo, beqa Aisake ivelaukui Iave waineye mwanena inakaivaisedi. Iave navelaukui inoqai, beqa Libeka ive'ina'inaqe gamodie gwagwama didilualua.

²² We gwagwama iekaibibibina mediveluluna gamodie beqa Libeka inaqo Iave ivelautolieni, “Dede vakai isasauyeni waimeye?”

²³ Iave ivonedi ivo, “Gwagwama kadikailuqa gamomie kawaie kabaloina kailuqa inasauyedi. Komi kawaie yoko kailuqa kwaivenatunedi, we ediavo taiauda inaetalaqa. Tamo veluvelulunina matautauda iana, we komi mitomwayai inavetolituqa taina waineye.”

²⁴ Tutuyanina Libeka ivetubuqa, mwaqitana didilualua ivetubuqidi.

²⁵ Tomwayai itubuqa vovona yamoyamoina we mevutuvutuna, mesaida tupwaidiavo talauma mevutuvutudi, beqa iqoleni Iso.

²⁶ Matautauda tamo gwamana itubuqa dimana tatana kaqekedukeduna ikakavikavini, beqa iqoleni Iakobo. Tutuyanina Aisake kanadiqaba 60, mwanena gwagwamanidiavo ivetubuqidi.

Iso tomwayai kanakalaqei giamaina Iakobo iveleni

²⁷ Mulineye gwagwamanidiavo itaulai, Iso gumanina tamo toveyaoqa giamaiotoqina, we tutuya puena inaqonaqo walakaie. We Iakobo gumanina tomoqo vekwavekwadana, we tutuya puena ukweta waineye imiamia.

²⁸ We Aisake wayaqina vaiqo inakanikani Iso iyayaubani, beqa Iso ivenapwayewa-otoqeni, we Libeka Iakobo ivenapwayewa-otoqeni.

²⁹ Tamo kaiata Iakobo kemopo ietavoqa, Iso ivila imai walakaie'eqa, ikabiawa wete ilase-otoqa.

³⁰ Beqa ivesipupu Iakobo waineye ivo, “Yau alase-otoqa. Tupwaidiavo kemopo yamoyamoidi kuvelegu sideqoina aikanidi!” Dede mesaida ivesipupuyedi, beqa Iso tamo wavaqa iveleni, Edomu kananuakawananaqai yamoyamoina.

³¹ Matautauda Iakobo ivo, “Komu tomwayai, kamukabeida kalaqei bwaigina tamada naguyo kikewai. Deqoina kivonegu kamukalaqeinina kivelegu, matautauda kemopo dede aivelemu kikani kamukalaqei kanaketopesala.”

³² We Iso ivo, “Yau lase ge idayavagu, beqa tomwayai kanakalaqeinina ge kanasala inakaivaisegu! Ee, beqa komu kukewai.”

³³ Beqa Iakobo ivo, “Deqoina kivonadabadaba no tomwayai kanakalaqei kivelegu.” Beqa Iso ivonadabadaba no tomwayai kanakalaqei matatabuna Iakobo inaveleni.

³⁴ Matautauda Iakobo kemopo tupwaidiavo isiobuyedi, Iso iveleni beledi taiauda ikani wete iyemu ikakava itauya. Beqa mesaida, Iso nuana ge idaloloi tomwayai kanakalaqei giamaina paipaina we kaia inuanua nakani paipaina.