Kabavelamu 21 - Maiadomu

Aisake itubuqa

¹ Deqoina Iave Sela ivonavenapwayewedi mesaida base ivonadabadaba waidie inavenatuna natudi lamoqina inavetubuqi.

² No kanakaiataotoqa Iave ivoneni paipaina, vakai ivonadabedabeni kanamwaqitana isauyeni. Beqa ive'ina'inaqe natudi ivetubuqi, we Ebelamo gunabeida natutuya tomwaya waineye.

³ Natudi itubuqa, we Ebelamo iqoleni kanawavaqa Aisake.

⁴ Tutuyanina itubuqa kanakaiata 8 tamana bunu kanagusu ivalabubuni waineye mesaida base Iave ivoneni kiakiaya paipaina.

⁵ Dede isauyeni tutuyanina Ebelamo kanadiqaba 100 waineye.

Ebelamo Ega menatudi Isimeli iveuqeuqedi

⁸ Tutuyanina Aisake itaulai idabai, Ebelamo kani bwaigina ivalabubuni no kaiatanina waineye.

⁹ Tutuyanina waineye Sela ikiseni Isimeli isasaidibieni Aisake. We paina Isimeli Ebelamo tamo natuna, gumanina ditolituqa Ega Itipita vavinedi ivenatuneni,

¹⁰ beqa Ebelamo ivoneni ivo, “Dede tolituqanidi menatudi kuveuqeuqedi inatauya! Tutuyanina komu kiwapa, yau ge wayaqima Isimeli muguyoguyo tamo vikai inakewai. Kaia natugu Aisake kaisena muguyoguyo inakewadi.”

¹¹ Ebelamo ge idamwasana dede vonanina paipaina, paina Isimeli wete taunina natuna.

¹² We Yaubada Ebelamo ivoneni ivo, “Ge nuamu inakapo Isimeli wete inana paipaidi. Tubuleleleqimwavo avonadabadaba aivelemu gumanina Aisake waineye'eqa kawaie inasauyedi, beqa Sela kuvevaneneqedi mesaida kivalabubunedi.

¹³ Wete Isimeli tubuleleleqinavo aiveleni paina komu natumu, beqa tubuleleleqinavo kawaie tamo kabaloina inasauyeni.”

¹⁴ Beqa kawakawaiotoqe Ebelamo kadi wete kadibwasi kabagoi mebwasina gumanina kaisaya bunudieqa ivalabubunidi ikewadi, Ega kavaladie iveolidi. Matautauda Ega menatudi iveuqeuqedi itauya.