Kabavelamu 2 - Maiadomu

¹ Beqa abama, pwayapwaya wete saku puedi pwayapwaya tabwaneye Yaubada gunabeida ivalabubuna-kakavadi.

² Beqa kaiata kanavesikisi waineye valabubuna puena ivekakavadi, we kaiata kanaveseveni waineye lituqaeqa iveyawai.

³ We kaiata kanaveseveni ivonavenapwayeweni. Kaiatanina ivesinueni wete igiavemaqetai Kaiata Kabaveyawai, paina dede kaiatanina vakai puepuena pwayepwayeye gunabeida ivalabubunidi ikakava beqa nalituqa waineye iveyawai.

Iave tomo'otoqa ivalabubunidi

⁴ Iave Yaubada abama wete pwayapwaya ivalabubunidi ikakava. Vesipusipupunina dede mesaida: Tutuyanina Iave Yaubada abama wete pwayapwaya ivalabubunidi,

⁷ pwayapwaya ikewai beqa tomoqo ivalabubuni. Iave yawasa kanayawaina iyuvedamaneni tomoqo gabunineye, we tomoqo iyawasa.

⁸ Gunabeida Iave Yaubada kaivuavuaqa kanatanoqa ibaguli vikai Ideni waineye, bolimanaeqa (isiti), we no waineye tomoqo iyatoi.

⁹ Kaivuavuaqa kadikisa giamaidi Iave Yaubada igiavetabwadi no waineye itabwa ivuavuaqa giamaidi. We kaivuavuaqa kanatanoqa gamwaneye kaivuavuaqa kailuqa vesivesinuadi itovotovoi. We yawaina kanakaivuavuaqa vuana ikalaqei yawaina vaqata, we tamo yagova kanakaivuavuaqa vuana kanasala tomo'otoqa inagiaveyagovi giamaina kapoina matatabuna waidie'eqa.

¹⁵ Iave Yaubada tomoqo iyatoi kaivuavuaqa kanatanoqe Ideni naqeneye nalituqi wete inakisavekavini.

¹⁶ We Iave Yaubada tomoqo ivoneni ivo, “Kaivuavuaqa kanatanoqa naqeneye kanasala kaivuavuaqa puedi vuadi kikanidi.

¹⁷ We no kaivuavuaqanina kanasala tomo'otoqa inagiaveyagovidi giamaina kapoina matatabuna waidie'eqa, beqa ge kikania. No kaivuavuaqanina vuana ge kikania. Kago kikaniaqa, we kaiatanina kiwapa.”

¹⁸ We Iave Yaubada ivo, “Tomoqo imiamia kaisena ge giamaina. Kanatokaivaisa aivalabubuni gumanina kanakweyabu.”

¹⁹ Gunabeida Iave Yaubada pwayapwaya tupwaidiavo ikewadi we kaisaya wete manuqa matatabudi ivalabubunidi. Matautauda ikewadi imaiedi tomoqo waineye nakisedi vakai inaqoledi we vakai tomoqo iqoledi, kadiwavaqa kaia mesaida.

²⁰ Beqa tomoqo manuqa matatabudi wete kaisaya matatabudi, tauvanuqa wete kaisaya walawalakai kadiwavaqa iqoledi, we ge tamo waidie'eqa gumanina kanatokaivaisa we kanakweyabu giamaina idababaneni.

²¹ Beqa Iave Yaubada tomoqo igiavekenomataivi, we tutuyanina ikenokeno tomoqo lumalumana tamo ikewai, we vovona itutubodai.

²² We Iave Yaubada tomoqo lumalumanaeqa vavine ivalabubuni, we tomoqo waineye imaieni.

²³ We tomoqo ivo, “O, deqoina tutuyanina gumanina luluna lulugueqa we vaiqona vaiqogueqa. Dede gumanina tomoqo waineye'eqa ikewai, beqa aiqoleni vavine.”

²⁴ No mesaida isauyeni beqa tomoqovo tamadiavo wete inadiavo inabailedi we memwanediavo inavemialuqedi inavebunu tamoqana.

²⁵ We tomoqo wete mwanena kadikailuqa ivekayakaigwene, we ge idavovomayamayaqa.