Kabavelamu 17 - Maiadomu

Iave nakiakiaya kanayato

¹ Tutuyanina Ebelam kanadiqaba 99 waineye, Iave imai waineye ivesipupu ivo, “Yau Yaubada Veluvelulunaotoqina. Kiavegu kulaukiaveneni. Komu nuapoumu tamoqana kuyatoi gunuanuana waineye, we ge tamo kapoina kivalabubuni,

² beqa guvonadabadaba veluvelulunina aigiavepakali komu waimue, wete tubuleleleqimwavo aikavepue-otoqidi.”

³ Matautauda Ebelam inaqo ilaukabubu maiqinaeqa pwayapwaya waineye, wete Yaubada Ebelam waineye ivesipupu ivo,

^4-5 “We kunoqai Yau guvikai dede mesaida guvonadabadaba komu taiauda: komu kamukabei kabaloina puepuedi tubutubudi. Beqa deqoina kamuavaqa aisivilai Ebelam waineye inanaqo Ebelamo.

⁶ Tubuleleleqimwavo aikavepue-otoqidi. Kabaloina puepuedi inamai komu waimue'eqa we kabaloina dikinivo komu tubuleleleqimwavo waidie'eqa inasauyedi.

^7-8 “Guvonadabadaba aigiavepakali veluvelulunina komu waimue wete tubuleleleqimwavo lagata imaimai taiauda waimie kaia inanaqo ge menakakava inakeno-vaqata. Yau mu Yaubada wete tubuleleleqimwavo di Yaubada. Kenani pwayapwayanina waineye kusasasala aikalaqeieni waimie, mipwayapwaya ge menakakava.”

⁹ Yaubada Ebelamo ivoneni ivo, “Beqa komu muvikai, komu wete tubuleleleqimwavo guvonadabadaba kwaivematamataneni lagata imaimai waidie ge menakakava.

¹⁰ Muvikai dede mesaida guvonadabadaba komu taiauda: gukiakiaya bunu kanagusu kuvalabubuni waimue wete mesaida tubuleleleqimwavo lamoqidiavo inavalabubunedi mulimue imaimai.

¹¹ Beqa komu dukumunina kabasaila matana bununa kugusuya, inavekiakiaya davonadabadaba komu wete Yau taiauda.

¹² Lagata deqoina wete imaimai waidie gwagwama lamoqidiavo tamoqana tamoqana dikaiata 8 waineye bunu kanagusu kwaivalabubuni waidie. Natumwavo lamoqidiavo wete mutolituqa natudiavo lamoqidi, gumanidiavo kugimwanedi.

¹³ Mwaqitana, dede mesaida gukiakiaya bunu kanagusu kuvalabubuni lamoqidiavo matatabudi waidie mivanuqe. Guvonadabadaba komi Yau taiauda vovomie inavekiakiaya ge menakakava.

¹⁴ Beqa aitoi tomoqo guvonadabadaba kanakiakiaya bunu kanagusu waineye ge inamiamiaqa no waineye, gumanina guvonadabadaba iqeuya, beqa gumanina aiketovegeia gutomo'otoqavo waidie'eqa.”

Iave Selai waidie ivonadabadaba natudi Aisake inavenatuneni

¹⁵ Yaubada Ebelamo ivoneni ivo, “Mwanemu kadiwavaqa ‘Selai’ aisivilai ‘Sela.’

¹⁶ Mwaqitana, Sela aivonavenapwayewedi waidie'eqa natumu aivelemu, we natumunina waineye'eqa kabaloina puepuedi wete dikinivo inamai.”

¹⁷ Ebelamo tutuqana iveketonokuyeni maiqinaeqa ilaukabubu pwayepwayeye inamaqa kaisena nuapouneye ivo, “Aa, tavavaida dede diqaba 100 tomoqo idamiamia gwamana idavenatuneni? Wete mesaida Sela kadidiqaba 90. Banikodiqa, mesaida gwamana inababaneni?”

¹⁸ Ebelamo Yaubada ivoneni ivo, “Oge Isimeli paipaina kuvesipupu kivonavenapwayeweni?”

¹⁹ We Yaubada ivo, “Gebuka. Mwanemu Sela waidie'eqa natumu inatubuqa kiqoleni Aisake. Gumanina waineye guvonadabadaba aivalabubuni wete tubuleleleqinavo imaimai waidie ge inakakava inakeno-vaqata.

²⁰ Isimeli paipaina gunabeida muvelaukui anoqai. Aivonavenapwayeweni natunavo puedi aiveleni wete tubuleleleqinavo inavepue-otoqa. Gumanina togumetavo 12 tamadi wete tubuleleleqinavo aikavepuedi dikabaloina inavebwaiga.

²¹ We Aisake waineye guvonadabadaba aivalabubuni. Sela inavetubuqi dede kaiatanina waineye diqaba imaimai waineye.”