Kabavelamu 14 - Maiadomu

Lota ikewai inaweni we Ebelam inaqo ikewavileni

^11-12 No waineye Kini kadikumapuli me Sodoma wete me Gomola ditomo'otoqavo, disaku puepuena wete kadi taiauda ikewadi inawedi. Tutuyanina waineye Lota, Ebelam taina natuna, Sodoma waineye imiamia, we nasakuvo ikewadi wete taunina ikavikavini taiauda inawedi. Matautauda no waineye ikiawedi inaqo.

¹³ Tamo tomoqo Sodoma vetalaqaeqa ideqa imai Ebelam tomoqo Ibeliu waineye ivoneni vakai isauyeni no waineye. No tutuyanina waineye, Ebelam imiamia Mamile tomoqo Amoli nawelavi bwaigidi lamudie. Mamile, metainavo Esikoli we Aneli, Ebelam taiauda vonadabadaba ivalabubuni ivelautaubama. Ivonadabadaba me'ediavo iekaikaivaisa Kini kadikumapuli taiauda ietalaqa.

¹⁴ Ebelam natolauqaviavo kadiyoko 318, puepuedi Ebelam nabaekwa naqeneye itubuqa waineye itaulai. Tutuyanina Ebelam inoqai Kini kadikumapuli Lota ikewai, beqa natolauqaviavo iqolekauqidi Kininidiavo italakwavinidi inawedi Dani taoni waineye.

¹⁵ Tutuyanina ilovane, Ebelam natolauqaviavo iketovegeidi kadiyoko sulina sulina waidie. Matautauda kabalugu sulina sulina waidie ilugukwailidi ivelulunapeledi. Tutuyanina waineye Kini kadikumapuli wete ditolauqaviavo ideqa, we Ebelam menatolauqaviavo ikwavinedi inawedi Damasiko waineye ikiaweni inaqo Oba.

¹⁶ Matautauda sakunidiavo matatabudi Kini kadikumapuli ikewadi inawedi, Ebelam menayokovo inaqo ikewaviledi—Lota wete nasakuvo, vevine tupwaidiavo wete tomo'otoqanidiavo ikavikavinidi.

Melekisedeki Ebelam ivonavenapwayeweni

¹⁸ Matautauda Melekisedeki imai Ebelam ibabaneni. Gumanina Salema vanuqa kanakini, wete tovelomu Yaubada Tabwaotoqineye paipaina. Kaiatanina waineye beledi wete oine ikewadi imaiedi Ebelam waineye.

¹⁹ Melekisedeki ivelaukui Yaubada waineye ivo, “Yaubada Tabwaotoqineye, abama wete pwayapwaya kaditovalabubuna, avelaukuiemu Ebelam kivonavenapwayeweni.

²⁰ Yaubada Tabwaotoqineye, komu Kini kadikumapuli Ebelam dimaneye kuyatodi beqa kadidigemu.” Matautauda Ebelam nasakuvo Kini kadikumapuli waidie'eqa ikewadi vetalaqa mulineye imaiedi, bou 10 ivalabubunidi, we tamoqana bou Melekisedeki iveleni.