Isauyedi 40 - Maiadomu

Ukweta Maqemaqetana ivetovoia

¹ We Iave Mosese waineye ivesipupu ivo,

² “Wetaki gumegumetana kanakaiata gumegumetana waineye Ukweta Maqemaqetana kuvetovoia.

³ We Guvonadabadaba Kanadedewaga kuyatoi naqeneye, gumanina loina 10 kanagileu beabeadi naqeneye, we kaleko badubaduna kulautauleni mataneye Tutudaba Maqemaqetana'otoqina kututubodai.

⁴ We somala kumaieni naqeneye we kanasakuvo kuyatodi tabwaneye. Wete lamupa kabavetovoi kumaieni kuvetovoia wete kanalamupa kuyatodi waineye.

⁵ “Matautauda goula didiqa vane kabakanigabu paipaina kumaieni kuyatoi Vonadabadaba Kanadedewaga mataneye we kaleko kulautauleni Ukweta kana'awa kututubodai.

⁶ We didiqa velomu kabakanigabu Ukweta kana'awa mataneye kuyatoi.

⁷ We takula kabakailegwa kuyatoi Ukweta wete didiqa velomu kabakanigabu gamwaneye we bwasi ku'iwaqi kuveadaqi.

⁸ Ukweta Maqemaqetana matatabuna kaleko beqa kukalai inavelauvivila we kaleko kulautauleni Ukweta kanakala kana'awa inatutubodai.

⁹ “Matautauda olibe bunama kaba'iwaqa kukewai Ukweta ku'iwaqi kavagi kanasakuvo matatabuna naqeneye kuyatokedi inavemaqeta Yau paipaigu.

¹⁰ Matautauda bunama ku'iwaqi didiqa velomu kabakanigabu wete kanasakuvo matatabuna. Kuyatokedi inavemaqeta Yau paipaigu.

¹¹ We bunama ku'iwaqi takula kabakailegwa waineye wete kanakailagana taiauda kuyatokedi inavemaqeta Yau paipaigu.

¹² “Eloni menatunavo kumaiedi Ukweta Maqemaqetana kana'awa waineye bwasieqa kulegwadi.

¹³ Matautauda Eloni kuvaiqavuya kaleko maqemaqetanaeqa wete ku'iwaqi bunamaeqa, kuyatokeni beqa inavetovelomu inalitulituqa paipaigu.

¹⁴ Wete natunavo kumaiedi kuvaiqavudi tovelomuvo kadikaleko beqa.

¹⁵ Bunamaeqa ku'iwaqidi mesaida tamadi ku'iwaqi, vagi inavetovelomu inalitulituqa paipaigu. Gumanidiavo wete tubuleleleqidiavo gutovelomuvo ge menakabakakava.”

¹⁶ Vakai Iave naloina matatabuna Mosese ivoneni ivalabubunidi.

¹⁷ We diqaba kanaveluqa wetaki gumegumetana kanakaiata gumegumetana waineye, Ukweta ivetovoia.

¹⁸ Mosese koqala dikabatovoi bwegabwegadi iyatodi, waidie koqala isivetovoidi. Mulineye kanatokaivaisavo taiauda lulubiama veluvelulunidi iyatodi.

¹⁹ Matautauda Ukweta Maqemaqetana itumuya tamo kaleko giamaina beqa, mulineye tabwaneye kaisaya bunudi beqa itumuya kaia mesaida Iave ivoneni.

²⁰ Matautauda Mosese gileu beabeadi kailuqa ikewadi iyatodi Vonadabadaba Kanadedewaga naqeneye, gileunidiavo waidie Iave vonadabadaba igililidi. We kaipapula kadikabasinawe waidie isinawedi, we kanatutuboda iyatoi—no waineye Iave tomo'otoqa dikapoina inakukukumidi.

²¹ Matautauda dedewaganina ikavalai iluguveni Ukweta Maqemaqetana naqeneye we kaleko ilautauleni itutubodai, beqa ge tamo aitoi Vonadabadaba Kanadedewaga inakiseni, kaia mesaida Iave ivoneni.

²² We somala ikavalai iluguveni Ukweta Maqemaqetana naqeneye, we tutudaba gumegumetana waineye iyatoi kotala (noti) waineye kalekonina mataneye

²³ we beledi iyatodi somala tabwaneye Iave mataneye, kaia mesaida Iave ivoneni.

²⁴ Lamupa kabavetovoi iluguveni Ukweta kwaiboga (sauti) waineye iyatoi we somala gunabeida kotala (noti) waineye iyatoi ikenokeno

²⁵ we lamupa igabunidi Iave mataneye, kaia mesaida Iave ivoneni.

²⁶ Goula didiqa vane kabakanigabu iyatoi kaleko badubadunanina mataneye

²⁷ we vane maqaidi giamaidi igabunidi, kaia mesaida Iave ivoneni.

²⁸ Matautauda kaleko ilautauleni Ukweta kana'awa inatutubodai.

²⁹ Didiqa velomu kabakanigabu iyatoi Ukweta kana'awa mataneye. Tabwaneye kaisaya wete pwalawa inavelomuyedi, kaia mesaida Iave ivoneni.

³⁰ Takula kabakailegwa iyatoi Ukweta wete didiqa velomu kabakanigabu gamwaneye, we bwasi iveadaqi tovelomu dikabakailegwa.

³¹ Mosese, Eloni menatunavo lamoqidiavo bwasinina waineye dimadi wete kaqedi inalegwadi.

³² Kago tovelomuvo wayaqidi inanaqo didiqa velomu kabakanigabu vivineye o inalugu Ukweta Maqemaqetana waineye naqaida inakailegwa, kaia mesaida Iave ivoneni.

³³ We Ukweta Maqemaqetana wete didiqa velomu kabakanigabu kanavikai kaleko beqa ikalai ivelauvivila, we kaleko ilautauleni Ukweta kanakala kana'awa itutubodai. Beqa lituqa matatabuna ivekakavai.

Iave mata'udu'udulina Ukweta Maqemaqetana iveadaqi

³⁴ Matautauda waumana Ukweta Maqemaqetana iumai, we Iave mata'udu'udulina iveadaqi.

³⁵ Mosese ge kanasala inalugu naqeneye paina waumana iobuma matatabuna iumai wete Iave mata'udu'udulina iveadaqi.

³⁶ Tutuyanina waumana ivila ilaga Ukweta waineye'eqa, me Isileli ivelamu itauya inanaqo tamo vikai waineye.

³⁷ We kago waumana ge inalaga ge inatauya.

³⁸ Kaiate me Isileli matatabudi Iave kanawaumana ikisekiseni Ukweta Maqemaqetana tabwaneye, we lovane kai ikalakalata waumananina naqeneye me Isileli matatabudi ikisekiseni. Tutuya matatabuna disasala waidie waumana wete kai ikalakalata ikisekisedi.