Isauyedi 3 - Maiadomu

Yaubada Mosese taiauda ivesipupu

¹ Mosese lawana Ietolo nasipivo wete nagoutivo iekisabodebodedi. Ietolo gumanina me Midiani ditovelomu. Tamo kaiata waineye sipi wete gouti inawedi pwayapwayamaiqa waineye, ibala vikaineye we ilekwa Koya Sainai, Yaubada nakoya maqemaqetana waineye.

² Vikainina waineye Iave na'anelose ilausimatala waineye, kanakisa mesaida kai iyabeyabela welavi siaina gamwaneye. Mosese ikisanaqo welavi siaina ikalakalata we ge idakalaguali.

³ Beqa Mosese ivenuana ivo, “Uvale welavi siaina ge idakalaguali? Ainaqo vivineye aikisa-vekavekaia.”

⁴ Tutuyanina Iave Mosese ikiseni imaimai welavinina siaina iyabeyabela inakisa-vekavekaia, Yaubada iveqole welavinina waineye ivo, “Mosese-e! Mosese-e!” Mosese ibaivila ivo, “Uu, yau sideqoigu.”

⁵ Yaubada ivo, “Ge kimai welavi siaidi vividie. Pwayapwaya dede waineye kutovotovoi maqemaqetana, beqa kamukaqeyapayapa kukewayavuledi.

⁶ Yau tubumwavo Ebelamo, Aisake wete Iakobo di Yaubada.” Tutuyanina Mosese inoqai igololo ge wayaqina inakisanaqo Yaubada waineye, beqa maiqina ivaigavuyeni.

⁷ Matautauda Iave ivesipupu ivo, “Yau gunabeida me Itipita akisedi divalabubuna kapo gutomo'otoqavo waidie we ditaiqavolovoloqa gunabeida anoqai wayaqidi aiketoyavudi kaditogumetavo waidie'eqa. Wete diveviqa gunabeida ayagovidi.

⁸ Beqa gunabeida Yau aobuma me Isileli me Itipita dimadie aiketoyavudi waimue'eqa. Wete Itipitaeqa aikewaluguaqetedi inanaqo taunidi dipwayapwaya giamaina wete bwaigina waineye, no vikainina waineye kababagula giamaidi. Dede tutuyanina me Kenani, me Ititi, me Amoli, me Pelisaiti, me Aibaiti wete me Iebusi no waineye imiamia.

⁹ Mwaqitanaotoqa gutomo'otoqavo ditaiqavolovoloqa gunabeida anoqai, wete me Itipita divalabubuna kapoiotoqidi waidie akisedi.

¹⁰ Beqa deqoina komu aetunemu kinaqo Pelo waineye. Gutomo'otoqavo me Isileli kigumetedi Itipitaeqa inasauyedi.”

¹¹ We Mosese Yaubada waineye ivesipupu ivo, “Yau tomo'otoqamaimaiqa. Ge kagusala Pelo waineye ainaqo me Isileli aigumetedi Itipitaeqa ailuguaqetedi.”

¹² We Yaubada ibaivila ivo, “Yau komu taiauda. Tutuyanina waineye tomo'otoqa kigumetedi inasauyedi Itipitaeqa, dede koyanina waineye kwaisobwasobwanu waigue. Matautauda komu kiyagovi Yau avetunemu.”

¹³ We Mosese ivesipupu Yaubada waineye ivo, “Tutuyanina ainaqo me Isileli waidie aivonedi anavo, ‘Tubudavo di Yaubada ivetunegu amai waimie,’ we yau inavelautoliegu inavo, ‘Banikodiqa kanawavaqa?’ Beqa, yau banikodiqa aivesipupuyedi waidie?”

^14-15 Yaubada Mosese waineye ivesipupu ivo, “Gumanigu Miamiavaqaigu ge megukabakakava. Beqa Me Isileli waidie kivona kunavo, ‘Yau, Iave, tubumiavo Ebelamo, Aisake wete Iakobo di Yaubada, Gumanigu Miamiavaqaigu. Yau Mosese aetuneni waimie.’ Dede Kaguwavaqa ge menakabakakava. Lagata wete lagata inaqoleqolegu mesaida.” Tutuya dede waineye Yaubada Mosese ivetuneni itauya inaqonaqo, tatana Eloni imaimai paipaina kedeye ivekedabababana. Mosese Eloni ivoneni Yaubada vakai puena ivesipupuyeni waineye, matautauda inaqo Itipita me Isileli kaditogumetavo ivonedi. Beqa Mosese metatana Eloni inaqo Pelo waineye ivesipupu ivo, “Iave ivetunema kamai waimue kaivonemu me Isileli kitagwanedi inanaqo pwayapwayamaiqa waineye divelomu inakanigabu waineye.” Pelo ivo, “Ge kanasala aitagwanedi inanaqo pwayapwayamaiqe. Kaia inalitulituqa.” Beqa Yaubada me Itipita waidie saku kapoidi puedi ivavalabubunidi mesaida bwasi ivedayaqa, me Itipita dikaisayavo puepuedi ivekalawapawapa wete tomo'otoqa puedi bonu matadidilada ikewadi, we Pelo ge idatagwanedi me Isileli inanaqo.