Isauyedi 22 - Maiadomu

Mimiana kadiloinavo

¹⁶ We Iave ivonedi ivo, “Kago tamo tubuau vavina kaniabana inakisakwayaieni we taiauda inanaqi, we base kaniabanina ge tamo tomoqo taiauda idanaqi wete ge mekanaveyagutaqona, beqa tomoqonina pokala inatutuli matautauda taiauda inavemialuqedi.

¹⁷ We kago vavinenina tamana ge wayaqina tubuaunina inakewai we kaia inatutulimo—we kanatutulanina ilaga-otoqa paina base kaniabanina ge tamo tomoqo taiauda idanaqi.

¹⁸ “Ge tovebwaqavu kwaitagwanedi inamiamia, kwailuvewapadi.

¹⁹ “Kago tamo tomoqo inanaqi kaisaya taiauda, kwailuvewapai.

²⁰ “Kago aitoi Yau Iave mi Yaubada inavedumwekaikaiegu we navelomu inakanigabu yaubadavo tupwaidiavo waidie, tomoqonina kwailuvewapai.

²¹ “Tomo'otoqa olaolaga taiauda kwamiamia ge kwaivebubuna-kapoyedi paina komi base wete mesaida kwaveolaolaga Itipita naqeneye.

²² “Kwabukwabula wete gwagwama laulauyogudi ge kwaivebubuna-kapoyedi.

²³ We kago kwaivalabubuna-kapoidi, tutuyanina inataiqavolovoloqa Yau waigue wayaqidi kaivaisa, Yau Iave mwaqitanaotoqa bonadi ainoqai aikaivaisedi.

²⁴ We Yau kagukapoka inaoqala wete qavia waineye kepataeqa ailuvewapami. Mwanemiavo inakwabula we natumiavo inavelaulauyogu.

²⁵ “We kago mane gutomo'otoqa yomuyomudi kwaiveledi, ge kwaivonedi inabaivilai wete tabwaneye inayatoi mesaida mane kanatokalaqei divalabubuna.

²⁶ Kago aitoi mane kiveleni we kanatalauma kikewai navonadabadaba mesaida mumane inabaivilai waimue, beqa komu kanatalauma kivevilai mulineye valavala inaketoniveni.

²⁷ Paina kaia tamoqana talaumanina vovona inakakaveyauyauqi tutuyanina lovane inakeno. Kago ge kivileni iamu, vakai beqa inavelaukuva? Tutuyanina inataiqavolovoloqa waigue kaivaisa paipaina we Yau ainoqai, paina Yau tovenua'ina'inaqe.”