Isauyedi 20 - Maiadomu

Loina yauvou tamoqana (Loina 10)

¹ Matautauda Yaubada naloina matatabuna tomo'otoqa ivonedi.

² Ivo, “Yau Iave mi Yaubada, akewaluguaqetemi Itipitaeqa, no waineye kwavetolituqa-maimaiqa we ge mekamitutula.

³ “Ge yaubada tupwaidiavo waidie kwaisobwanu, kaia Yau kaisegu mi Yaubada.

⁴ “Ge tamo tokwalui kwaitunai waineye kwaisobwanu, tokwaluinidiavo kadikisa mesaida saku tupwaidiavo abama naqeneye, pwayapwaya tabwaneye, wete ligwagwa naqeneye.

⁵ Ge waidie kwaisobwanu paina Yau Iave mi Yaubada kaiseotoqigu, beqa valabubunanina Yau avedumwekaikaieni. We kago mesaida tomo'otoqanidiavo inavedumwekaikaiegu aikaimatavuloqidi wete gukaimatavuloqa inadamana natudiavo, tubudiavo wete yaitediavo waidie.

⁶ We kago kwaivenapwayewegu wete guloina kwaivekimatanedi, Yau guvenapwayewa ge menasivilavila aiketo'iwaqi waimie inadamana inanaqo tubuleleleqimiavo 1,000 lagata imaimai waidie.

⁷ “Komi kaguwavaqa ge kwaikabigoveni paina Yau Iave mi Yaubada, kago aitoi inakabigoveni aikaimatavuloqi.

⁸ “Kaiata Kabaveyawai kwainuanuani kwaiyatokeni Yau paipaigu paina maqemaqetana.

⁹ Kaiata 6 naqedie kwailitulituqa,

¹⁰ we kaiata kanave-7 waineye kwaiveyawai paina Yau Iave mi Yaubada gukaiata maqemaqetana. Kaiatanina waineye ge tamo aitoi inalituqa—natumiavo lamoqidiavo wete vevinediavo, mitolituqavo lamoqidiavo wete vevinediavo, mikaisayavo, wete olaolaga mikabaloina waineye imiamia.

¹¹ Paina kaiata 6 naqedie Yau Iave abama, pwayapwaya, ligwagwa wete saku puedi naqedie avalabubunidi we kaiata kanave-7 waineye aveyawai. Paipainanina Yau Iave kaiatanina avesinueni, avonavenapwayeweni wete ayatokeni Yau paipaigu.

¹² “Tamamiavo inamiavo kwaivekimatanedi, beqa mimiana inavekaniakwana no pwayapwayanina waineye, gumanina Yau Iave mi Yaubada avelevelemi.

¹³ “Ge tamo aitoi kwailuvewapai.

¹⁴ “Ge emiavo mwanediavo taiauda kwaigimala.

¹⁵ “Ge kwaivainaqo.

¹⁶ “Ge tamo aitoi vonakatupoe'eqa kwaivemwauya.

¹⁷ “Ge tamo tomoqo navanuqa, mwanena, natolituqavo, nabulumakau, nadoniki wete tupwaidiavo nasakuvo kwainuanuavaigavuyedi.”