Isauyedi 18 - Maiadomu

Ietolo Mosese iyavusi

¹ Mosese lawana Ietolo, me Midiani ditovelomu, valea inoqai vakai Yaubada ivalabubunidi Mosese wete me Isileli waidie tutuyanina Itipitaeqa ikewaluguaqetedi.

⁵ Mosese wete me Isileli ivebaekwa Yaubada nakoya maqemaqetana vivineye pwayapwayamaiqe, we Ietolo, Mosese mwanena wete natunavo kadikailuqa taiauda imai Mosese waineye.

⁶ We giladi imaimai kedeye Ietolo valea ivetuneni Mosese waineye ivo, “Yau Ietolo lawamu, mwanemu wete natumwavo kadikailuqa taiauda kawaiwai kaikisemu.”

⁷ Tutuyanina ilekwa, Mosese isauyeni lawana imwasaneni we menavekimatana isobwanu waineye iyaoqi we taunidi ivelautoliedi, “Giamaimu?” Matautauda inaqo ilugu Mosese na'ukweta waineye.

⁸ Mosese lawana ivoneni saku puedi Iave ivalabubunidi me Itipita wete Pelo waineye me Isileli paipaidi. Wete Mosese ivoneni tomo'otoqa veviqa bwaigidi ilautovonidi kedeye wete vakai Iave ivalabubunidi natomo'otoqavo iketoyavudi kadimwau waineye'eqa.

⁹ Tutuyanina Ietolo inoqai imwasana Iave navalabubuna giagiamai me Isileli waidie tutuyanina iketoyavudi me Itipita diveluluna waineye'eqa.

¹⁰ We Ietolo ivo, “Iave adidigeni paina me Itipita wete Pelo waineye'eqa iketoyavumi. We mwaqitana me Isileli iketoyavudi me Itipita diveluluna waineye'eqa.

¹¹ Mwaqitana deqoina ayagovi Iave naveluluna isaki-otoqa matautauda yaubadavo tupwaidiavo tomo'otoqa isobwasobwanu waidie, paina me Itipita igagasa we ivalabubuna kapo'otoqa natomo'otoqavo waidie beqa iketoyavudi.”

Ietolo Mosese ivonakatukatuni

¹³ Ikawananaqai Mosese loina kanatokalaqei nakabamiabui waineye imiabui tomo'otoqa divekawadibidibi ediavo taiauda ievaneneqedi, we Mosese iesinua kaiebei gumanina kapoina kaiebei gumanina giamaina. We no waineye tomo'otoqa itovotovoi kawakawaie kanaketoava inaqo ilavia.

¹⁴ We tutuyanina Mosese lawana ikiseni vakai ivavalabubunidi tomo'otoqa paipaidi, beqa ivo, “Vakai dede kuvavalabubunidi tomo'otoqa paipaidi? Uvale lituqa dede kaisemu kuvalabubuni, we tomo'otoqa ilalaugamasa kawakawaie inaqo ilavia paina wayaqidi divona kinoqai?”

¹⁵ Mosese ibaivila ivo, “Tomo'otoqa imai waigue wayaqidi inayagovi Yaubada nanuanua inavalabubuni, beqa dede mesaida aivalabubunedi.

¹⁶ We kago kadikailuqa inavekawadibidibi inamai waigue we aivesinuedi aitoi giamaina wete aitoi kapoina, matautauda Yaubada navemataluana wete naloinavo aivonedi.”

¹⁷ Mosese lawana ivoneni ivo, “Muvalabubuna dede ge giamaina.

¹⁸ Dede lituqa mwauna ge kaisemu kivalabubuni. Kago mesaida tomo'otoqa taiauda kwaikabiawa-otoqa.

¹⁹ Beqa deqoina kuvevaneneqa waigue aivonakatukatunimu, we komu Yaubada taiauda. Komu kamulaubwaina tomo'otoqa kadiwavaqaeqa Yaubada waineye kivesipupu dibwadu kimaieni waineye.

²⁰ Komu kanasala Yaubada navemataluanavo wete naloinavo kivevedi we kigiavemaqeta kedakeda giamaidi waidie inamia wete vakai saku inavalabubunidi.

²¹ We komu kanasala tomo'otoqa waidie'eqa tomoqovo nuanuauyadi tupwaidiavo kivesinuedi kiyatodi tomo'otoqa inakedagumetedi, tupwaidiavo tomoqovo inagumetedi 1,000, tupwaidiavo 100, tupwaidiavo 50 wete tupwaidiavo 10. Beqa kuvesinuedi tomoqovonidiavo kuvetumaqanedi wete gumanidiavo Yaubada inagololoyeni. We ge gumanidiavo mane kanatokawayapavo kivesinuedi.

²² Gumanidiavo tutuya puena tomo'otoqa inaekawadibidibi inasisivetonovidi. We kapoina siaidi kaisedi inasivetonovidi bwaigidi inamaiedi komu waimue. Inakaivaisemu mwaunina kwaikavalai, beqa memeaqanina waimue.

²³ Kago dede mesaida kivalabubunedi Yaubada inakedagumetemu ge kikabiawa, beqa tomo'otoqa medigiamaina inanaqo divanuqe inamia niwalova.”

²⁴ Beqa Mosese lawana bonana inoqai mesaida ivesipupuyedi ivalabubunidi.

²⁵ Me Isileli waidie'eqa tomoqovo nuanuauyadi ivesinuedi iyatodi tomo'otoqa inagumetedi: tupwaidiavo tomoqovo 1,000, tupwaidiavo 100, tupwaidiavo 50 wete tupwaidiavo 10.

²⁶ Tutuya puena no togumetanidiavo tomo'otoqa inavekawadibidibi inasisivetonovidi. Kapoina siaidi kaisedi inasivetonovidi we bwaigidi inamaiedi Mosese waineye.

²⁷ Matautauda Mosese lawana ikalanoaia ivila inaqo nakabaloina waineye.